Panagtataripnong a Mangidayaw ken ni Jehova
1. Ania ti tema ti kombension, ken apay a maiparbeng a dayawentayo ni Jehova?
1 Ni Jehova ket mannakabalin-amin, di matukod ti siribna, awan pagkurangan ti kinahustisiana, ken personipikasion ti ayat. Kas Namarsua, Gubuayan ti Biag, ken Soberano iti Uniberso, isu laeng ti maiparbeng a dayawentayo. (Sal. 36:9; Apoc. 4:11; 15:3, 4) Ti “Idayawyo ti Dios” a Kombension Distrito iti daytoy a tawen patibkerenna ti determinasiontayo a mangidayaw kenkuana kas ti maymaysa a pudno a Dios.—Sal. 86:8-10.
2, 3. Kasano a ti nasayaat a panagplano tulongannatayo a magunggonaan a naan-anay?
2 Kasapulan ti Nasayaat a Panagplano: Tapno naan-anay a magunggonaantayo iti insagana ni Jehova a naespirituan a padaya, nasken nga agplanotayo a naimbag. (Efe. 5:15, 16) Adda kadin ti pagdagusan ken paglugananyo, ken nakapagpakadakayo kadin iti pagtrabahuan wenno eskuelaanyo? Diyo itungtungkua dagitoy a napateg a banag. No itantanyo ti agpakada, mabalin a maikapiskayo iti dadduma a paset daytoy naragsak nga okasion. Nasken nga addatayo amin iti tunggal sesion.
3 Tunggal aldaw, ikagumaanyo ti sumangpet a nasapa iti pagkombensionan. Makatulong dayta kadakayo tapno nakatugawkayon sakbay pay ti panglukat a kanta ken tulongannakayo a mangisagana iti panunotyo nga umawat iti maidatag nga instruksion. Mangrugi ti programa iti 8:30 iti agsapa ti Biernes ken Sabado, ken 9:00 iti agsapa ti Domingo. Pangngaasiyo ta saankayo a mangireserba kadagiti pagtugawan malaksid no para iti pamiliayo wenno kadagiti kaduayo iti lugan.
4. Apay a maikalikagum nga agbalontayo amin iti pangaldawtayo bayat ti kombension?
4 Maikalikagum iti amin nga agbalonda iti pangaldawda imbes a pumanawda iti pagkombensionan tapno gumatang iti taraon bayat ti pangngaldaw. Nataltalna ti aglawlaw ken maaddaankayo iti ad-adu a gundaway a makilangen kadagiti kakabsat no surotenyo daytoy nga urnos. (Sal. 133:1-3) Pangngaasiyo ta dikayo mangitugot kadagiti mabuong a pagkargaan ken arak iti pagkombensionan.
5. Kasanotayo a mairugi nga isagana dagiti pusotayo maipaay iti kombension?
5 Dumngeg ken Agsursuro: Ni Esdras sipapasnek nga insaganana ti pusona a mangawat iti sao ti Dios. (Esd. 7:10) Pinagduyosna ti pusona kadagiti pannursuro ni Jehova. (Prov. 2:2) Mairugitayo nga isagana dagiti pusotayo maipaay iti kombension sakbay pay nga agrubbuattayo babaen ti panangmennamenna iti tema ti kombension ken panangisarsarita iti dayta iti pamilia.
6. Ania ti makatulong kadatayo tapno agtalinaed a naipamaysa ti atensiontayo iti programa? (Kitaenyo ti kahon.)
6 Iti nalawa nga auditorium, mabalin nga adu dagiti makita ken mangngegtayo a mangsinga iti atensiontayo. Dagiti kasta a pakasingaan nalakana la a perdien ti konsentrasiontayo nga agdengngeg. No mapasamak dayta, maikapistayo iti napateg a punto. Dagiti singasing nga adda iti kahon matulongannatayo a mangparang-ay iti konsentrasion.
7, 8. Kasanotayo a maipakita ti konsiderasion kadagiti dadduma?
7 Ipakita ti Konsiderasion Kadagiti Dadduma: Mabalin nga usaren dagiti kamera ken camcorder bayat ti programa, ngem tapno diyo masinga dagiti dadduma, usarenyo laeng dagita iti pagtugawanyo. Nasken a maiddep dagiti cell phone ken pager tapno saan a masinga dagiti dadduma. Awan koma dagiti personal nga alikamen a maikonektar kadagiti sound system iti pagkombensionan.
8 Sigurado a segseggaantayon ti agtataripnong a mangidayaw ken ni Jehova! Sapay koma ta determinadotayo a mangidayaw kenkuana babaen ti itatabuno kadagiti amin a sesion, panagimdeng a naimbag, ken panangyaplikar iti maadaltayo.—Deut. 31:12.
[Kahon iti panid 3]
Panagimdeng Bayat Dagiti Kombension
▪ Utobenyo dagiti paulo ti palawag
▪ Kitaenyo dagiti teksto
▪ Aginotarkayo iti ababa
▪ Ilasinyo dagiti punto a kayatyo nga iyaplikar
▪ Repasuenyo ti naadalyo