‘Umimdeng ken Gumun-od iti Ad-adu a Pammilin’
1 Ti libro ti Proverbio ti nangiladawan iti kinasirib a kasla umaw-awag: “Umimdengkayo, ta sawek ti maipapan iti kangrunaan a bambanag, ket ti panaglukat dagiti bibigko maipapan iti kinapalungdo. Addaanak iti pammatigmaan ken praktikal a kinasirib. . . . Umimdengkayo kaniak; wen, naragsak dagiti mangsalimetmet iti mismo a daldalanko. Ta daydiay makasarak kaniak pudno unay a makasarakto iti biag, ket makagun-od iti naimbag a nakem manipud ken Jehova.” (Prov. 8:6, 14, 32, 35) Nagsayaat ti panangdeskribir dagita a sasao iti instruksion nga agur-uray kadatayo iti “Dagiti Mannursuro iti Sao ti Dios” a Kombension Distrito.
2 Nausig ti pakasapulan dagiti kakabsat iti sangalubongan, ket naisagana ti programa ti kombension tapno maipaay dayta a pakasapulan. No mayaplikar dagiti maidatag a naespirituan a sursuro ken praktikal a singasing, matulongantayo nga agbalin a naragsak, mangtaginayon iti nasayaat a relasion ken Jehova, ken agtalinaed iti dalan nga agturong iti biag nga agnanayon. Wen, adda nasayaat a rasontayo nga ‘umimdeng ken gumun-od iti ad-adu a pammilin.’—Prov. 1:5.
3 Sakbay ti Programa: Tapno naan-anay a magunggonaan kadagiti maiparang, masapul a nakatugawtayon ken nakasaganan ti isiptayo no mangrugi ti programa. Kalikaguman daytoy ti panagbalin nga organisado. Napateg ti kinasapa. Maturogkayo a nasapa iti rabii sakbayna. Agriingkayo a nasapa tapno adda panawen ti tunggal kagrupoyo nga agsagana ken mangan. Sapaenyo ti mapan iti pagkombensionan tapno makasapulkayo iti pagtugawanyo ken maaramidyo dagiti nasken a banag sakbay a mangrugi ti programa.
4 Yantangay ti kangrunaan a panggep ti asamblea ket tapno maidayaw ni Jehova “iti tengnga dagiti naguummong a reprep,” rumbeng a manglukat ti tunggal sesion iti wagas a pakaidayawan ti Diostayo. (Sal. 26:12) Tapno maaramid dayta, maiparegta iti amin nga agtugawda sakbay ti panglukat a kanta ken anunsio. Maitunos daytoy iti Nainkasuratan a pammagbaga: “Amin a bambanag maaramid koma a sitatakneng ken sigun iti urnos.” (1 Cor. 14:40) Ania ti kaipapanan dayta iti tunggal maysa kadatayo? Agtugawkayon a dagus apaman a makitayo ti tserman a nakatugaw iti plataporma bayat ti panglukat a musika. Iti kasta, mabalinanyo ti makiraman a naimpusuan iti kanta a panglukat iti tunggal sesion, ket maidaydayawyo ni Jehova.—Sal. 149:1.
5 Bayat ti Programa: Ni Esdras “insaganana ti pusona nga umuman iti linteg ni Jehova ken mangaramid iti dayta.” (Esd. 7:10) Kasanotay a maisagana ti pusotayo nga umawat iti pannursuro nga ipaay ni Jehova? Bayat a repasuenyo dagiti paulo ti nadumaduma a paset a nailista iti nayimprenta a programa, saludsodanyo ti bagiyo, ‘Ania ti ibagbaga ni Jehova kaniak babaen daytoy a programa? Kasano a mausarko dagiti impormasion tapno magunggonaanak ken ti pamiliak?’ (Isa. 30:21; Efe. 5:17) Itultuloyyo nga isaludsod dagita iti bagbagiyo bayat ti intero a kombension. Inotaryo dagiti punto a planoyo nga usaren. Pagsasaritaanyo dagita iti ngudo ti sesion iti tunggal aldaw. Dayta ti tumulong kadakayo a manglagip ken mangyaplikar iti impormasion.
6 Mabalin a narigat ti panangipamaysa iti panunot iti sumagmamano nga oras. Ania ti makatulong tapno saan nga agalla-alla ti panunot? Aprobetsarenyo ti bileg ti mata. No ania ti nakaiturongan ti matatayo, ad-adda a dita ti ayan ti atensiontayo. (Mat. 6:22) No kasta, ikagumaanyo a di taliawen no adda aguni wenno aggaraw. Kumitakayo a kanayon iti ispiker. No adda maibasa a kasuratan, surotenyo iti bukodyo a kopia ti Biblia, ken bay-anyo dayta a nakaukrad bayat ti pannakailawlawag ti teksto.
7 Tignayennatayo ti Nakristianuan nga ayat a di mangsinga iti sabsabali kabayatan ti programa. (1 Cor. 13:5) Daytoy ket “tiempo ti panagulimek” ken panagimdeng. (Ecl. 3:7) Gapuna, liklikanyo ti agsasarita ken aggarawgaraw no saan a kasapulan. Liklikanyo ti kanayon a mapan iti kasilias babaen ti panagplano a nasaksakbay. Saankayo a mangan wenno uminum agingga iti naituding nga oras, malaksid no agsagaba ti salun-atyo no diyo aramiden dayta. Ti pannakausar dagiti cellular phone, pager, camcorder, ken kamera ket saan koma a makasinga iti sabsabali. Katugaw koma dagiti nagannak ti intero a pamiliada, agraman dagiti agtutubo, tapno maasikasoda a naimbag dagiti annakda.—Prov. 29:15.
8 Idi napalabas a tawen, kastoy ti kinuna ti maysa a panglakayen a tumabtabuno kadagiti kombension iti adun a dekada: “Naisangsangayan kaniak daytoy a kombension iti sabali pay a rason. Naginotar ti nganngani amin a timmabuno, agraman dagiti ubbing. Makaparagsak a kitaen. Nalukib dagiti Biblia no kiddawen dagiti ispiker a maluktan ti maysa a teksto.” Talaga a makomendaran ti kasta a naipamaysa a panagimdeng. Saan laeng a makagunggona dayta kadatayo ken kadagiti kapammatian a delegado no di pay ket, kangrunaan iti amin, itan-okna ti Naindaklan nga Instruktortayo, ni Jehova a Dios.—Isa. 30:20.