1998-99 a “Dalan ti Dios iti Biag” a Kombension Distrito
1 Ipalagip kadatayo ti Proverbio 10:29 a “ti dalan ni Jehova maysa a sarikedked.” Mayanatup unay ti tema ti kombension iti daytoy a tawen—“Dalan ti Dios iti Biag”! Kasanonto ngata ti pannakailawlawag daytoy a tema iti intero a tallo nga aldaw a programa? Segseggaantay amin dagita a naisagana kadatayo.
2 Nalabit addada misionero, internasional nga adipen, wenno dadduma pay nga agserserbi iti sabali a pagilian a tumabuno iti dadduma kadagiti kombension iti daytoy a tawen. Mabalin a mainterbiu dagitoy iti programa. Itampok met ti programa ti kombension dagiti report no kasano a bembendisionan ni Jehova ti trabaho iti nadumaduma a teritoria.
3 Napateg Unay ti Tumabuno: Adu kadagiti kakabsattayo idiay Africa ti naglak-am iti rigat gapu iti gubat ken riribuk a mapaspasamak iti dadduma a paset dayta a kontinente. Ibilangda dagiti kombension ti ili ni Jehova kas biagda. Masapul a magna dagiti dadduma iti nawatiwat tapno makatabunoda iti kombension, ngem dida kayat nga adda malangananda. Agarup 450 a kilometro ti pinagna ti lakayen a kabsat nga agtawen iti 73 idiay Democratic Republic of Congo (dati a Zaire) tapno tumabuno iti kombension. Nakadanon sadiay kalpasan ti 16 nga aldaw, a limteg dagiti sakana, ngem maragsakan iti kaaddana sadiay. Kalpasan ti kombension, a napalalo ti ragsakna ken napabileg iti naespirituan, nagna manen a nagawid. Ar-aramidennan daytoy iti adun a tawen!
4 Idiay Mozambique sinang-at ti manangaywan ti distrito ken ti asawana ti nangato a bantay ken pinagnada ti nalawa a kasla desierto a lugar tapno makatabunoda iti asamblea sirkito. Nagdaliasatda iti 90 a kilometro iti 45 nga oras. Amin a timmabuno naparegtada unay gapu iti nagsayaat nga ehemplo dagitoy nga agassawa. Kasta met laeng a panagregget ti impakita ti adu a pamilia nga adda sadiay tapno makatabunoda. Impadamag ti manangaywan ti distrito a dadduma a kakabsat, a pakairamanan ti maysa nga agtawen iti 60, pinagnada ti 200 a kilometro!
5 Adda kadin masnup a planoyo a tumabuno iti kombension iti daytoy a tawen? Nalabit saanen a kasapulan a magnakayo iti nakaad-adayo, ngem nasken ti panagregget ken sakripisio tapno makatabunokayo ken ti pamiliayo. Iyurnosyo a tabunuan ti intero a programa manipud rugi agingga a malpas. Adu dagiti mayad-adalan iti Biblia a rumangrang-ay ken dandanin agdedikar. Ti itatabunoda iti kombension tulonganna ida a mangaramid iti umiso a desision. Inawisyo kadin dagiti iyad-adalanyo iti Biblia ken dadduma pay nga interesado tapno tumabunoda a kaduayo?
6 Tallo nga Aldaw a Programa: Iti daytoy a tawen maiparang ti programa kadagiti 51 a kombension iti Pilipinas. Nailista dagiti petsa ken pakaangayan dagitoy iti ngudo daytoy a suplemento. Ammoyo itan ti kombension a tabunuan ti kongregasionyo.
7 Naisangsangayan a Pakaammo: Nangnangruna a nasken kadagiti kombension iti Metro Manila iti daytoy a tawen nga amin nga adda iti dayta a lugar ket tumabuno laeng iti kombension a nakaitudingan ti kongregasionda. Angayentayto ti innem nga agsasaruno a kombension iti Assembly Hall idiay Quezon City. Limitado laeng ti pagtugawan iti hall isu a dagidiay laeng naituding iti partikular a ngudo ti lawas ti rumbeng a tumabuno tapno maliklikan ti panaglilinnetlet. Naipakita iti Setiembre a Ministeriotayo iti Pagarian dagiti sirkito a naituding iti kada kombension. Ti panagraem ken kooperasionyo kadagitoy nga urnos ipasiguradona a maaramid amin a bambanag a sitatakneng ken naurnos.—1 Cor. 14:33, 40.
8 Iti Biernes ken Sabado, mangrugi ti programa iti alas 8:30 t.b. Iti Domingo mangrugi iti alas 9:00 t.b. Iti Biernes ken Sabado, agngudo ti programa iti alas 5:00 t.m., ken iti Domingo, agngudo iti alas 4:00 t.m.
9 Bayat a mapan ken aggaputayo iti kombension, gundawayantayo koma ti mangasaba iti di pormal. Nalabit interesado iti mensahe ti Pagarian dagidiay agserserbi kadagiti paggasolinaan, despatsador, ken serbidora. Saganaanyo daytoy babaen ti panagitugotyo kadagiti tract, agdama a magasin, broshur, wenno dadduma pay a literatura, tapno magundawayanyo a kasabaan dagiti tattao a nalabit di makasabaan iti sabali a gundaway.—2 Tim. 3:17.
10 “Siputanyo No Kasano ti Panagimdengyo”: Nainsiriban nga ipangag dagiti delegado iti kombension ti balakad a masarakan iti Lucas 8:18. Maiparegta iti amin a mangitugotda iti Biblia, agraman pagkantaan ken kuaderno. Imdengan a naimbag dagiti kangrunaan a punto iti kada presentasion, ken aginotar iti ababa a sasao. Panunotenyo no kasanoyo a mayaplikar a personal ti material. Kada rabii ti kombension, sakbay a maturogkayo, apay a diyo repasuen dagiti innotaryo ket usigenyo no kasano ti kinapasnekyo a mangsursurot iti dalan ni Jehova maipaay iti biag.—Prov. 4:10-13.
11 Napaliiw a kabayatan dagiti sesion, dadduma ti pumanaw iti auditorium sada mapan agtugaw kadagiti luganda. Gapu iti dayta maikapisda iti presentasion ti programa. Napaliiw a dadduma agpagnapagnada kadagiti pasilio imbes a nakatugawda koma iti auditorium ken agdengngeg. Naimatangan nga addada grupo dagiti agtutubo a pumanaw iti pagkombensionan iti ngalay ti malem. Nangbusbos “ti matalek ken masirib nga adipen” iti adu a tiempo ken nagbannogda tapno maipaayda ti nasayaat nga instruksion, a kasapulantay amin. (Mat. 24:45) Nasayaat unay no ipangagtayo ti balakad ni Pablo: “Rebbengtayo nga ipaayan ti ad-adda ngem iti gagangay a panangipangag dagiti bambanag a nangngegtayo, tapno ditay pulos maiyayus.” (Heb. 2:1) Dadduma kadagiti adipen ni Jehova idi un-unana nakaaramidda kadagiti nakaro a biddut gapu ta dida inimdengan a naimbag dagiti pammalagip ni Jehova. Sigurado a ditay kayat ti makaaramid iti umasping a biddut.—2 Ar. 17:13-15.
12 Kawes a Mangidayaw ken Jehova: Kadagitoy napeggad a tiempo, nasken nga agridamtay a naimbag tapno saannatayo a maimpluensiaan ti espiritu daytoy a lubong. (1 Cor. 2:12) Natakneng koma ti panagkawkawes ken panaglanglangatayo ken iyanninawna koma ti dignidad ti Dios a pagdaydayawantayo. (1 Tim. 2:9, 10) Saan a kasapulan ti nangina a kawes tapno maibilangtayo kadagidiay ‘mangarkos iti sursuro ti Manangisalakantayo, ti Dios.’ (Tito 2:10) Kitaenyo ti nasayaat a panaglanglanga ti pamilia a nailadawan iti parupa ti Setiembre 15, 1997, a ruar Ti Pagwanawanan. Nabatad ti kinasiasino ti irepresentarda! Pulos a ditay tagtagibassiten ti nabileg a pammaneknek a maipaaytayo babaen ti panagkawes iti wagas a pakaidayawan ni Jehova.
13 Kinuna ti 16-anyos a Saksi nga idi napanda ken ni manongna iti restawran iti maysa a rabii kalpasan ti sesion, napaliiwda a dadduma kadagiti kakabsat nga adda sadiay sinuktanda dagiti kawesda iti di maitutop. Nupay kasta, adu dagiti parokiano iti restawran a maragragsakan a makakita kadagiti Saksi a natakneng ken nasayaat ti panagkawkawesda ken addaanda kadagiti badge card. Nangilukat daytoy iti gundaway a makasabaan ti dadduma kadagiti parokiano.
14 Kondukta a Mangidayaw ken Jehova: Ammotayo a ti Nakristianuan a konduktatayo maapektaranna ti panangmatmat dagiti sabsabali iti pudno a panagdayaw. Gapuna, kayattayo nga iti amin a tiempo agtignaytayo iti wagas a maikari iti naimbag a damag ken pakaidayawan ni Jehova.—Fil. 1:27.
15 Itay napan a tawen, naangay ti damo a kombension distrito iti amianan a paset ti Angola. Iti maikadua nga aldaw ti kombension, naibaon iti pagkombensionan ti dua a polis iti dayta a lugar tapno sigurado a mataginayon ti urnos ti publiko. Nagmalmalemda sadiay. Iti ngudo dayta nga aldaw, inapresiarda unay ti nangngegda ken ti kinaurnos a napaliiwda. Inkomento ti maysa kadakuada: “Apay ngamin a naibaonta ditoy? Ammotayo met a naurnos dagiti Saksi ni Jehova kadagiti panagtataripnongda.”
16 Nagkamang idiay Europa ti maysa a miembro ti politikal a partido iti maysa a pagilian ti Africa idi a napapatay amin a dadduma a miembro ti partidona. Nakaad-adu idi ti parikutna ken napalalo ti pannakaupayna. Idi agangay nakipagadal iti Biblia. Iti damo nga itatabunona iti kombension distrito, nasdaaw iti natalna ken natunos a panagtataripnong dagiti tattao a nagduduma ti kasasaadda iti biag. Kombinsido a nabirokannan ti kinapudno, ket iti dayta a kombension inkeddengna nga isardengnan a mamimpinsan ti pannakinaigna iti politika. Nabautisaran idi agangay, ket agserserbi itan ken Jehova a kaduana dagiti annakna.
17 Anianto ngata ti epekto ti konduktatayo kadagiti kombension iti daytoy a tawen kadagidiay nalabit damoda ti tumabuno? Makitadanto ngata a nabatad ti espiritu ti kooperasion kabayatan ti sangsangkamaysa a panagtrabahotayo kas boluntario? Maguyugoydanto ngata iti kinadalus ti aglawlawtayo ken iti pannakakitada a sakbay a pumanawtayo iti pagkombensionan, datayo agraman dagiti ubbingtayo, pidutentayto ti aniaman a basura a mabalin a naurnong iti asideg ti nagtugawantayo? Mapaliiwdanto ngata ti nasayaat a konduktatayo bayat a mapan ken agawidtay kadagiti pagdagusantayo ken iti pagkombensionan? Makitadanto ngata nga ay-aywanan a naimbag dagiti nagannak ti annakda iti amin a tiempo? Siguraduentay koma a makaipaaytayo iti kasayaatan nga impresion kadagiti amin a makaimatang kadatayo.
18 Pananglitup Kadagiti Paggastuan iti Kombension: Iti daytoy a lubong, nangina itatta ti mangala iti tiket tapno adda tugawmo nga agbuya iti isports wenno dadduma pay a pabuya iti estadium wenno convention hall. Maigapu daytoy iti nangina a pagabang kadagiti siudad. Kanayon nga ipakaammo ti Sosiedad a ‘libre ti tumabuno ken awan agur-or iti kuarta’ kadagiti kombension. Kasano ngarud a masulnitan ti pagabang ken dadduma pay a paggastuan iti kombension? Babaen ti naparabur a kontribusion dagidiay tumabuno. Masiguradomi nga ipakitayo ti espiritu ti kinamanagparabur a kas ti imparangarang dagiti adipen ti Dios idi un-unana kas panangtulad ken Jehova a Dios ken ni Jesu-Kristo. (2 Cor. 8:7) Maaywanan a siaannad amin a kontribusion tapno maipasigurado a natalged, mairekord, ken mausar amin dagita maitunos iti nakairantaanda.
19 Pagtugawan: Agtultuloy nga agaplikar ti instruksion a naipaay iti adun a tawen, nga isu daytoy, MABALIN NGA IRESERBA DAGITI PAGTUGAWAN KADAGITI LAENG MIEMBRO TI PAMILIAYO KEN ASINOMAN A KADUAYO NGA AGBIAHE ITI LUGANYO. Makaparegta a makita ti nagsayaat a rimmang-ayan iti daytoy a banag, ket daytoy ti nangparayray iti naayat a panaglalangen kadagiti kombension. Iti kaaduan a pagkombensionan, adda dagiti nanamnam-ay a pagtugawan. Pangngaasiyo ta ipakitayo ti konsiderasion, ket ireserbayo dagiti nanamnam-ay a pagtugawan kadagiti nataengan ken kadagidiay makasapul kadagita gapu iti kasasaadda. Laglagipenyo a ti ‘ayat saanna a sapulen dagiti bukodna a pagimbagan.’—1 Cor. 13:4, 5; Fil. 2:4.
20 Dagiti Camera, Camcorder, ken Audiocasette Recorder: Mabalin ti agusar iti camera ken alikamen a pagirekord kadagiti kombension. Nupay kasta, saan koma a makasinga kadagiti sabsabali ti panagusaryo kadagitoy. Ti panagpagnapagna a mangretrato kabayatan ti sesion ket makaisturbo kadagiti sabsabali a mangikagkagumaan nga agimdeng iti programa. Awan koma ti alikamen a pagirekord a maikonekta iti electrical wenno sound system, ket saan met koma a makasali daytoy nga alikamen kadagiti pagnaan, wenno makalinged iti dadduma.
21 First Aid: Ti First Aid Department ket para emerhensia laeng. Pangngaasiyo ta mangitugotkayo iti bukodyo nga aspirin, agas ti sakit ti tian, benda, impardoble, ken dadduma pay a bambanag, tangay awan itedda a kakasta idiay pagkombensionan. Siasinoman nga addaan iti sakit a mabalin a kellaat nga agatake, insulin shock, sakit ti puso, ken dadduma pay, itugotda koma dagiti kasapulanda nga agas. Adda koma mangkadua kadakuada a kabagian wenno kakongregasionda a makatarus iti kasasaadda ken ammoda ti ar-aramidenda no adda man emerhensia. Adda dagiti parikut a rimsua kadagiti kombension gapu ta nabaybay-an dagidiay addaan iti nakaro a sakit ket dimmegdeg ti kasasaadda. No awan kabagian a makaasikaso kadagidiay addaan iti naisangsangayan a parikut iti salun-at, nasken a mapakaammuan dagiti panglakayen maipapan iti situasion ket mangaramidda koma kadagiti nasken nga urnos a panangtulong. Awan probision kadagiti kombension para iti naisangsangayan a kuarto a pagyanan dagidiay addaan iti makaakar a sakit wenno allergy.
22 Taraon iti Kombension: Agbalon koma amin a tumabuno imbes a pumanawda a gumatang iti makan idiay ruar ti pagkombensionan kabayatan ti ababa nga intermision iti aldaw. Nalabit umdasen ti simple a merienda a nasustansia ken nalaka nga awiten. Ti suplemento ti Nobiembre 1995 a Ministeriotayo iti Pagarian, parapo 27, mangipaay iti sumagmamano nga ideya no ania ti itugot. Saan a maipalubos dagiti mabuong a pagkargaan ken naingel nga inumen iti pagkombensionan. Babassit laeng koma dagiti pagipalamiisan iti taraon tapno di makasali kadagiti pagnaan wenno kadagiti pagtugawan iti abayyo. Napaliiw a mangmangan ken umin-inum dagiti dadduma kabayatan ti programa, ngem mangipakita daytoy iti kinaawan panagraem iti okasion.
23 Panagnegosio: Saan a maiparbeng a gundawayan ti asinoman a kabsat ti ayan ti adu a tattao babaen ti panaglako kadagiti bambanag a kas iti akkub ti libro wenno kamiseta, paypay, wenno kalendario a nasuratan iti tema ti kombension. Ti pagkombensionan ket agbalin a dakkel a Kingdom Hall a saan a pagnegosiuan.
24 Anian a ragsaktayo ta dandanin mangrugi ti 1998-99 a “dalan ti Dios iti biag” a Kombension Distrito! Naiplanoyo kadin a naan-anay ti itatabunoyo? Sapay koma ta natalged ti panagbiaheyo ken agawidkayo a nabang-aran, a determinado nga agtultuloy iti napateg a panagserbi ken Jehova ken agtultuloykayo a magna iti “Dalan ti Dios iti Biag” agpaay iti agnanayon a pagimbaganyo.
[Kahon iti panid 6]
Dagiti Palagip iti Kombension Distrito
▪Bautismo: Nakatugaw koman dagiti kandidato ti bautismo iti naituding a benneg sakbay a mangrugi ti programa iti agsapa ti Sabado. Mangitugot koma ti tunggal maysa nga agpalplano nga agpabautisar iti nanakman a pagbabasa ken tualia. Siguraduen koma dagiti panglakayen a mangirepaso kadagiti saludsod iti libro a Ti Ministeriotayo kadagiti kandidato iti bautismo a maawatan ti tunggal maysa dagitoy a punto. Ti bautismo a simbolo ti dedikasion ti maysa ket nasinged ken personal a banag iti nagbaetan ti indibidual ken ni Jehova. Gapuna, di maiparbeng nga agrinnakep wenno aginniggem iti ima dagiti kandidato bayat a mabautisaranda.
▪Dagiti Badge Card: Pangngaasiyo ta usarenyo a kanayon ti 1998 a badge card bayat nga addakayo iti pagkombensionan ken bayat nga agbiahekayo a mapan ken agawid. Mangalakayo koma kadagiti badge card ken holder iti kongregasionyo, tangay saan a maala dagitoy iti kombension. Laglagipenyo nga itugot ti agdama nga Advance Medical Directive/Release card-yo.
▪Boluntario a Serbisio: Mabalinyo kadi ti mangiwaya iti tiempo iti kombension a tumulong iti maysa kadagiti departamento? No makatulongkayo, pangngaasiyo ta agreportkayo iti Volunteer Service Department iti kombension. Adda met maitulong dagiti agtutubo a nababbaba ngem 16 ti tawenda babaen ti panagtrabahoda iti sidong ti panangiwanwan ti nagannak kadakuada wenno sabali pay a responsable a nataengan.
▪Palagip: Siguraduenyo a natulbekan a kanayon dagiti luganyo, ken dikay mangibati iti aniaman a naparang a manggargari iti agtatakaw. Dagiti agtatakaw ken mannipdut kaay-ayoda dagiti dadakkel a taripnong. Saan a nainsiriban nga ibati dagiti napateg a banag iti tugawyo. Diyo masigurado nga amin nga adda iti aglawlawyo ket Kristiano. Apay a mangtedkayo iti pakasulisogan? Adda dagiti naawat a report maipapan iti panaggandat dagiti dadduma a taga ruar a mangyadayo kadagiti ubbing. SIPUTANYO A KANAYON DAGITI ANNAKYO.