Imdenganyo Dagiti Sagrado a Sasao
1 Saan nga amin a sawen ti tao ket maikari nga imdengan. Ngem no ti Dios ti agsao, adda napateg a rason nga umimdeng. (Deut. 28:1, 2) Agyamantayo ta inlanad dagiti napaltiingan a mannurat “dagiti sagrado a balbalikas ti Dios” a pagimbagantayo. (Rom. 3:2) Iti umay a kombension distrito, nagsayaat ti gundawaytayo a makangngeg kadagitoy a balbalikas bayat a maibasa ken mailawlawagda. Kasanokay a makapagimdeng a naimbag?
2 Nasapa a Sumangpet Kada Bigat: Iladawanyo ti gagar dagiti Israelita idi nabilinda nga umadani ken Jehova idiay Bantay Sinai tapno denggenda ti Lintegna! (Ex. 19:10, 11, 16-19) No kasta met laeng ti gagaryo nga umawat iti instruksion ni Jehova iti kombension distrito, ikagumaanyo ti sumangpet a nasapa kada aldaw. No naladawtay a sumangpet, saantay a mangngegan ti intero a programa ken makasinga iti dadduma ti panagbiroktayo kadagiti pagtugawan.
3 Uray ti dadduma a sumangpet a nasapa awanda iti tugawda no mangrugi ti sesion. Apay nga awanda? Urayenda nga agpakanta ti tserman sakbay nga isardengda ti makisarsarita iti gagayyemda ken agsubli iti tugawda. Laglagipentayo koma nga iti sumagmamano a minuto sakbay ti panglukat a kanta iti kada sesion, situtugaw ti tserman iti plataporma bayat a mapatpatokar ti panglukat a musika ti Pagarian. Daytoy ti mangtanda nga orasen tapno agtugawtayo! Ket inton mangrugi ti panglukat a kanta, nakasaganatayo a makidanggay iti kanta a pagdayaw ken Jehova.
4 Agimdeng Kas Maysa a Pamilia: No maibasa idi dagiti sagrado a sasao kadagiti naummong nga Israelita, masapul nga umimdeng ken agsursuro dagiti pamilia agraman dagiti “ubbing.” (Deut. 31:12) Kadagiti kombensiontayo, saan koma a “mabaybay-an” dagiti ubbing. (Prov. 29:15) Dakayo a nagannak, kitaenyo nga agkakatugaw ti amin a kameng ti pamiliayo—agraman dagiti tin-edyer. Urayen pay la ti dadduma a nagannak a mangrugi ti panglukat a kanta sakbay nga ipanda iti kasilias dagiti ubbingda. Nupay kasta, saan a masursuro dagiti ubbing ti dakkel a pateg dagiti kanta ken kararag iti panagdayawtayo no kasta ti aramidentayo. Anian a nagsayaat no mapan iti kasilias sakbay pay a mangrugi ti kada sesion no mabalbalin!
5 Makapagimdengtayo no adda husto nga inana iti kada rabii ken no liklikan ti agbussog unay iti aldaw. Imutektekanyo ti ibagbaga ti ispiker. Diyo ipalubos nga agtawataw ti panunotyo. Surotenyo iti Bibliayo no maibasa dagiti kasuratan. Aginotarkayo iti ababa. Bayat ti kada palawag, lagipenyo no ania ti imbaga ti ispiker, ket utobenyo no kasano a mayaplikar ti material. Iti ngudo ti aldaw, pagsasaritaanyo a sangapamiliaan ti programa. Ania a punto ti naginteresan ti tunggal maysa? Kasano a mayaplikar ti pamiliayo dayta nga impormasion?
6 Raemenyo ti Sao ti Dios: Mangipaay dagiti kombension iti nagsayaat a gundaway tapno makasaritatayo dagiti gagayyem ken matagiragsak ti makapabileg a panaglalangen. No nasapatayo a sumangpet, adda tiempotayo a makisarita sakbay a mangrugi ti programa. Ngem makipatang ti dadduma kabayatan ti programa, nga ipagarupda a saan unay a makasinga daytoy iti nalawa nga auditorium. Uray no dakkel ti kombension a maangay, tiempo dayta tapno agimdeng a kas met laeng no makigimong iti Kingdom Hall. Saan a rumbeng a baybay-an a makasinga dagiti cellular phone, pager, camcorder, ken kamera kabayatan ti programa.
7 Idi inawat ni Moises ti Linteg manipud ken Jehova, “saan a nangnangan iti tinapay wenno immin-inum iti danum.” (Ex. 34:28) Umarngi iti dayta, saan a maitutop ti mangan wenno uminum no madama dagiti sesion ti kombension. Malaksid no agpeggad ti salun-at, urayenyo koma ti “naituding a tiempo” para iti daytoy.—Ecl. 3:1, NW.
8 Iti dadduma a kombension, agtultuloy a parikut ti panaguummong ti adu a kakabsat agraman dagiti ubbing kadagiti pasilio kabayatan dagiti sesion. Maibilin kadagiti attendant a pasublienda dagitoy a kakabsat iti tugawda. Nasken nga agsubli iti tugawda dagiti nagboluntario iti nadumaduma a departamento apaman a malpas ti trabahoda. Malaksid no importante ti maipaaramid kadagiti boluntario kabayatan dagiti sesion, masapul nga addada iti tugawda, nga agim-imdeng iti programa. Saanda koma nga agtalinaed kadagiti departamento, nga agpipinnasiarda kabayatan ti sesion.
9 Ditay pulos kayat ti agbalin a ‘ngelngel iti panagdengngeg’ bayat nga im-imdengantayo ti Sao ti Dios. (Heb. 5:11) Determinadotayo ngarud koma a mangipakita iti panagraem babaen ti panagimdeng a naimbag bayat a mailawlawag dagiti sagrado a sasao manipud ken Jehova iti umay a kombension distritotayo.