Nakasaganakayo Kadin Para iti Naespirituan a Padaya?

1. Ania a panagsagana ti nairaman para iti padaya?

¹ Ti padaya kalikagumanna ti dakkel a panagsagana. Masapul ti gumatang kadagiti maluto a taraon a matimpla a naimbag, sa maidasar. Nasken nga organisado ti pannakaidiaya dagiti taraon. Malaksid iti dayta, masapul a maisagana ti lugar a pakaangayan ti padaya. Agsagana met dagiti sangaili nangruna no adayo ti paggapuanda. Nupay dakkel a trabaho ti panagsagana, makagunggona unay dayta gapu ta tagiragsakentayo dagiti naimas ken nasustansia a taraon a kadua ti pamilia ken gagayyemtayo. Iti mabiit, agtataripnongto dagiti Saksi ni Jehova iti Pilipinas kadagiti dadakkel ken babassit a grupo tapno tagiragsakenda ti masegseggaan unay a naespirituan a padaya—ti “Agtultuloykayo nga Agbantay!” a Kombension Distrito. Adun a trabaho ti naaramid para iti pannakaisagana ken pannakaiparang dagiti programa. Naawistayo amin. Tapno matabunuan ken magunggonaantayo a naimbag, masapul nga agsaganatayo met a personal.—Prov. 21:5.

2. Ania ti kasapulan tapno matagiragsakyo amin a putahe a maidasar iti naespirituan a padaya?

² Ikagumaanyo ti Magunggonaan a Naimbag: Nakaaramidkayo kadin iti plano tapno matagiragsakyo amin a putahe a maidasar iti naespirituan a padaya? No kasapulan, makisaritakayo iti amoyo tapno ibagayo a tabunuanyo amin a sesion ti kombension, agraman ti umuna nga aldaw. Nayurnosyo kadin ti pagluganan ken pagdagusanyo? Siguraduen koma dagiti panglakayen a maasikaso dagiti lallakay ken babbaket, addaan an-anayen, ken dadduma pay a mabalin nga agkasapulan iti tulong.—Jer. 23:4; Gal. 6:10.

3. Apay a saan a maiparegta a tabunuantayo ti kombension distrito a saan a nakaitudingan ti kongregasiontayo?

³ Laglagipenyo nga adda dagiti espesipiko a kongregasion a naituding iti tunggal kombension distrito. Iti panangaramid kadagitoy nga urnos, siaannad a kinuenta ti sanga nga opisina no kasano kaadu ti maawis, maibatay iti bilang ti pagtugawan kadagiti pagkombensionan. Aglilinnetletton ti tattao no tumabuno pay dagiti agibumbunannag iti kombension a saan a nakaitudingan ti kongregasionda.

4. Aniada a pammalagip ti tumulong kadatayo nga agsagana iti panangrugi ti programa iti kada aldaw?

⁴ Sapaenyo ti sumangpet iti pagkombensionan iti kada aldaw tapno makabirokkayo iti pagtugawanyo sakbay a mangrugi ti programa. Repasuenyo ti nayimprenta a programa bayat a saan pay a nangrugi ti sesion. Tumulong daytoy kadakayo a mangisagana iti pusoyo a mangipamaysa kadagiti maidatag nga impormasion. (Esd. 7:10) No ibaga ti tserman ti sesion a maipatokaren ti panglukat a musika, tagiragsakenyo nga imdengan dagita ket agsaganakayon para iti panglukat a kanta ken kararag.

5. Ania ti mabalinyo nga aramiden tapno magunggonaan a naimbag ti pamiliayo iti programa?

⁵ No agkakatugaw dagiti miembro ti pamilia kabayatan ti kombension, masigurado dagiti nagannak nga agimdeng a naimbag dagiti annakda. (Deut. 31:12) Maiparegta kadatayo amin a surotentayo ti pannakaibasa dagiti teksto iti Bibliatayo. Makatulong ti panaginotar tapno maipamaysayo ti atensionyo. Matulongannakayto dagiti notayo iti pananglagip kadagiti kangrunaan a punto dagiti palawag. Liklikanyo ti makitungtong wenno pumanaw iti pagtugawanyo kabayatan ti sesion no awan ti napateg a makagapu. No adda selponyo, saanyo nga ipalubos a singaennakayo dayta wenno dagiti sabsabali kabayatan ti programa. Kalpasan ti tunggal sesion, apay a diyo pagsasaritaan dagiti nagustuanyo iti programa?

6. Ania ti naisangsangayan nga aspeto dagiti kombensiontayo, ken kasanotayo a matagiragsak dayta a naan-anay?

⁶ Kadagiti kombension distrito, matagiragsaktayo ti nasinged a relasion kadagiti kakabsattayo iti pammati, banag nga awan iti lubong. (Sal. 133:1-3; Mar. 10:29, 30) Apay a diyo ikagumaan ti makiam-ammo ken makipatang kadagiti adda iti asidegyo kabayatan ti pangngaldaw? Daytoy ti pagsayaatan ti panagbalon iti simple a pangaldaw ken panagtalinaed iti pagkombensionan imbes a mangngaldawkayo iti restawran. Siguraduenyo a dikay maikapis iti kasta a gundaway a panagsisinnukat iti pammaregta.—Roma 1:11, 12.

7. Ania dagiti masapul nga ikabilangantayo kas panagsagana iti ikawestayo?

⁷ Panagkawkawes: Nalawag a binilin ni Jehova dagiti Israelita a mangaramid iti nabarayubayan a pingir kadagiti pandiling ti kawkawesda, nga addaan asul a linas iti ngatuen ti barayubay. (Num. 15:37-41) Daytoy ti makita a pammalagip nga isuda ket ili a naisina para iti panagdayaw ken Jehova. Ita, ti nadalimanek, nanakman a kawestayo a makikombension idumanatayo iti lubong. Agserbi dayta kas nabileg a pammaneknek kadagiti tattao uray no mapantay mangan iti restawran kalpasan ti programa. Gapuna, panunotenyo a naimbag ti maitutop nga ikawesyo.

8. Kasanotayo a makasabaan dagiti sabsabali bayat nga addatayo iti lugar a pakaangayan ti kombension?

⁸ Mangipaay iti Panangsaksi: No nakasaganatayo iti uray apagbiit, mabalin a makasabaantayo dagiti tattao iti lugar a pakaangayan ti kombension. Kalpasan ti programa, adda maysa a kabsat a napan iti restawran a kaduana ni baketna ket sinaludsodanna ti serbidor bayat nga intudona ti badge card-na: “Adu kadin ti nakitam a nakasuot iti kastoy a badge?” Kinuna ti serbidor a napaliiwna ida ken masmasdaaw no apay nga agpapadada amin iti badge. Nangiturong daytoy iti saritaan, ket ti kabsat inawisna ti serbidor a tumabuno iti kombension.

9. Kasanotayo a maipakita ti apresasiontayo iti Mangsangaili kadatayo a ni Jehova?

⁹ Nupay dagiti kakabsat ti mangidatag kadagiti palawag, interbiu, ken demostrasion, ti nailangitan nga Amatayo ti siaayat a nangipaay iti daytoy a tinawen a padaya. (Isa. 65:13, 14) Maipakitatayo ti apresasiontayo iti daydiay Mangsangaili kadatayo no tumabunotayo iti tunggal aldaw ken awan ti sayangentayo nga uray murkat laeng kadagiti maidasar a naespirituan a taraon. Nakaaramidkayo kadin kadagiti masnup a plano?

[Kahon iti panid 5]

Dagiti Palagip Maipapan iti Kombension Distrito

◼ Oras ti Programa: Mangrugi iti 8:20 ti agsapa ti programa iti Biernes ken Sabado ken 8:50 ti agsapa iti Domingo. No maipatokaren ti panglukat a musika, masapul a nakatugawtayo aminen tapno mangrugi ti programa iti nadayaw a pamay-an. Agngudo ti programa iti 3:55 ti malem iti Biernes ken Sabado ken 4:00 ti malem iti Domingo.

◼ Paradaan: Kadagiti amin a pagkombensionan nga addaan iti natalged a pagparadaan, maipaay a libre dagiti espasio. Dagiti umuna a makasangpet ti umuna a makapagparada. Yantangay gagangay a limitado dagiti espasio, agkakalugankayo koma laengen aginggat’ mabalin.

◼ Panangireserba Kadagiti Pagtugawan: Mabalin nga ireserba dagiti pagtugawan kadagiti laeng kaduayo a nagbiahe iti luganyo wenno kadagiti kabbalayyo.

◼ Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a a cooler ken mabuong a pagkargaan.

◼ Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti kombension. Aniaman a tseke a maidonar iti kombension ket masapul a maipanagan iti “Watch Tower.”

◼ Aksidente ken Emerhensia: No adda emerhensia iti pagkombensionan, pangngaasiyo ta makiumankayo iti paraasistir (attendant) nga adda iti asideg, a mangipakaammo a dagus iti Emerhensia a Pagpaagasan (First Aid) tapno ti kualipikado nga agas-asikaso iti emerhensia a pagpaagasan iti pagkombensionan kitaenna no nakaro ti situasion ken mangipaay iti tulong. No kasapulan, ti agas-asikaso iti emerhensia a pagpaagasan ti umawag iti kaasitgan nga ospital.

◼ Dagiti Adda Depekto ti Panagdengngegna: Iti dadduma a kombension, maibrodkas ti programa iti aglawlaw ti kombension babaen ti FM radio frequency. Tapno magunggonaankayo iti daytoy a probision, nasken a mangitugotkayo iti bassit nga FM receiver nga addaan iti earphone.

◼ Panagirekord: Aniaman nga alikamen a pagirekord ket saan a mabalin nga ikonektar iti koriente wenno iti alikamen a pangpapigsa iti timek iti pasilidad ken mausar laeng dagita iti pamay-an a saan a makasinga kadagiti sabsabali.

◼ Panagretrato: No agretratokayo kabayatan dagiti sesion, saankayo nga agusar iti flash wenno lingdan dagiti sabsabali a dumdumngeg iti programa.

◼ Pager ken Selpon: Saan koma a makasinga dagitoy kabayatan dagiti sesion ti kombension.

◼ Dagiti Porma a Follow-Up: Masapul a masuratan ti porma a Please Follow Up (S-43) iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Mangitugot koma dagiti agibumbunannag iti maysa wenno dua a kopia ti porma a follow-up bayat ti kombension. Dagiti nasuratan a porma ket mabalin nga ited iti Pagalaan iti Libro (Book Room) wenno iti sekretario ti kongregasionyo apaman a makasublikayo iti kongregasionyo.—Kitaenyo ti Pebrero 2005 a Ti Ministeriotayo iti Pagarian, p. 6.

◼ Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Iti adu a lugar, gagangay a mangtedda iti 10 porsiento a tip, depende iti serbisio a maipaay kadakuada.

◼ Dagiti Badge Card: Pangngaasiyo ta usarenyo dagiti badge card-yo bayat nga addakayo iti pagkombensionan wenno bayat ti panagbiaheyo nga agpapan agawid. Dagiti badge card ket maala laeng iti kongregasionyo. Saanyo nga itungtungkua ti mangala iti badge card nga agpaay kadakayo ken iti pamiliayo.

◼ Bautismo: Nakatugaw koman dagiti kandidato ti bautismo iti naituding a pagtugawanda sakbay a mangrugi ti programa ti kombension iti bigat ti Sabado. Mangitugotda koma iti disente a pagbabasa ken tualia. Tapno masigurado a maitutop ti kawes dagiti mabautisaran agpaay iti daytoy nga okasion, masapul nga ilawlawag daytoy dagiti panglakayen a natudingan a mangirepaso kadagiti saludsod iti libro nga Organisado.

◼ Kondukta a Pakaidayawan ti Dios: No ipakpakitatayo ti bunga ti espiritu, an-annadantayo ti panagsasao ken kababalintayo iti pannakilangentayo kadagiti tattao a makapulapoltayo kadagiti restawran, hotel, wenno kadagiti makaluganantayo, ad-adda a sumayaat ti pakasarsaritaan dagiti adipen ni Jehova ken saantayo a maitibkol dagiti sabsabali. (1 Cor. 10:31; 2 Cor. 6:3, 4) Sapay koma ta ti itatabunoyo ken ti kababalinyo ket pakaidayawan ti Dios kadagiti kasta a wagas iti 2009 a Kombension Distrito!—1 Ped. 2:12.