Dagiti Kombension Distrito—Tiempo Para iti Naragsak a Panagdaydayaw
1. Ania ti pagpadaan ti piesta ti Israel ken dagiti kombension distritotayo ita?
1 Regular a napan idiay Jerusalem ni Jose, Maria, dagiti annakda, ken dagiti dadduma tapno tabunuanda ti tinawen a piesta. Kadagidi a gundaway, isuda ken dagiti dadduma nga agdaydayaw binay-anda pay laeng dagiti inaldaw a pakaseknanda ket impamaysada ti ad-adda a napateg iti biagda—ti naespirituan a banag. Nangipaay ti piesta iti gundaway tapno utoben ken pagsasaritaanda ti kinaimbag ni Jehova ken tapno usigenda ti Lintegna. Ti mapaspasungad a kombension distrito ipaayannatayo met iti kasta a gundaway para iti naragsak a panagdaydayaw ken Jehova.
2. Ania dagiti rumbeng nga aramidentayo tapno makatabunotayo iti mapaspasungad a kombension distrito?
2 Nasken ti Panagsagana: Iti panagdaliasatda manipud Nazaret, magmagna ti pamilia ni Jesus iti agarup 200 kilometro nga agpapan agawid. Nupay saantayo nga ammo no mano ti kakabsat ni Jesus, ammotayo a dakkel a panagsagana ken panagregget ti inaramid da Jose ken Maria. Naisaganayo kadin dagiti nasken nga aramidenyo tapno matabunuanyo ti mapaspasungad a tallo nga aldaw a kombension distrito? Mabalin nga agkalikagum daytoy iti panagbakasionyo iti trabaho wenno panagpakadayo iti amoyo wenno kasaritayo ti mannursuro nga aglangan pay laeng ti anakyo kadagita nga aldaw. Mabalinyo kadi a tulongan ti siasinoman a kakongregasionyo nga agkasapulan iti tulong tapno makatabuno iti kombension?—1 Juan 3:17, 18.
3. Kasano a dagiti piesta ti Israel ket nangipaay iti gundaway para iti makapabileg a panaglalangen?
3 Makapabileg a Panaglalangen: Dagiti piesta dagiti Judio ket nangipaay idi iti nagsayaat a gundaway tapno matagiragsak dagiti agdaydayaw iti Dios ti makapabileg a panaglalangen! Awan duadua a sinegseggaan ti pamilia ni Jesus a makita manen dagiti nabayagen a gagayyemda. Tinagiragsakda met ti oportunidad a makigayyem kadagiti timmabuno a Judio ken proselita ken kadagiti kakaduada a nagdaliasat a mapan ken agawid manipud Jerusalem.
4. Kasanotayo a maipakita a ditay tagtagilag-anen ti nagkaykaysa a Nakristianuan a panagkakabsattayo?
4 Ti maysa a rason no apay nga inyurnos ti matalek ken masirib nga adipen nga agtataripnongtayo iti kombension distrito a dumngeg kadagiti palawag imbes nga iyimprentada dagita ket tapno makapagpipinnaregtatayo. (Heb. 10:24, 25) Gapuna, ikagumaantayo ti sumangpet a nasapa iti pagkombensionan tapno makalangentayo dagiti kakabsat sakbay nga iyanunsio ti tserman ti sesion a mangrugin ti musika a mangipasimudaag nga agsimpatayon kadagiti pagtugawantayo. Imbes a mapantayo mangan iti ruar kabayatan ti pangngaldaw, maiparegta nga agbalontayo iti simple a pangaldaw tapno saantayon a pumanaw iti pagkombensionan iti kasta, maam-ammo ken makasaritatayo dagiti kakabsat. Ti nagkaykaysa a Nakristianuan a panagkakabsattayo ket sagut manipud ken Jehova a ditay koma pulos tagtagilag-anen.—Mik. 2:12.
5. Ania ti makatulong kadatayo tapno naan-anay a magunggonaantayo iti programa?
5 Tiempo ti Panagsursuro: Manipud kinaubingna, inaprobetsar ni Jesus dagiti piesta tapno agsursuro maipapan iti nailangitan nga Amana. (Luc. 2:41-49) Ania ti makatulong kadatayo ken iti pamiliatayo tapno naan-anay a magunggonaantayo kadagiti maiparang a paset? Kabayatan ti sesion, agtalinaedkayo a situtugaw ken liklikanyo ti awan kaes-eskanna a panagtutongtong. Dagiti selpon, pager, wenno dadduma pay nga elektroniko nga alikamen ket saan koma a makasinga kadakayo wenno kadagiti sabsabali. Kitaenyo ti agpalpalawag, ken aginotarkayo iti ababa. Katugawyo ti pamiliayo tapno makitayo no dumdumngeg met laeng dagiti annakyo. Iti rabii, iwayaanyo a pagsasaritaan kas pamilia dagiti nagustuanyo a punto.
6. Ania ti rumbeng a laglagipentayo mainaig iti panagkawkawes ken panaglanglangatayo?
6 Panagkawkawes ken Panaglanglanga: Dagiti agdaldaliasat a ganggannaet a komersiante nalakada laeng a mailasin ti pamilia ni Jesus ken dagiti dadduma pay a Judio nga agdaydayaw bayat ti ipapan ken panagawidda manipud iti piesta gapu iti barayubay iti pingir dagiti kawkawesda ken iti asul a linas iti ngatuen ti barayubay. (Num. 15:37-41) Nupay awan ti naisangsangayan a kawes dagiti Kristiano, am-ammodatayo gapu iti nanakman, naurnos, ken nadalus a panagkawkawes ken panaglanglangatayo. Nangnangruna a nanakman ti panaglanglangatayo bayat nga agbibiahetayo nga agpapan ken agawid manipud iti kombension ken bayat nga addatayo iti lugar a pakaangayan ti kombension. Uray no agsukattayo kalpasan ti programa, natakneng latta koma ti panaglanglangatayo ken kanayon a nakasuot ti badge card-tayo. Iti kasta, maidumatayo kadagiti saan a Saksi ken makaipaaytayo iti nasayaat nga impresion kadagiti agpalpaliiw.
7. Apay a masapul nga ikabilangantayo ti agboluntario nga agtrabaho iti pagkombensionan?
7 Kasapulan Dagiti Boluntario: Kasapulan ti adu a trabahador tapno naannayas ti pannakaaramid ti kombension. Makapagboluntariokayo kadi a tumulong? (Sal. 110:3) Dagiti trabaho a maaramid kadagiti kombension ket paset ti sagrado a panagdaydayawtayo ken makaipaay dayta iti nasayaat a panangsaksi. Ti manedyer iti maysa a pasilidad a nakaangayan ti kombension inapresiarna unay dagiti boluntario a nagdalus. Kastoy ti insuratna: “Pagyamanan iti nagsayaat a panangusaryo iti daytoy a pasilidad. Kanayon a madamdamagko a nagpaiduma dagiti Saksi ni Jehova ken nabayagen a nasayaat ti pakasarsaritaanda gapu ta kanayon a panawanda ti pasilidad a nadaldalus pay ngem iti sinangpetanda. Dakayo ken ti organisasionyo pinagbalinyo daytoy a pasilidad a nasaysayaat a lugar para iti komunidad ket inaramidyo daytoy a kadua dagiti kasasayaatan a tattao a pagragsakanmi a naam-ammo.”
8. Bayat nga addatayo iti siudad a pakaangayan ti kombension, ania dagiti gundaway a mabalintayo ti mangasaba?
8 Gundaway a Mangasaba: Dagiti tattao iti lugar a pakaangayan ti kombension mapaliiwdanto dagiti bisita a nakasuot iti badge card, a natakneng ken naurnos ti panagkawkawesda. Mabalin nga agusiosodanto ket gundawaytayo dayta a mangipakaammo kadakuada iti maipapan iti kombension. Kalpasan ti programa, ti uppat ti tawenna nga ubing intugotna iti restawran ti kopiana iti kairuruar a publikasion ket impakitana iti serbidora. Nangipaay dayta iti gundaway kadagiti nagannak ti ubing tapno awisenda ti serbidora a tumabuno iti kombension.
9. Kasanotayo a matulad ti panangipateg ti pamilia ni Jesus kadagiti naespirituan a probision nga ipapaay ni Jehova?
9 Dagiti nagkauna a piesta ket nararagsak nga okasion a segseggaan dagiti Judio a naespirituan ti panagpampanunotna. (Deut. 16:15) Siraragsak a nagsakripisio ti pamilia ni Jesus tapno laeng makatabunoda ket naan-anay a nagunggonaanda. Ipatpategtayo met dagiti kombension distritotayo, nga ibilangtayo dagita kas sagut manipud iti naayat a nailangitan nga Amatayo. (Sant. 1:17) Agsaganatayo itan para iti daytoy a tinawen a gundaway a makapagdaydayawtayo a siraragsak ken Jehova!
Dagiti Palagip Maipapan iti Kombension Distrito
◼ Oras ti Programa: Mangrugi iti 8:20 ti agsapa ti programa iti Biernes ken Sabado ken 8:50 ti agsapa iti Domingo. No maipatokaren ti panglukat a musika, masapul a nakatugawtayo aminen tapno mangrugi ti programa iti nadayaw a pamay-an. Agngudo ti programa iti 3:55 ti malem iti Biernes ken Sabado ken 3:15 ti malem iti Domingo.
◼ Paradaan: Kadagiti amin a pagkombensionan, addanto dagiti pagparadaan. Dagiti umuna a makasangpet ti umuna a makapagparada. Yantangay gagangay a limitado dagiti espasio, agkakalugankayo koma laengen aginggat’ mabalin.
◼ Panangireserba Kadagiti Pagtugawan: Mabalin nga ireserba dagiti pagtugawan kadagiti laeng kaduayo a nagbiahe iti luganyo wenno kadagiti kabbalayyo, kasta met kadagiti iyad-adalanyo.
◼ Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a cooler ken mabuong a pagkargaan.
◼ Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti pagkombensionan. Aniaman a tseke a maidonar iti kombension ket masapul a maipanagan iti “Watch Tower.”
◼ Aksidente ken Emerhensia: No adda emerhensia iti pagkombensionan, pangngaasiyo ta makiumankayo iti paraasistir nga adda iti asideg, a mangipakaammo a dagus iti Emerhensia a Pagpaagasan tapno ti kualipikado nga agas-asikaso iti emerhensia a pagpaagasan iti pagkombensionan kitaenna no nakaro ti situasion ken mangipaay iti tulong. No kasapulan, ti agas-asikaso iti emerhensia a pagpaagasan ti umawag iti kaasitgan nga ospital.
◼ Dagiti Adda Depekto ti Panagdengngegna: Kadagiti dadduma a kombension, maibrodkas ti programa iti auditorium babaen ti FM radio frequency. Tapno magunggonaankayo iti daytoy a probision, nasken a mangitugotkayo iti bassit nga FM receiver nga addaan iti earphone.
◼ Panagirekord: Aniaman nga alikamen a pagirekord ket saan a mabalin nga ikonektar iti koriente wenno iti alikamen a pangpapigsa iti timek iti pasilidad ken mausar laeng dagita iti pamay-an a saan a makasinga kadagiti sabsabali.
◼ Panagretrato: No agretratokayo kabayatan dagiti sesion, saankayo nga agusar iti flash wenno lingdan dagiti sabsabali a dumdumngeg iti programa.
◼ Dagiti Porma a Follow-Up: Masapul a masuratan ti porma a Please Follow Up (S-43) iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Mangitugot koma dagiti agibumbunannag iti maysa wenno dua a kopia ti porma a follow-up bayat ti kombension. Dagiti nasuratan a porma ket mabalin nga ited iti Pagalaan iti Libro (Book Room) wenno iti sekretario ti kongregasionyo apaman a makasublikayo iti kongregasionyo.—Kitaenyo ti Nobiembre 2009 a Ti Ministeriotayo iti Pagarian, p. 4.
◼ Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Gagangay ti mangted iti 10 porsiento a tip, depende iti serbisio a maipaay kadakayo.
◼ Dagiti Badge Card: Pangngaasiyo ta usarenyo dagiti badge card-yo bayat nga addakayo iti pagkombensionan wenno bayat ti panagbiaheyo nga agpapan agawid. Dagiti badge card ket maala laeng iti kongregasionyo. Saanyo nga itungtungkua ti mangala iti badge card nga agpaay kadakayo ken iti pamiliayo.
◼ Bautismo: Nakatugaw koman dagiti kandidato ti bautismo iti naituding a pagtugawanda sakbay a mangrugi ti programa ti kombension iti bigat ti Sabado. Mangitugotda koma iti disente a pagbabasa ken tualia. Tapno masigurado a maitutop ti kawes dagiti mabautisaran agpaay iti daytoy nga okasion, masapul nga ilawlawag daytoy dagiti panglakayen a natudingan a mangirepaso kadagiti saludsod iti libro nga Organisado.
◼ Panagboluntario: Ad-adda a naragsaktayo a makikombension no agboluntariotayo a tumulong kadagiti napateg a trabaho. (Ara. 20:35) Ti siasinoman a mayat nga agboluntario ket masapul nga agreport iti Volunteer Service Department iti kombension. Dagiti ubbing nga awan pay 16 ti tawenna mabalinda met ti tumulong nga agtrabaho babaen ti panangiwanwan ti nagannak wenno paraaywan kadakuada wenno ti siasinoman nga adulto a nakaitalkanda.