1997 a “Pammati iti Sao ti Dios” a Kombension Distrito

¹ Impalagip ni apostol Pablo ken ni Timoteo nga “amin a Kasuratan impaltiing ti Dios.” (2 Tim. 3:16) Yantangay naipaltiing ti Sao ti Dios, adda naan-anay a rasontayo a mamati iti dayta. Ti tema ti kombension distrito iti daytoy a tawen ket “Pammati iti Sao ti Dios.” Ti programa pabilgenna ti pammatitayo iti Biblia, uray adun a tawen a naammuantay ti kinapudno wenno nabiit pay a nabirokantay ti organisasion ni Jehova. Iyurnostayo koma amin a tabunuan ti intero a programa.

² Tallo nga Aldaw a Kombension: Nayurnos ti tallo nga aldaw a programa ti kombension distrito iti daytoy a tawen a pakagunggonaantayo. Nailista ti 49 a kombension iti Pilipinas iti ngudo daytoy a suplemento. Ammoyo itan ti kombension a tabunuan ti kongregasionyo, ket nakapagplanokayo koman a naimbag tapno matabunuanyo amin ti tallo nga aldaw a programa. Impakadayo kadin dayta iti amoyo tapno makapagbakasionkayo?

³ Mangrugi ti programa iti Biernes ken Sabado iti alas 8:30 t.b. ken alas 9:00 t.b. iti Domingo. Iplanoyo ti nasapa nga ipapanawyo iti pagtaengan tapno makagtengkayo iti pagkombensionan sakbay a mangrugi ti programa.

⁴ Nasayaat no Agimdengkayo: Pinalagipan ni apostol Pedro dagiti Kristiano idi umuna a siglo a paglainganda no agimdengda iti naimpadtuan a sao kas iti pagsilawan nga agsilsilnag iti nasipnget a disso. (2 Ped. 1:19) Pudno met dayta kadatayo. Ti panagbiag iti daytoy daan a lubong nga iturturayan ni Satanas ket mayarig iti kaadda iti nasipnget a disso. Agyamantayo ta naayabantayo manipud iti naespirituan a kinasipnget. (Col. 1:13; 1 Ped. 2:9; 1 Juan 5:19) Tapno makapagtalinaedtayo iti lawag, nasken a taginayonentayo a nabileg ti pammatitayo babaen ti panagimdeng iti naipaltiing a Sao ni Jehova.

⁵ Masapul ti panagreggettayo tapno maipamaysatayo ti agimdeng iti programa ti kombension, ngem sigurado a maparaburantayo no kasta ti aramidentayo. Nakainanatay koman a naimbag a mapan iti pagkombensionan tapno alertotayo kabayatan ti sesion. Pawaywayanyo ti isasangpetyo iti pagkombensionan iti kada aldaw, tapno makatugawkayon sakbay a mangrugi ti programa. Sa makidanggay iti panglukat a kanta ken kararag iti rugi ti programa iti tunggal aldaw. Rumbeng a dagiti nataengan ti mangipakita iti ulidan, ken sanayen koma dagiti nagannak ti annakda.—Efe. 6:4.

⁶ No kitaentayo dagiti paulo ti paspaset sakbay a mangrugi ti programa iti dayta nga aldaw, mabalintay a padaanan no ania dagiti punto a maiparang iti dayta a sesion. Mangparayray daytoy iti interestayo iti material kabayatan ti pannakaiparangna. Naisingasing nga aginotartayo iti ababa a mangtulong kadatayo a manglagip kadagiti kangrunaan a punto ti programa. No adu unay ti isurattayo, mabalin a malibtawantayo dagiti dadduma a kangrunaan a punto gapu ta okupadotayo unay nga agisurat.

⁷ Idi napan a tawen adu manen ti nataengan ken agtutubo a napaliiw nga agpagnapagna kadagiti pasilio, a sumanursor iti ruar, ken pasiar a pasiar kabayatan ti programa, imbes nga imdenganda ti impaay “ti matalek ken masirib nga adipen” a pakagunggonaantayo. Inkari ni Jesus nga ipaayannatayo iti naespirituan a taraon iti umiso a tiempo. (Mat. 24:45-47) Gapuna, masapul a tumabunotayo tapno magunggonaantayo iti dayta a taraon ken maipakitatay ti apresasiontayo. (2 Cor. 6:1) Agparang met a no madukotan ti dadduma nga ubbing, masansan a pagpambarda a makaisboda tapno adda rasonda a tumakder ken agpagnapagna. Makatulong ti nasayaat a pannakasanay iti pagtaengan tapno saanda nga agkaraapan iti kasilias a di met nasken. No dadduma, agkakatugaw nga aggugrupo dagiti natataengan nga agtutubo, nga agsasarita ken agiinnarasaasda. Dagiti agtutubotayo, a maipaspasango ita iti adu a pakarigatan, nasken nga ipamaysada ti agimdeng iti maipapaay a material, a saan a sabali ti ar-aramidenda kabayatan ti programa. Idian koma dagiti inuubingan a tarigagay a di maitunos kadagiti prinsipio ti Biblia. (Idiligyo ti 2 Timoteo 2:22.) Ti kinaatentibotayo amin, nataengan ken agtutubo, idayawna ni Jehova ken mangparagsak kenkuana.

⁸ No adda asinoman a masapul a balakadan ti maysa kadagiti attendant maipapan kadagitoy a banag, maawat koma dayta a kas naayat a probision a naggapu ken Jehova. (Gal. 6:1) Masapul a laglagipentayo amin a ti rason nga ikagumaantayo ti tumabuno iti kombension ket tapno ‘agdengngeg ken agsursuro.’ (Deut. 31:12) Kasta met, “ti masirib a tao dumngeg koma, ket dumegdeg ti pannakasursuro.” (Prov. 1:5) Sakbay a tumabunokayo iti kombension, pagsasaritaanyo a sangapamiliaan a nasken nga agkakatugawkayo nga agdengngeg, nga agtalinaed a situtugaw kabayatan ti programa, ken agimdeng a naimbag, tapno naan-anay a magunggonaan iti programa.

⁹ Panagkawkawes a Makaay-ayo ken Jehova: Sipapanayag ti ili ni Jehova a buyaen ti intero a lubong. (1 Cor. 4:9) Iti pakabuklanna agdindinamagtayo gapu iti nasayaat nga estandartetayo iti panagkawkawes ken panaglanglanga. Ti panangyaplikar kadagiti Nainkasuratan a prinsipio a masarakan iti 1 Timoteo 2:9, 10 ken iti 1 Pedro 3:3, 4 nagresulta iti dakkel a panagbalbaliw iti langa dagiti adu no idilig iti itsurada idi mangrugida a makitimpuyog iti kongregasion Kristiano. Kayattayo ti agannad a ditay koma tultuladen ti lubong iti panaglanglangatayo—a ditay agusar iti karkarna a kawes, ditay itandudo dagiti nailubongan nga uso iti panagbubuok, wenno di natakneng a panagkawkawes. Ti mapagulidanan a panagkawkawes ken panaglanglangatayo isu koma ti mangtulong kadagiti kabbaro nga adda iti kombension tapno makitada no ania ti maiparbeng a panagkawes dagiti Kristiano.

¹⁰ Nupay nakasaysayaat ti kaaduan nga impresion nga imbunga dagiti kombension idi napan a tawen, adda pay laeng parikut iti sumagmamano a kakabsat maipapan iti nailubongan a panagkawkawes ken panaglanglanga, nangnangruna iti tiempo ti panagaliwaksay. Nagannak, kitaenyo a naimbag no ania ti pagbado dagiti ubbing ken tin-edyer nga annakyo. Siguraduentayo a ditay itulok a maimpluensiaan ti Nakristianuan a langatayo kadagiti nailubongan nga estilo ken uso.

¹¹ Taginayonenyo ti Nasayaat a Kababalin: Ti nasayaat a kababalin ket pakailasinan dagiti pudno a Kristiano. (1 Ped. 2:12) Ti kababalintayo iti sadinoman—iti kombension, kadagiti restawran, ken kadagiti pagdagusantayo, kasta met no agbibiahetayo—makaipaay iti nasayaat a pammaneknek ken mabalin a matignayna ti dadduma a mangammo ken Jehova. (Idiligyo ti 1 Pedro 3:1, 2.) Pribilehiotayo nga ipadayag ti Dios babaen iti kababalintayo. No mangngegtayo ti nasasayaat a report maipapan iti kababalintayo, maragsakantayo, di ngamin? Nupay kasta, nasken nga alertotayo a kanayon tapno mataginayontayo ti nasayaat a pakasarsaritaan ti ili ni Jehova.

¹² Adun ti naipaay a palagip maipapan iti panangaywan kadagiti annaktayo, a ditay palubosan nga agtaraytarayda kadagiti kalsada iti lawlaw ti pagkombensionan, a makaisturbo kadagiti sabsabali. Nupay adda gundawaytayo a sumarungkar ken makitimpuyog kadagiti kakabsattayo kadagiti kombension, kaskasdi a masapul a laglagipen dagiti nagannak ti annongenda a mangaywan kadagiti annakda iti amin a tiempo. Responsabilidad daytoy nga inted ni Jehova iti tunggal naganak. (Prov. 1:8; Efe. 6:4) Ti di panangsiput iti tigtignay dagiti annak mabalin a dadaelenna ti nasayaat a pakasarsaritaan a nagrigrigatan nga impasdek ti sabsabali a Saksi ni Jehova.—Prov. 29:15.

¹³ Laglagipenyo nga umiso ti mangted iti tip kadagiti restawran no personal a pagserbiandatayo dagiti serbidor. Kas Saksi ni Jehova, kayattay met nga ipakita ti nasayaat a kababalin iti daytoy a banag.—Kitaenyo ti Awake! a Hunio 22, 1986, panid 24-7.

¹⁴ Pananglitup Kadagiti Paggastuan iti Kombension: Aggastotayo amin iti itatabunotay kadagiti kombension. Adda pay sabali a paggastuan a masapul a panunotentayo. Nangina dagiti pasilidad a mausar kadagiti kombension, nangnangruna kadagiti dadakkel a siudad. Adda pay sabsabali a paggastuan a masapul a maasikaso. Maapresiar unay ti nabuslon a boluntario a kontribusiontayo.—Ara. 20:35; 2 Cor. 9:7, 11, 13.

¹⁵ Pagtugawan: Agtultuloy nga agaplikar ti instruksion a naipaay iti adun a tawen, nga isu daytoy, MABALIN NGA IRESERBA DAGITI PAGTUGAWAN KADAGITI LAENG MIEMBRO TI PAMILIAYO KEN ASINOMAN A KADUAYO NGA AGBIAHE ITI LUGANYO. Nagsayaat a makita nga umad-adu ti mangsursurot kadagitoy nga instruksion kadagiti kallabes a tawen, ket daytoy ti nangparayray iti naayat a panaglalangen kadagiti kombension. Iti kaaduan a pagkombensionan adda dagiti pagtugawan nga ad-adda a kombeniente ngem iti dadduma. Pangngaasiyo ta ipakitayo ti konsiderasion, ket ireserbayo dagiti ad-adda a kombeniente a pagtugawan kadagidiay nataengan wenno masakit.

¹⁶ Dagiti Camera, Camcorder, ken Audiocassette Recorder: Maipalubos ti agusar kadagiti camera ken alikamen a pagirekord kadagiti kombension. Nupay kasta, ti panagusartayo kadagitoy ket saan koma a makasinga kadagiti sabsabali a timmabuno. Saantayo koma nga agpagnapagna a mangretrato kabayatan ti sesion, yantangay makaisturbo dayta iti sabsabali a mangikagkagumaan nga agimdeng iti programa. Awan ti aniaman nga alikamen a pagirekord a maikonekta iti electrical wenno sound system, ken saan met koma a makasali dagitoy nga alikamen kadagiti pagnaan, wenno makalinged iti dadduma.

¹⁷ First Aid: Ti First Aid Department ket para laeng kadagiti emerhensia. Dina maasikaso dagiti nakaro ti sakitda. Dayta ti gapuna nga amirisenyo koma a nasaksakbay ti kasapulan ti salun-atyo ken ti pamiliayo. Pangngaasiyo ta mangitugotkayo iti bukodyo nga aspirin, agas iti tian, benda, safety pins, ken umasping a bambanag, yantangay awan kakasta idiay pagkombensionan. Siasinoman nga addaan iti sakit a mabalin a kellaat nga agatake, addaan iti sakit ti puso, ken dadduma pay, rumbeng nga isaganadan amin a mapanunotda a kasapulanda. Nakasagana koman dagiti masapulda nga agas, ken kanayon koma nga adda mangkadua kadakuada a kabagian wenno kakongregasionda a makatarus iti kasasaadda a sisasagana a tumulong. No ti sumagmamano nga addaan iti naisangsangayan a panagkasapulan gapu iti salun-at ket awan kabagianda a makatulong kadakuada, masapul a mangyurnos dagiti panglakayen iti kongregasionda kadagiti nasken a tulong. Awan maisagana a kuarto kadagiti kombension para kadagiti naisangsangayan a pagyanan dagidiay addaan allergy.

¹⁸ Taraon iti Kombension: Ti kaawan ti maiserbi a taraon kadagiti kombension nagresulta iti ad-adu pay a makatabuno kadagiti amin a sesion ken maipamaysada ti panunotda iti naespirituan a taraon. Adun ti naawat nga ebkas ti panangapresiar iti daytoy a panangpasimple sipud pay idi nairugi daytoy nga urnos. Iplano koma dagiti amin nga agbalonda iti pangngaldawda, a surotenda dagiti naisingasing iti suplemento ti Mayo 1995 a Ministeriotayo iti Pagarian, parapo 11-14. Awan koma ti maitugot a mabuong a pagkargaan ken naingel nga inumen iti pagkombensionan. Babassit laeng koma dagiti pagipalamiisan iti taraon tapno di makasali kadagiti pagnaan ken saan koma a maiparabaw kadagiti pagtugawan. Napaliiw a mangmangan ken umin-inum dagiti dadduma kabayatan ti programa. Ti kastoy nga aramid ket kinaawan panagraem. Kadagiti lugar nga adda aglaklako iti ruar ti pagkombensionan, napaliiw nga aggatang dagiti dadduma a kakabsat kadagitoy a paglakuan kabayatan ti programa. Saan nga umiso ti kasta nga aramid.

¹⁹ Pudno nga apresiarentayo ti naespirituan a piestatayo ken ti natalinaay, natalna a panaglalangen kabayatan ti ababa a panaginana iti aldaw. Mayannurot iti nakairantaan daytoy nga urnos, imbes a pumanaw iti pagkombensionan iti aldaw tapno gumatang iti taraon, pangngaasiyo ta agbalonkayon. Iti kasta, ad-adu ti panawenyo a mangtagiragsak iti pannakilangen dagiti kakabsatyo.

²⁰ Panagnegosio: Saan a maiparbeng a gundawayan ti asinoman a kabsat ti ayan ti adu a tattao babaen ti panaglako kadagiti bambanag a kas iti akkub ti libro wenno T-shirt, paypay, ken kalendario a nasuratan iti tema ti kombension. Ti pagkombensionan ket agbalin a dakkel a Kingdom Hall a saan a mabalin a pagnegosiuan.

²¹ Anian a ragsaktayo ta din agbayag mangruginton ti “Pammati iti Sao ti Dios” a Kombension Distrito! Kayattayo amin a siguraduen a nakasaganatayon a tumabuno iti intero a programa, tapno matagiragsaktayo a naan-anay ti nagsayaat a naespirituan a padaya nga insagana ni Jehova kadatayo babaen iti organisasionna. Iti kasta agbalintayo a “naan-anay a nakabalan maipaay iti tunggal naimbag nga aramid” kadagiti masanguanan nga aldaw.—2 Tim. 3:17.

[Kahon iti panid 6]

Dagiti Palagip iti Kombension Distrito

Bautismo: Nakatugaw koman dagiti kandidato ti bautismo iti naituding a benneg sakbay a mangrugi ti programa iti agsapa ti Sabado. Mangitugot koma ti tunggal maysa nga agpalplano nga agpabautisar iti nanakman a pagbabasa ken tualia. Siguraduen koma dagiti panglakayen a mangirepaso kadagiti saludsod iti libro a Ti Ministeriotayo kadagiti kandidato iti bautismo a maawatan ti tunggal maysa dagitoy a punto. Ti bautismo a simbolo ti dedikasion ket nasinged ken personal a banag iti nagbaetan ti indibidual ken ni Jehova. Gapuna, di maiparbeng nga agrinnakep wenno aginniggem iti ima dagiti kandidato bayat a mabautisaranda.

Dagiti Badge Card: Pangngaasiyo ta ikapetyo a kanayon ti 1997 a badge card bayat nga addakayo iti pagkombensionan ken bayat nga agbiahe a mapan ken aggapu sadiay. Mangalakayo koman kadagiti badge card ken holder iti kongregasionyo, tangay saan a maala dagitoy iti kombension. Laglagipenyo nga itugot ti agdama nga Advance Medical Directive/Release card-yo.

Boluntario a Serbisio: Mabalinyo kadi ti mangilasin iti tiempo iti kombension a tumulong iti maysa kadagiti departamento? No makatulongkayo, pangngaasiyo ta agreportkayo iti Volunteer Service Department iti kombension. Adda met maitulong dagiti agtutubo a nababbaba ngem 16 ti tawenda babaen ti panagtrabahoda iti sidong ti panangiwanwan ti nagannak kadakuada wenno sabali pay a responsable a nataengan.

Panamagannad: Nasiputkayo koma kadagiti mabalin a tumaud a problema tapno maliklikan dagiti di nesesita a parikut. Masansan a biktimaen dagiti mannanakaw dagiti tattao nga adayo iti pagnanaedanda. Siguraduenyo a natulbekan a kanayon dagiti luganyo, ken dikay mangibati iti aniaman a naparang a manggargari iti agtatakaw. Saan a nainsiriban ti mangibati iti aniaman a napateg a banag iti tugawyo. Diyo masigurado no Kristiano amin nga adda iti aglawlawyo. Apay a mangtedkayo iti pakasulisogan? Adda dagiti naawat a report maipapan iti panaggandat dagiti dadduma a taga ruar a mangyadayo kadagiti ubbing. SIPUTANYO A KANAYON DAGITI ANNAKYO.