Ti 1999-2000 a “Naimpadtuan a Sao ti Dios” a Kombension Distrito
1 Idi dandanin sumrek dagiti Israelita iti Naikari a Daga, kiniddaw ni Moises kadakuada nga apresiarenda dagiti instruksion ti Dios. Kinunana kadakuada: “Saan a barengbareng kadakayo; gapu ta isu ti pakabiaganyo.” (Deut. 32:45-47) Ditay kadi agyaman ken Jehova yantangay nakapatpateg ti biagtayo kenkuana, nga itultuloynatayo nga iwanwan babaen iti di magatadan a Saona? Magagarantayo ngarud a mangpadpadaan iti tallo nga aldaw a “Naimpadtuan a Sao ti Dios” a Kombension Distrito ken iti insagana ni Jehova kadatayo.
2 Iti daytoy a tawen, nasayaat ti pannakaiplano ti 52 a kombension distrito iti 46 a nagduduma a siudad ken ili iti intero a Pilipinas. Maangayto ti programa ti kombension iti Bicol, Cebuano, Hiligaynon, Iloko, Ingles, Pangasinan, Philippine Sign Language, Samar-Leyte, ken Tagalog. Kayatmi a paregtaen ti isuamin a tabunuanda ti kombension a nakaitudinganda malaksid no kasapulan a tumabunoda iti sabali a kombension gapu iti naisangsangayan unay a sirkumstansia. Nangnangruna a nasken daytoy kadagiti Tagalog a kombension iti Quezon City, a sadiay limitado ti pagtugawan ken pagiparadaan. Ti bilang dagiti sirkito a naituding iti kada Tagalog a kombension iti Assembly Hall ket umdas laeng a laonen ti patakder, isu a no adu pay a sabsabali ti makilinnetlet, mangparigat dayta kadagidiay naituding a tumabuno. Maapresiar unay ti naayat a kooperasionyo iti daytoy a banag.
3 Sigurado a nangaramidkayon kadagiti urnos tapno matabunuanyo ti kada aldaw ti kombension agsipud ta patienyo a namnamaen ni Jehova a tumabunokayo. Manamnamayo a makitana ti panangikagumaan ken panagsakripisio dagiti adipenna tapno makatabuno, ket tandaananna dayta buyogen ti panangapresiar. (Heb. 6:10) Babaen ti itatabuno iti kada aldaw ti kombension manipud iti panglukat a kanta agingga iti pangserra a kararag, maipaneknektayo ken Jehova a tagipatgentay ti sasaona kadatayo. (Deut. 4:10) Maipakitatayo met ti panangapresiartayo iti panagbannog ti adu a kakabsattayo a nakiraman iti panangisagana iti kombension.
4 Kasapulan ti nasakbay a panagplano ken nasayaat a panangorganisar tapno mayurnos ti panagtataripnong dagiti rinibu a tattao ti Dios iti kada pagkombensionan. Yantangay ammotayo a siaayat a naaramid dagiti urnos iti kombension matignaytayo koma a makitinnulong, tapno “isuamin a bambanag maaramid koma a sitatakneng ken addaan urnos.” (1 Cor. 14:40) Naipaay dagiti sumaganad nga impormasion ken pammalagip tapno makasangpetkay iti pagkombensionanyo a nakasagana a naimbag a mangtagiragsak kadagiti naespirituan a taraon ken Nakristianuan a panaglalangen.
Sakbay ti Kombension
5 Agkasapulan kadi iti tulong dagidiay iyad-adalanyo iti Biblia ken dadduma pay nga interesado tapno personal a mayurnosda ti tumabuno iti kombension? Ti makita ken mangngegda sadiay ket mabalin a mangtignay kadakuada nga agdayaw ken Jehova. (1 Cor. 14:25) Ammuen koma dagiti panglakayen no siasino ti agkasapulan iti tulong iti transportasion, nangnangruna kadagiti nataenganen a miembro ti kongregasion, ket siaayat a kitaen a maited dagiti kasapulanda.—Gal. 6:10.
6 Yantangay ti First Aid Department iti kombension ket nairanta laeng a mangasikaso kadagiti emerhensia, irekomendami a mangitugotkayo iti bukodyo nga aspirin, agas ti sakit ti tian, ken umasping a bambanag iti kombension no namnamaenyo a kasapulanyo dagita. No adda datin a serioso a sakityo wenno ti maysa nga ay-ayatenyo, kas iti sakit ti puso, diabetes, wenno sakit a mabalin a kellaat nga agatake, pangngaasiyo ta itugotyo dagiti kasapulan nga agas iti kombension nga usarenyo a kas met no addakayo iti pagtaengan wenno pagbakasionan. Nainsiriban nga adda koma kanayon a mangkadua kenkuana a kabagian wenno nasinged a gayyem a makatarus iti kasasaad, yantangay isu ti kasayaatan a makatulong kenkuana.
7 Mabalin nga addanto gundawayyo a mangasaba iti di pormal bayat nga agbiahekayo a mapan ken aggapu iti kombension. Nakasaganakayto kadi a mangiburay iti kinapudno kadagiti sabsabali? Datayo amin, a pakairamanan dagiti ubbing nga annak, ket mabalin a makiraman babaen ti panagitukon iti tract kadagiti agserserbi iti paggasolinaan ken dadduma pay a maam-ammoyo iti panagbiaheyo. Addanto gundawayyo a mangipaima kadagiti magasin, broshur, wenno dadduma pay a literatura kadagiti interesado. Sisasaganakayo koma a mangasaba iti di pormal kadagiti tattao a mabalin a di makasabaan kadagiti gagangay a wagas ti panangasaba.
Kabayatan ti Kombension
8 Mabalinyo ti mangireserba iti pagtugawan para laeng kadagidiay miembro ti pamiliayo wenno kaduayo iti bukodyo a lugan. No mabalbalin, maireserba koma dagiti nanamnam-ay a pagtugawan kadagiti nataenganen a kakabsat, ket addanto dagiti lugar a mairanta para kadagiti adda sakitna ken kadagidiay agkasapulan iti pangipagnaan iti wheelchair. Kada aldaw bayat a panawanyo ti pagtugawanyo, pangngaasiyo ta siguraduenyo nga alaen amin nga alikamenyo.
9 Agpabautisarkayo kadi iti kombension distrito? Iti sesion ti agsapa ti Sabado, addanto maireserba a pagtugawan dagiti kandidato iti bautismo, ket iturongdakayto dagiti attendant iti daytoy a lugar. No mabalbalin, pangngaasiyo ta nakatugawkayo koman sadiay sakbay a mangrugi ti sesion. Itugotyo ti Biblia, pagkantaan, tualia, ken nanakman a kawes a pagbabasayo. Dagiti kamiseta nga addaan iti islogan ken aruaten nga umasping kadagita ket saan a maitutop iti kasta a nadayaw nga okasion. Siguraduen koma dagiti panglakayen a mangirepaso kadagiti saludsod iti libro a Ti Ministeriotayo kadagiti kandidato iti bautismo a maawatan ti tunggal maysa dagitoy a punto. Yantangay ti bautismo ket simbolo ti personal a dedikasion ken Jehova a Dios, saan a maiparbeng nga agiinniggem iti ima dagiti kandidato kabayatan ti pannakabautisarda.
10 Mabalinyo ti agusar kadagiti kamera, camcorder, ken audiocassette recorder iti kombension. Nupay kasta, ti panangipuesto wenno panangusar kadagita ket saan koma a makasali kadagiti pagnaan, makalinged kadagiti sabsabali, wenno makaisturbo iti panagimdeng iti programa. Masapul a di maikonekta dagita iti electrical wenno sound system.
11 Yantangay agraira ti panagusar kadagiti cellular phone ken pager, pangngaasiyo ta annadanyo a saan koma a makaisturbo dagitoy iti panagimdengyo iti programa wenno makasinga kadagidiay nakatugaw iti aglawlawyo. Saan koma a mapalubosan nga aguni dagitoy nga alikamen bayat a nakatugawkayo iti tallaong. No kasapulan nga agusarkayo iti cellular phone kabayatan ti programa, pangngaasiyo ta rummuarkayo.
12 Tapno di masayang ti tiempo ken awan unay ti pakakumikoman, insingasing kadatayo ti Sosiedad a balonentay ti pangaldawtayo iti kombension iti kada aldaw. Sinurot ti kaaduan a kakabsat daytoy nga instruksion ket nakitada a kalpasan ti sesion iti aldaw, makapagkakatugawda a sangapamiliaan ket kanenda ti balonda iti dayta nga aldaw. Adu ti nagkuna a makaparagsak ti kaadda ti gundawayda nga agaliwaksay iti pangngaldaw ken makilangen kadagiti kakabsatda. Kasapulan daytoy ti nasakbay a panaggatang kadagiti taraon ken mainum sa ikabil dagita iti bassit a pagkargaan wenno pagipalamiisan a mabalin nga ipan iti sirok ti pagtugawan. Kiddawenmi nga amin a tumabuno surotenda koma daytoy nga instruksion. Itay kallabes, napaliiw nga adda sumagmamano a kakabsat a pumanaw iti pagkombensionan tapno gumatang iti taraon kadagiti aglaklako iti lansangan ken kadagiti kabangibang a paggatangan iti naluton a taraon. Daytoy ti mangawis iti panagaaripuno ti ad-adu pay nga aglako iti ruar ti estadium, a pakaigapuan ti panagdudupudop ken nalaad a buya. Gapuna, kiddawenmi a kada aldaw ikagumaan ti tunggal maysa ti agbalon iti kanen ken inumenda iti kombension. Agbalon met koma dagiti interesado a kakuyogyo iti kombension. Saan a maipalubos dagiti mabuong a pagkargaan ken naingel nga inumen iti pagkombensionan.
13 Maitunos iti nadakamat, nalawag a di maiparbeng a gundawayan ti asinoman a kabsat ti kombension babaen ti panaglako kadagiti banag a kas kadagiti akkub ti libro wenno kamiseta, paypay, wenno kalendario a nasuratan iti tema ti kombension. Ti pagkombensionan ket agbalin a dakkel a Kingdom Hall a saan a pagnegosiuan.
14 Makapagboluntariokayo kadi a tumulong a mangdalus iti pasilidad kalpasan dagiti sesion iti kada aldaw? Wenno mabalinyo kadi ti agtrabaho iti maysa kadagiti dadduma pay a departamento iti kombension? No makatulongkayo, pangngaasiyo ta mapankayo iti Volunteer Service Department iti kombension. Dagiti ubbing nga agtawen iti nababbaba ngem 16 mabalinda ti makipagtrabaho a kadua ti naganak wenno sabali pay a responsable a nataengan. Siempre, makatulong ti tunggal maysa a mangdalus iti pasilidad babaen ti panangsiguradoda a mapidut amin a basura ken umiso ti pakaibellenganda.
15 Immawattayon kadagiti nagsasayaat a giya no aniada ti maitutop a kawes ken panaglanglanga kadagiti kombensiontayo. Kas pagarigan: Adda instruksion iti daytoy a banag kadagiti suplemento ti Ministeriotayo iti Pagarian, addaantayo kadagiti ilustrasion ken ladawan kadagiti literaturatayo, ken kangrunaanna, ammotayo ti kunaen ni Jehova iti Biblia. (Roma 12:2; 1 Tim. 2:9, 10) Ammo dagiti tattao no siasinotayo ken no apay a nagtataripnongtayo iti lugarda. No kasta, ti mismo a panagkawkawes ken panaglanglangatayo ket nabileg a pammaneknek. Nagsayaat nga ehemplo ti ipakpakita ti kaaduan a tattao ni Jehova iti daytoy a banag. Nupay kasta, pasaray makitatayo ti espiritu ti lubong a mayanninaw iti panagkawkawes ken panaglanglanga ti dadduma a tumabuno kadagiti kombensiontayo. Aniaman a narasay wenno nakipet a kawes ket pakakuestionaran ti asinoman nga agkunkuna a naespirituan a tao. Ad-adda a makaay-ayo ti naemma, nadalus, ken natakneng a langa. Gapuna, ammuen koma dagiti ulo ti pamilia no ania a kawes ti plano nga isuot dagiti miembro ti pamiliada. Agaplikar met daytoy no awantayo iti pagkombensionan. Ti panagusartayo kadagiti lapel badge sakbay ken kalpasan dagiti sesion ket mangipabigbig met nga adda pakainaigantayo ken Jehova ken iti nadalus nga ilina.—Idiligyo ti Marcos 8:38.
16 Napaltiingan ni masirib nga Ari Solomon a mangikuna a “ti kinamaag maikapet iti puso ti ubing” ken “ti inanak a mabaybay-an ibabainna ni inana.” (Prov. 22:15; 29:15) Kabayatan dagiti sesion, addada dagiti di maay-aywanan nga ubbing a Saksi a nangisturbo kadagiti kakabsat a mangikagkagumaan a dumngeg iti programa. Kadagiti kombension idiay Estados Unidos itay napan a tawen, addada sumagmamano nga agtutubo a nakita a nakatugaw kadagiti makingngato a paset, a mangipatpaturong kadagiti laser pointers iti tallaong. Napigsa ti lawag dagitoy a pointers ken makadadael iti mata, uray adayo. Nalawag a saan a magunggonaan dagitoy nga agtutubo iti naespirituan a programa a nairanta nga agpaay kadakuada. Yantangay dagiti nagannak ti manungsungbat ken Jehova iti kondukta dagiti annakda, masigurado laeng ti ina wenno ama a natalna ken agdengdengngeg dagiti annakda iti instruksion ni Jehova no katugawda dagiti annakda. Asitgan dagiti attendant ti asinoman a makaisturbo ket kiddawenda nga isardengda dayta, a siaasi a palagipanda ida nga agimdeng a naimbag iti programa.
17 Gapu ta awisentay ti publiko kadagiti kombensiontayo, nainsiriban ti panangsaluad kadagiti annak ken personal nga alikamen. Napateg a sagut ni Jehova dagiti annaktayo. Ngem ammotayo a ti lubong iyanninawna ti kinadawel ni Satanas. Gapuna, pangngaasiyo ta ammuenyo a kanayon no sadino ti ayan dagiti annakyo. Kasta met, itugotyo koma a kanayon dagiti kamera, pitaka, ken dadduma pay a napapateg a banag ket saan koma a maibati kadagiti pagtugawanyo. Siguraduenyo a nakatulbek dagiti luganyo, ken ipanyo dagiti personal nga alikamen iti pagidulinan ti luganyo wenno itugotyo dagita. Iti kasta, saan a masulisog ti mannanakaw a mangserrek iti luganyo.
18 Makaparegta a makita ti panaginotar dagiti kakabsat kabayatan dagiti sesion ti kombension. Dagiti ababa a nota tulongannakayo a mangipamaysa iti panunotyo ken mangtandaan kadagiti kangrunaan a punto. Ti panangrepasonto kadagiti innotaryo a kaduayo ti pamilia wenno dagiti gagayyem tulongannakayo a mangmennamenna kadagiti tampok ti kombension tapno saan a malipatan.
19 Kanayon a nabuslon ti kontribusion ti ili ni Jehova no maipapan kadagiti teokratiko a banag. (Ex. 36:5-7; 2 Cron. 31:10; Roma 15:26, 27) Dagiti boluntario a kontribusionyo iti sangalubongan a trabaho ket mausar a pangsulnit kadagiti paggastuan a nainaig iti panagabang kadagiti dadakkel a pasilidad a pakaangayan dagiti kombension. No tseke ti kontribusionyo, pangngaasiyo ta ipanaganyo dayta iti “Watchtower.”
20 Kas nailanad iti Amos 3:7, kinuna ni Jehova nga ‘awanto ti aramidenna a dinto maipalgak ti palimedna kadagiti adipenna, dagiti mammadto.’ Kas “Manangipalgak kadagiti palimed,” impailanad ni Jehova iti Biblia ti ginasut a padpadto a siuumiso ken naan-anay ti pannakatungpalna. (Dan. 2:28, 47) Addada pay nadaeg a karkari a di pay natungpal. Ti 1999-2000 a “Naimpadtuan a Sao ti Dios” a Kombension Distrito pabilgenna ti pammatiyo kadagiti kari ti Dios. Imdenganyo a naimbag ti sao ni Jehova kadakayo. Iyaplikaryo ti makita ken mangngegyo—iti ministerio, iti kongregasion, ken iti personal a biagyo. Ikarkararagmi ti nabaknang a pamendision ni Jehova iti amin nga urnosyo a tumabuno iti kada aldaw iti daytoy nabaknang a naespirituan a piesta!