1996 a “Dagiti Mensahero ti Nadiosan a Talna” a Kombension Distrito
1 Sigurado a tulongannatayo ti programa iti kombension distrito ita a tawen a mangsalimetmet iti nadiosan a talnatayo, ken ilawlawagna ti pasettayo a tumulong kadagiti sabsabali a mangsapul iti kasta a talna. Kas naipakaammo iti Setiembre 1996 a Ti Ministeriotayo iti Pagarian, ti tema ket “Dagiti Mensahero ti Nadiosan a Talna.” Nakaplanokay kadin tapno awan ti maliwayanyo iti programa?
2 Tallo nga Aldaw a Programa: Maipapan iti “Nararagsak a Managdaydayaw” a Kombension Distrito idi napan a tawen, kinuna ti maysa a timmabuno: “Anian a rag-otayo a nangusar iti tallo a nakaskasdaaw nga aldaw iti natalna, nagkaykaysa a panaglalangen, a mangidaydayaw ken Jehova! Pinatalgedan ti kombensiontayo nga agbibiagtayo iti napintas a naespirituan a paraiso. Talaga nga adda panggapuantayo nga agrag-o uray iti daytoy nariribuk a lubong.” Ammomi a pagrag-oanyonto met a naan-anay ti kombension ita a tawen ket agawidkayto a napabileg. (2 Cron. 7:10) Addaantayo manen iti tallo nga aldaw a programa. Naiyurnosyo kadin ti panagbakasionyo iti panggedan tapno makatabunokayo agingga a malpas? Adda iti ngudo daytoy a suplemento dagiti petsa ken lugar a pakaangayan ti 45 amin a kombension ditoy Pilipinas.
3 Mangrugi ti programa iti Biernes iti alas 8:30 t.b. ket agngudo iti Domingo iti agarup alas 4:00 t.m. Iti Sabado, mangrugi ti programa iti alas 8:30 t.b. ket iti Domingo mangrugi iti alas 9:00 t.b.
4 Mapatademkayto Ngata?: Kalpasan ti panangadawna iti Proverbio 27:17, a “Ti landok patademenna ti landok,” kinuna ti Agosto 15, 1993, a Pagwanawanan: “Maiyarigtayo kadagiti remienta a kasapulan a mapatadem a kanayon. Yantangay ti panangyebkas iti ayat ken Jehova ken ti panangaramid kadagiti pangngeddeng a naibatay iti pammatitayo kaipapananna ti panagbalin a naiduma iti lubong, masapul a kanayon a naiduma ti kababalintayo iti kaaduan.” Kasanotay a maiyaplikar dayta a pammagbaga?
5 Masapul nga agtalinaedtayo a naiduma iti lubong. Nasken nga ikagumaantay a kanayon nga aramiden daytoy tapno naregtatayo nga agaramid iti naimbag. (Tito 2:14) Dayta ti gapuna nga intuloy a kinuna ti artikulo ti Pagwanawanan a naadaw iti ngato: “No kaduatayo dagiti dadduma nga agay-ayat ken Jehova, makapagpipinnatademtayo—makapagpipinnaregta iti ayat ken kadagiti naimbag nga aramid.” Maysa ti kombension distrito kadagiti probision a naggapu ken Jehova a tumulong kadatayo nga agtalinaed a natadem iti naespirituan. Sapay koma ta determinadotayo a tumabuno iti tunggal sesion bayat ti tallo nga aldaw a kombension. Ditay kayat a liwayan ti aniaman a paset ti programa.
6 Agimdeng ti Masirib a Tao: Saantay a naiyanak nga addaan abilidad nga agimdeng. Ti panagimdeng ket arte a masapul a patanoren. Naikuna nga agarup kagudua iti mangngegna ti malagip ti gagangay a tao. Tangay agbibiagtayo iti panawen nga adu ti pakasingaan, mabalin a narigat kadatayo ti mangipamaysa iti napaut. Maparang-aytay kadi daytoy bayat ti kombension? No makiddaw kadakayo a mangsumaria iti programa iti tunggal aldaw no nakaawidkayon manipud iti kombension, kabaelanyo ngata? Kasanotay a mapasayaat ti panagimdengtayo?
7 Nasken ti nasged nga interes, ta saan unay nga agandar ti memoriatayo no awan dayta. Nupay kasta, agpannuray unay dayta iti panangimutektektayo a naimbag iti mangngegtayo. Ania koma ngata ti napasamak no saan unay a nagimdeng ti dadduma kadagiti pamilia nga Israelita sadi Egipto idi 1513 K.K.P. kadagiti instruksion iti Paskua? Kuna ti Exodo 12:28: “Dagiti annak ti Israel napanda inaramid ti kasta, kas iti panangibilin ni Jehova kada Moises ken Aaron. Kasta ti panangaramidda.” Ti panangtungpal kadagiti nadiosan nga instruksion kaipapananna idi ti pannakasalbar dagiti inauna nga annak ti Israel. Ti nasged nga interes ken panagimdengtayo iti tunggal paset ti programa iti kombension iyanninawna ti agdama a naespirituan a kasasaadtayo ken maapektaranna ti namnamatayo iti masanguanan. Kadagiti kombension masursurotayo dagiti dalan ni Jehova ken makaawattayo kadagiti instruksion a mangitungpal iti makaispal-biag a trabaho. (1 Tim. 4:16) Darepdepenyo a maysakayo a barko a maipalpalais iti nadawel a taaw. Nalagda a sinipete ti namnama dagiti kari ni Jehova. No ti maysa a tao ket saan nga agimdeng ken palubosanna ti panunotna nga agallaalla, ania ti mabalin a mapasamak? Mabalin a maliwayanna dagiti napateg a balakad a mabalin a manglapped koma iti pannakarbana iti naespirituan.—Heb. 2:1; 6:19.
8 Iti adu a paset ti lubong, napalalo ti pinget dagiti kakabsattayo a tumabuno kadagiti gimong. Nakaskasdaaw a makita ti napasnek a panagimdengda kadagiti kombension. Ngem, iti dadduma a lugar, makasinga dagiti dadduma kadagiti sabsabali gapu ta agkarapagnada iti aglawlaw ti pagkombensionan no madama ti sesion. Naladaw a sumangpet dagiti dadduma. Iti dadduma a napalabas a kombension, narigat a mangngegan dagiti umuna a minuto ti programa agsipud ta nakaad-adu dagiti agpagnapagna kadagiti koridor. Masansan a dagitoy ket saan a dagiti kakabsat nga adda trabahoda wenno inna a mangas-asikaso kadagiti babassit nga annakda. Dagiti tattao nga agsasarita laeng ti kaaduan a makasinga. Ita a tawen, ikkan ti Attendant Department iti ad-adu nga atension daytoy a problema, ket manamnama a nakatugawen ti amin no ibaga ti tserman nga agtugawtayon. Maapresiar unay ti kooperasionyo iti daytoy a banag.
9 Ania dagiti praktikal a singasing a tumulong kadatayo nga umimdeng a naimbag iti programa ken tapno ad-adu ti malagiptayo iti maiparang? Makatulong dagiti sumaganad: (a) Panunotenyo ti kangrunaan a rason iti ipapan iti siudad a pagkombensionan. Saan a tapno agpalpaliwa, no di ket tapno umimdeng ken agsursuro. (Deut. 31:12) Ikagumaanyo ti maaddaan iti umdas nga inana kada rabii. No umaykayo iti kombension a napaksuyan, narigat nga ipamaysa ti dumngeg. (b) Maaddaankay koma iti nawadwad a panawen tapno nakatugawkayon sakbay a mangrugi ti programa. No agap-apurakayo a mapan agtugaw iti ultimo minuto, maliwayanyo ti dadduma iti panglukat a paset. (c) Inotaryo iti ababa dagiti kangrunaan a punto laeng. Mabalin a makalapped iti panagimdeng a naimbag ti nalabes a panaginotar. (d) No maiyam-ammo ti maysa a paset ti kombension, sigagagar a seggaanyo. Saludsodanyo ti bagiyo, ‘Ania ngata ti mapidutko iti daytoy a paset a mangparayray iti panangipateg ken panagayatko ken Jehova? Kasano a matulongannak ti impormasion a mangiparangarang a naan-anay iti baro a personalidad? Kasano a matulongannak daytoy a mangparang-ay iti ministeriok?’
10 Kababalin a Mangarkos iti Ministeriotayo: Pinaregta ni Pablo ni Tito nga agbalin “a pagulidanan iti nasayaat nga ar-aramid.” No awan pakapilawan ti panangisurona, matulongan ni Tito dagiti sabsabali a ‘mangarkos iti sursuro ti Manangisalakantayo, ti Dios, iti isuamin a bambanag.’ (Tito 2:7, 10) Tinawen a makaawattayo kadagiti naayat a palagip no apay a nagpateg ti nadiosan a kababalin bayat nga agbiahetayo a mapan ken aggapu iti kombension, kasta met no addatayo kadagiti otel ken restawran ken iti kombension a mismo. Idi napan a tawen nakangngegkami manen kadagiti makaparagsak a komento a kayatmi nga iranud kadakayo.
11 Kinuna ti manedyer ti maysa nga otel: “Kanayon a makaparagsak ti mangsangaili kadagiti Saksi agsipud ta naanus, mannakikooperar, ken nasiputda kadagiti annakda.” Kinuna ti maysa a desk clerk ti otel a ti trabahona “nalaklaka nga adayo no sumrek ken rummuar dagiti Saksi iti otel agsipud ta, nupay agpilada nga aguray, kanayon a nadayaw, naanus, ken mannakaawatda.”
12 Iti sabali a bangir, masapul a sanayen dagiti nagannak ti annakda a mangtarus a saan nga agpatingga ti Nakristianuan a kababalin no panawantayon ti pagkombensionan. Masapul nga agpaut iti 24 nga oras iti inaldaw. Nadayaw koma ti kababalintayo kadagiti pagdagusantayo, restawran, ken kadagiti lansangan a kas no tumabunotayo kadagiti sesion.—1 Ped. 2:12.
13 Nupay naisardengen ti serbisio iti taraon kadagiti kombensiontayo, adda latta paggastuan iti panangabang iti pasilidad, panangpaadda iti sound system, ken panangasikaso iti dadduma pay a masapsapul. Mausar kadagitoy a paggastosan dagiti boluntario a donasiontayo. Awan ti kasano a kuarta ti maysa a kabsat a babai ken dagiti agtutubo nga annakna nga immay iti kombension. Ngem, kaskasdi a nangtedda nga agiina iti bassit a kontribusion. Adda iti tunggal maysa no ania ti aramidenna iti daytoy a banag, ngem ammomi nga apresiarenyo dagiti kasta a palagip.—Ara. 20:35; 2 Cor. 9:7.
14 Mailasin Babaen ti Panagkawkawestayo: Ti panagkawkawestayo adut’ ipanayagna maipapan kadatayo. Nalikmut ti kaaduan nga agtutubo ken adu a nataengan kadagiti uso nga estilo ti panagkawkawes idiay eskuelaan wenno iti panggedanda. No saantayo a naannad, nalakadatayo a maimpluensiaan dagiti taga-lubong a kataebtayo a tumulad iti panagkawkawesda. Adu nga estilo ti di maitutop nga isuot kadagiti gimong a pagdaydayawan. Kalpasan ti maysa kadagiti kombension idi napan a tawen, adda nagsurat tapno iyebkasna ti apresasionna iti programa ngem innayonna: “Nasdaawak no apay a nakaad-adu dagiti agtutubo a babbai a nakiting ti kawesda, gistay agparang ti barukongda, ken nangato ti riang ti paldada.” Sigurado a kayattay amin ti agkawes kas maiparbeng kadagiti Kristiano a ministro agpadpada iti kombension ken bayat nga agal-aliwaksay kalpasan ti programa. Iti amin a tiempo makagunggona a panunoten ti balakad ni apostol Pablo a maarkosantay koma iti “naimbag-pannakaurnosna a kawes, buyogen ti kinaemma ken kinasimbeng ti panunot.”—1 Tim. 2:9.
15 Siasino ti rumbeng a mangikeddeng no ania ti naemma, “naimbag-pannakaurnosna” a kawes? Ti naemma kaipapananna, “saan a nadursok wenno manangipapilit iti kayatna.” Depinaren met ti diksionario ti naemma kas “saan a naparammag.” Agpada a saan a mangipasdek ti Sosiedad wenno dagiti panglakayen kadagiti paglintegan iti kawes wenno panaglanglanga. Uray pay, saan kadi a rumbeng a nalawag koma iti maysa a Kristiano no ania nga estilo ti panagkawkawes ti nabatad a saan a naemma wenno desente? (Idiligyo ti Filipos 1:10.) Saan koma a nakadidillaw ti langa ken kawestayo. Masapul a makaay-ayo, saan a nailubongan wenno makaparurod, ti langatayo. Kas ministro ti naimbag a damag, maidaydayaw ni Jehova ken saan a mababalaw ti organisasion no natakneng ti kawes ken langatayo. No ania ti langa ken kawestayo a makigimong idiay Kingdom Hall, kasta met koma no addatayo iti siudad a pagkombensionan. Ngarud, ipakita dagiti nagannak ti ulidan ken siguraduenda nga agkawes dagiti annakda iti maiparbeng iti okasion. Kayat dagiti panglakayen nga ipakita ti nasayaat nga ulidan ken madadaanda a mangipaay iti naayat a balakad no kasapulan.
16 Panangtaginayon iti Aglawlawtayo a Nadalus: Saan laeng koma a ti kawestayo ti nadalus ken nadalimanek, no di pay ket ti aglawlawtayo. Taginayonentayo a nadalus ti pagkombensionan, a ditay agiwara iti papel, balkut ti kendi, wenno kadagiti nagawangan. Sakbay nga agawid iti malem, piduten ti aniaman a basura a nakawara sa ibelleng iti umiso a pagbasuraan wenno iyawid ket sadiay nga ibelleng.
17 Panagnegosio: Tumabunotayo iti kombension tapno mangan iti naespirituan a taraon. No kasta, di rumbeng ti manggundaway iti adu a tattao babaen ti panaglako kadagiti bambanag a kas iti T-shirt, paypay, wenno kalendario a nasuratan iti tema ti kombension. Kinapudnona, agbalin ti pagkombensionan a kasla maysa a dakkel a Kingdom Hall a di mabalin ti agnegosio.
18 Dagiti Camera, Camcorder, ken Audiocassette Recorder: Maipalubos ti agusar iti camera ken dadduma pay nga alikamen a pagirekord, no la ket ipakitatayo ti konsiderasion kadagiti dadduma a timmabuno. No agpagnapagnatayo a mangretrato bayat ti sesion, saantay laeng a masinga dagiti dadduma no di ket maikapistayo a mismo iti dadduma iti programa. Ad-adda a magunggonaantayo iti kombension no agimdengtayo a naimbag kadagiti agpalawag ken aginotar. Mabalin a mangirekordtayo para iti maysa a kabsat a masakit ket saan a makatabuno; nupay kasta, no datayo a mismo ti agusar, mabalin nga awanto met laeng panawentayo no nakaawidtayon a mangrepaso iti programa nga inrekordtayo iti adu nga oras. Awan ti aniaman nga alikamen a pagirekord a maikonekta iti electrical wenno sound system, ken saan met koma a makasali dagitoy nga alikamen kadagiti pagnaan, wenno makalinged iti dadduma.
19 Pagtugawan: Agtultuloy a mapalpaliiwtayo ti irarang-ay no iti panangireserba iti pagtugawan. Idi napan a tawen, sinurot ti kaaduan kadakayo ti instruksion a: MABALIN NGA IRESERBA DAGITI PAGTUGAWAN KADAGITI LAENG MIEMBRO TI PAMILIAYO KEN ASINOMAN A KADUAYO NGA AGBIAHE ITI LUGANYO. Nalabit a nasarakanyo a saan unay a makapasikor agsipud ta adu ti nangsurot kadagitoy a nabatad nga instruksion. Napatpateg pay, ti panagtulnogyo makaay-ayo ken Jehova ken iti ‘matalek nga adipen,’ a mangipapaay iti naespirituan a taraon.—Mat. 24:45.
20 Pangngaasiyo ta laglagipenyo a saan a nairanta ti First Aid Department ti kombension a mangasikaso iti nabayagen nga adda sakitna. No kasapulan ti miembro ti pamiliayo ti naisangsangayan a pannakaaywan, siguraduenyo koma a saan a mapanawan nga agmaymaysa no tumaud ti emerhensia. Kayat dagiti panglakayen ti agbalin nga alisto iti asinoman iti kongregasionda nga addaan naisangsangayan a kasapulan gapu iti salun-at ken siguraduenda nga antemano a maiyurnos ti pannakataripatoda.
21 Kasapulan a Taraon iti Kombension: Mabalin a medio madanagan ti sumagmamano kadatayo idi naipakaammo idi napan a tawen nga awan maiserbi a taraon wenno inumen iti kombension. No kasta, kas iti kaaduan kadagiti kakabsattayo, naragsakantayo unay iti pagsayaatan ti panangitugot iti bukodtayo a taraon. Insurat ti maysa a kabsat: “Makitak a sibabatad a dakkel ti magunggona iti daytoy iti naespirituan. Maipamaysa itan ti amin a tiempo ken pigsa kadagiti naespirituan a banag. Diak pay nakangngeg iti negatibo a komento.” Insurat ti maysa a kabsat a babai: “Babaen ti ulidan, dakayo a patpatgenmi a kakabsat parparegtaendakami kas indibidual a Kristiano a mangusig iti bagbagimi ken mangsapul kadagiti pamay-an a mangpasimple iti biagmi ken mangparang-ay iti teokratiko nga aktibidadmi.” Nagsurat ti maysa nga agdaldaliasat a manangaywan maipapan iti serbisio iti taraon a maipapaay idi: “Iti daan nga urnos, adu a kakabsat ti naikapis iti intero a programa ti asamblea.” Maipanggep iti taraon nga intugot dagiti kakabsat, insurat ti maysa a panglakayen: “Addaanda iti kayatda, ken saanen a masapul a makipilada nga aguray iti dayta.” Adu ti nagkuna nga ad-adu ti panawenda a simmarungkar kadagiti gagayyemda.
22 Awan manen ti serbisio iti taraon iti daytoy a tawen. Pangngaasiyo ta iwayaanyo iti sumagmamano a minuto a repasuen ti suplemento ti Nobiembre 1995 a Ti Ministeriotayo iti Pagarian, parapo 27, maipapan kadagiti naisingasing a taraon a mabalin nga itugot iti kombension. Pangngaasiyo ta laglagipenyo, awan koma ti mabuong a pagkargaan wenno naingel nga inumen a maitugot iti pagkombensionan. No kasapulan dagiti babassit a cooler, masapul nga apaghusto laeng a maiyabay iti tugawyo ken saan a mangagaw iti tugaw ti sabali. Adda umdas a tiempoyo a mangan ken uminum iti intugotyo bayat ti panagsardeng ti sesion iti matuon. Kas idiay Kingdom Hall bayat dagiti gimong, kanayon a liklikantay ti mangan kabayatan dagiti sesion. Iti kasta maipakitatayo ti panagraem iti naespirituan a taraon a maidasar.
23 Iti mabiit mangruginton ti umuna a “Dagiti Mensahero ti Nadiosan a Talna” a Kombension Distrito. Nakaplanokay kadin a tumabuno, ken nakasaganakay kadin a mangtagiragsak iti tallo nga aldaw a naragsak a panaglalangen ken dagiti agkakaimbag a naespirituan a bambanag? Sipapasnek nga ikarkararagmi a bendisionan ni Jehova ti panagreggetyo a tumabuno iti kombension ita a tawen.
[Kahon iti panid 6]
Dagiti Palagip iti Kombension Distrito
Bautismo: Nakatugaw koman dagiti kandidato ti bautismo iti naituding a benneg sakbay a mangrugi ti programa iti agsapa ti Sabado. Napaliiw nga adda dagiti saan a nanakman ken maiparbeng iti okasion ti kawesda. Mangitugot koma ti tunggal maysa nga agpabautisar iti nanakman a pagbabasa ken tualia. Siguraduen koma dagiti panglakayen ti kongregasion a mangirepaso kadagiti saludsod iti libro a Ti Ministeriotayo a maawatan ti tunggal maysa dagitoy a punto. Kalpasan ti palawag iti bautismo ken kararag ti agpalawag, mangted ti tserman ti sesion iti ababa nga instruksion kadagiti kandidato sa iyawisna ti panagkanta. Kalpasan ti maudi nga stanza, iturong dagiti attendant dagiti kandidato iti lugar a pagitaneban. Tangay ti bautismo a simbolo ti dedikasion ket nasinged ken personal a banag iti nagbaetan ti maysa a tao ken ni Jehova, awan ti urnos para iti maaw-awagan pinnaris a bautismo, a dagiti dua wenno ad-adu a kandidato ti bautismo ket agrakep wenno aginniggem iti ima bayat a mabautisaranda.
Dagiti Badge Card: Pangngaasiyo ta ikapetyo ti 1996 badge card iti kombension ken bayat nga agbiahe a mapan ken aggapu iti pagkombensionan. Masansan nga ikkannatay daytoy iti gundaway a mangipaay iti nasayaat a pammaneknek bayat nga agbibiahe. Maala dagiti badge card ken holder babaen ti kongregasion, tangay saan a maala dagitoy iti kombension. Dikay aguray agingga a sumagmamano laengen nga aldaw sakbay ti kombension nga agkiddaw kadagiti kard nga agpaay kadakayo ken iti pamiliayo. Laglagipenyo nga itugot ti agdama nga Advance Medical Directive/Release card-yo.
Boluntario a Serbisio: Tangay awanen ti serbisio iti taraon, adu dagiti dati nga agtartrabaho iti dayta a departamento ti mabalin nga agboluntario iti sabali a trabaho. Makailasinkayo kadi iti tiempo iti kombension a tumulong iti maysa kadagiti departamento? Makatulong ken makapnek unay ti panagserbi kadagiti kakabsattayo, iti uray sumagmamano laeng nga oras. No makatulongkayo, pangngaasiyo ta agreportkayo iti Volunteer Service Department iti kombension. Adda met nasayaat a maitulong dagiti agtutubo a nababbaba ngem 16 ti tawenda babaen ti panagtrabahoda iti sidong ti panangiturong ti naganak kadakuada wenno sabali a responsable a nataengan.
Panamagannad: Nasiputkayo koma kadagiti mabalin a tumaud a problema tapno maliklikan dagiti malapdan koma a parikut. Masansan a biktimaen dagiti mannanakaw dagiti tattao nga adayo iti pagnanaedanda. Siguraduenyo a natulbekan a kanayon dagiti luganyo, ken dikay mangibati iti aniaman a naparang a manggargari iti maysa a sumrek. Naipamaysa ti atension dagiti mannanakaw ken mannipdut iti dadakkel a taripnong. Saan a nainsiriban ti mangibati iti aniaman a napateg a banag iti tugawyo. Diyo masigurado no Kristiano amin nga adda iti aglawlawyo. Apay a mangtedkayo iti pakasulisogan? Adda dagiti naawat a report maipapan iti panaggandat dagiti dadduma a taga-ruar a mangyadayo kadagiti ubbing. SIPUTANYO A KANAYON DAGITI ANNAKYO.