Maysa nga Okasion a Panganan iti Naespirituan ken Pagrag-oan

1. Kasano nga ipapaay ni Jehova ti naespirituan a kasapulan dagiti adipenna?

¹ Sidudungngo nga ipapaay ni Jehova dagiti naespirituan a kasapulan dagiti adipenna. Talaga a mabmabsogtayo iti naespirituan idinto ta mabisbisin ti kaaduan ditoy lubong. (Isa. 65:13) Ti maysa a pamay-an ti panangpakan kadatayo ni Jehova iti naespirituan ket babaen dagiti tinawen a kombension distritotayo. Rugrugianyo kadin ti agsagana tapno matabunuanyo ti amin a sesion iti umad-adanin nga “Agpaidalankayo iti Espiritu ti Dios” a Kombension Distrito? Adda nananam ken makapasalun-at a taraon a naisagana iti dayta a naespirituan a padaya.

2. Ania ti ramanen ti nasakbay a panagsagana para iti kombension?

² Nasakbay a Panagsagana: “Dagiti gakat daydiay nasaet sigurado a mangipaay iti pagsayaatan.” (Prov. 21:5) Gapuna, tapno sigurado a matabunuanyo ti tallo nga aldaw a kombension, ipakadayo a nasaksakbay iti amoyo nga agbakasionkayto inton panawen ti kombension. No kasapulanyo ti pagdagusan, nayurnos kadin dayta? Nasayaat no agbalonkayto met tapno makalangenyo dagiti kakabsat idiay pagkombensionan bayat ti pangngaldaw. Ikagumaanyo ti sumangpet a nasapa iti tunggal aldaw tapno makasapulkayo iti pagtugawanyo ken tapno addakayton iti panglukat a kanta ken kararag.

3. Ania a kita ti kawes ti rumbeng nga usarentayo?

³ Siguraduentayo a natakneng ken nadalimanek dagiti kawestayo. (1 Tim. 2:9, 10) Dagiti kombension distrito ket nagsayaat a gundaway tapno makaipaaytayo iti panangsaksi iti komunidad. No taginayonentayo ti nadayaw a panaglanglanga bayat ti kaaddatayo iti lugar a pagkombensionan ken no usarentayo dagiti badge card-tayo, agbalintayo a naiduma kadagiti saan a manamati ken makaipaaytayo iti nasayaat a pakasarsaritaan kadagidiay agpalpaliiw.

4. Ania ti makatulong tapno datayo ken ti pamiliatayo ket magunggonaan iti programa?

⁴ Agimdeng a Naimbag: Sigurado a ditay kayat ti maikapis iti uray murkat laeng manipud kadagiti naidasar a naespirituan a taraon! (Prov. 22:17, 18) Isu a tapno saan nga agalla-alla ti panunottayo bayat ti programa, surotentayo iti Bibliatayo ti pannakaibasa dagiti teksto ken aginotartayo. Sa iti rabii, mabalintay a repasuen ken pagsasaritaan dagiti kangrunaan a punto a nainotartayo. Kadagiti kallabes a tawen, napaliiw nga adda dagiti agtutubo nga agkakatugaw ken agtutungtong wenno agte-text kabayatan ti programa. No adda annaktayo, a pakairamanan dagiti agtutubo, mabalin a makagunggona no agkakatugawtayo ken dumngegtayo iti programa kas maysa a pamilia imbes a bay-antayo lattan dagiti agtutubo a makikatugaw kadagiti kapatadada.

5. Kasanotay a matagiragsak nga ad-adda ti kombension?

⁵ Tagiragsakenyo ti Panaglalangen: Ad-adda a matagiragsaktayo ti naimas a taraon no kaduatayo dagiti gagayyemtayo. (Prov. 15:17) Umasping iti dayta, ti pannakilangentayo kadagiti kakabsat parayrayenna ti rag-otayo a makikombension. Ngarud, no malpas ti kada sesion, anian a makaparagsak no datayo ti umun-una nga umasideg ken makitungtong kadagiti kakabsat ket tagiragsakentayo ti makilangen kadakuada! (Sal. 133:1) No ibaga ti tserman nga agtugawtayon sakbay a mangrugi ti musika, isardengtayon ti agsasarita ket agsimpatayon iti pagtugawantayo sakbay a mangrugi ti programa.

6. Mangisalaysaykayo iti kapadasanyo a mangipakita no kasano a maaddaantayo iti gundaway a mangasaba kadagiti tattao iti lugar a pagkombensionan.

⁶ Alerto a Mangasaba: Dagiti kombension ket kaaduanna a mangipaay kadatayo iti adu a gundaway tapno mangasaba. Adu kadagiti delegado ti napan kadagiti restawran kalpasan ti programa ket pinagsaludsodan ida dagiti serbidor ken dagiti dadduma maipapan iti tema ti kombension a nakasurat iti badge card-da. Daytoy ti nangiruangan iti panagsasarita ken nakaipaay iti nasayaat a panangsaksi iti kinapudno. Dadduma kadagidiay nagsaludsod ti naimbitaran iti kombension ket talaga a timmabunoda.

7. Apay a rumbeng a tabunuantayo ti umad-adanin a kombension distrito?

⁷ Adu a panawen ti nabusbos iti panangisagana iti programa, panangyurnos kadagiti pasilidad a mausar, panangorganisar kadagiti departamento iti kombension, ken panangisagana kadagiti paset. Amin a naayat a panagbannog para iti pannakaisagana ti naespirituan a padayatayo iparangarangna ti nadungngo a panangaywan ni Jehova iti ilina. Sapay koma ta addatayto amin sadiay ket agpennektayo a mangsagrap kadagiti taraon a naidasar! No kasta ti aramidentayo, ‘agdir-itayto a sirarag-o gapu iti nasayaat a kasasaad ti pusotayo,’ banag a saan a mapaspasaran dagiti tattao iti lubong.—Isa. 65:14.

[Kahon iti panid 5]

Dagiti Palagip Maipapan iti Kombension Distrito

◼ Oras ti Programa: Mangrugi iti 8:20 ti agsapa ti programa iti Biernes ken Sabado ken 8:50 ti agsapa iti Domingo. No maipatokaren ti panglukat a musika, masapul a nakatugawtayo aminen tapno mangrugi ti programa iti nadayaw a pamay-an. Agngudo ti programa iti 3:55 ti malem iti Biernes ken Sabado ken 4:00 ti malem iti Domingo.

◼ Paradaan: Kadagiti amin a pagkombensionan nga addaan iti natalged a pagparadaan, maipaay a libre dagiti espasio. Dagiti umuna a makasangpet ti umuna a makapagparada. Dagiti badge card iti kombension ti agserbi a pakabigbigan para iti panagparada.

◼ Panangireserba Kadagiti Pagtugawan: Mabalin nga ireserba dagiti pagtugawan kadagiti laeng kaduayo a nagbiahe iti luganyo wenno kadagiti kabbalayyo.

◼ Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a pagkargaan iti taraon, mabuong a pagkargaan, ken dagiti naingel nga inumen.

◼ Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti kombension. Aniaman a tseke a maidonar iti kombension ket masapul a maipanagan iti “Watch Tower.”

◼ Aksidente ken Emerhensia: No adda emerhensia iti pagkombensionan, pangngaasiyo ta makiumankayo iti paraasistir (attendant) nga adda iti asideg, a mangipakaammo a dagus iti Emerhensia a Pagpaagasan (First Aid) tapno ti kualipikado nga agas-asikaso iti emerhensia a pagpaagasan iti pagkombensionan kitaenna no nakaro ti situasion ken mangipaay iti tulong. No kasapulan, ti agas-asikaso iti emerhensia a pagpaagasan ti umawag iti kaasitgan nga ospital.

◼ Panagirekord: Aniaman nga alikamen a pagirekord ket saan a mabalin nga ikonektar iti koriente wenno iti alikamen a pangpapigsa iti timek iti pasilidad ken mausar laeng dagita iti pamay-an a saan a makasinga kadagiti sabsabali.

◼ Panagretrato: No agretratokayo kabayatan dagiti sesion, saankayo nga agusar iti flash.

◼ Pager ken Cellphone: Saan koma a makasinga dagitoy kabayatan dagiti sesion.

◼ Dagiti Porma a Follow-Up: Masapul a masuratan ti porma a Please Follow Up (S-43) iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Mangitugot koma dagiti agibumbunannag iti maysa wenno dua a kopia ti porma a follow-up bayat ti kombension. Dagiti nasuratan a porma ket mabalin nga ited iti Pagalaan iti Libro (Book Room) wenno iti sekretario ti kongregasionyo apaman a makasublikayo iti kongregasionyo.—Kitaenyo ti Pebrero 2005 a Ti Ministeriotayo iti Pagarian, p. 6.

◼ Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Iti adu a lugar, gagangay a mangtedda iti 15 agingga iti 20 porsiento a tip, depende iti serbisio a maipaay kadakuada.

◼ Dagiti Badge Card: Pangngaasiyo ta usarenyo dagiti badge card-yo bayat nga addakayo iti pagkombensionan wenno bayat ti panagbiaheyo nga agpapan agawid. Dagiti badge card ket maala laeng iti kongregasionyo. Saanyo nga itungtungkua ti mangala iti badge card nga agpaay kadakayo ken iti pamiliayo.

◼ Bautismo: Nakatugaw koman dagiti kandidato ti bautismo iti naituding a pagtugawanda sakbay a mangrugi ti programa ti kombension iti bigat ti Sabado. Mangitugotda koma iti disente a pagbabasa ken tualia. Tapno masigurado a maitutop ti kawes dagiti mabautisaran agpaay iti daytoy nga okasion, masapul nga ilawlawag daytoy dagiti panglakayen a natudingan a mangirepaso kadagiti saludsod iti libro nga Organisado.