Dagiti Kombension Distrito—Nabileg a Pammaneknek iti Kinapudno
1. Dagiti regular a piesta inikkanna dagiti Israelita iti gundaway a mangutob ken mangadal kadagiti ania a napapateg a naespirituan a kinapudno?
1 Mamitlo iti makatawen nga agtataripnong dagiti nagkauna nga Israelita para kadagiti regular a piesta. Nupay dagiti laeng lallaki ti maikalikagum a tumabuno, masansan nga agdaliasatda a sangapamiliaan a mapan idiay Jerusalem tapno tabunuanda dagitoy a makaparagsak a kombension. (Deut. 16:15, 16) Dagita nga okasion ti mangted kadakuada iti gundaway a mangutob ken mangadal kadagiti napapateg a naespirituan a kinapudno. Ania ti sumagmamano kadagita a kinapudno? Ti maysa, ni Jehova ket naparabur ken naayat a Manangipaay. (Deut. 15:4, 5) Malaksid iti dayta, manamnamatayo met a mangipaay iti panangiwanwan ken pannalaknib. (Deut. 32:9, 10) Mabalin met nga utoben dagiti Israelita a kas ili a maipaay iti nagan ni Jehova, masapul nga iparangarangda ti kinalintegna. (Deut. 7:6, 11) Magunggonaantayo met ita kadagiti tinawen a kombension distritotayo.
2. Kasano a ti programa iti kombension distrito lawaganna ti kinapudno?
2 Ti Programa Lawaganna ti Kinapudno: Kadagiti kombension distritotayo, tagtagiragsakentayo dagiti palawag, drama, demostrasion, ken interbiu a mangilawlawag kadagiti napapateg a kinapudno a linaon ti Biblia. (Juan 17:17) Nangisagana ti organisasion ni Jehova iti programa nga espesipiko a nadisenio a mangipaay iti nagduduma a kasapulan dagiti tattao iti intero a lubong. (Mat. 24:45-47) Magagarankayo kadin a mangbuya ken dumngeg iti dayta a programa?
3. Ania ti aramidentayo tapno magunggonaantayo iti programa?
3 Siempre, magunggonaantayo laeng no tumabuno ken dumngegtayo a naimbag iti tallo nga aldaw a programa. Agpakadakayo itan iti amoyo a tumabunokayo iti kombension, no saanyo pay a naaramid daytoy. Siguraduenyo a maaddaankayo iti umdas nga inana tunggal rabii tapno saankayo nga agtuglep kabayatan ti programa. Natakuatan ti adu a maipamaysada ti dumngeg no kitaenda ti ispiker ken aginotarda. Saanyo nga ipalubos a ti selponyo ti mangsinga kadakayo wenno kadagiti sabsabali. Saankayo a makiinnestoria, agteks, mangan, wenno inum nga inum kabayatan ti programa.
4. Kasano a matulongan dagiti nagannak dagiti annakda a magunggonaan iti kombension?
4 Kadagiti tawen ti Sabbath, no agtataripnong ti pamilia dagiti Israelita tapno dumngeg iti pannakaibasa ti Linteg kabayatan ti Piesta Dagiti Abong-Abong, kaduada dagiti “ubbing . . . tapno makapagimdengda ken tapno makasursuroda.” (Deut. 31:12) Anian a makaparegta a makita dagiti pamilia nga agkakatugaw bayat ti kombension ken dagiti ubbing a saan a matmaturog no di ket dumdumngeg a naimbag! Tunggal rabii, repasuenyo dagiti innotaryo sa pagsasaritaanyo dagiti punto iti programa a nangnangruna a tinagiragsakyo. “Ti kinamaag naisinggalut iti puso ti maysa nga ubing,” isu a nasayaat no iwanwan dagiti nagannak dagiti ubbing ken uray dagiti agtutubo nga annakda, kabayatan ti pangngaldaw ken bayat nga addada iti pagdagusanda, imbes a ‘baybay-anda’ ida.—Prov. 22:15; 29:15.
5. Kasano a ti kondukta, panagkawkawes ken panaglanglangatayo arkosanna ti kinapudno bayat nga addatayo iti lugar a pakaangayan ti kombension?
5 Ti Nasayaat a Konduktatayo Arkosanna ti Kinapudno: Ti nasayaat a konduktatayo bayat nga addatayo iti lugar a pakaangayan ti kombension arkosanna ti kinapudno. (Tito 2:10) No nakasuot ti badge card-tayo, saantay laeng a maipakaammo ti kombension ken mailasin dagiti padatayo a delegado no di ket makaipaaytayo met iti panangsaksi kadagiti agpalpaliiw. Dagiti tattao nga adda iti lugar a pakaangayan ti kombension mapaliiwda a dagidiay nakasuot iti badge card ket nadalus ken nanakman ti panagkawkawesda, saan a narugit ken makagargari a gagangay iti lubong ita. (1 Tim. 2:9, 10) Gapuna, siguraduentayo a nanakman ti panagkawkawes ken panaglanglangatayo bayat nga addatayo iti lugar a pakaangayan ti kombension. Uray no iti nawayang nga estadium ti pakaangayan ti kombension, nanakman latta koma ti panagkawkawestayo. No kayattayo ti agsukat kalpasan ti programa sa mapantayo iti restawran, laglagipentayo a maysatayo latta a delegado iti kombension isu a saantay koma nga agkawes iti saan a natakneng.
6. Ania ti maysa a pamay-an tapno matagiragsaktayo ti Nakristianuan a panagkaykaysa kabayatan ti kombension?
6 Kadagiti regular a piesta, tinagiragsak dagiti Israelita ti makapabileg a pannakilangenda kadagiti padada nga agdaydayaw a naggapu iti dadduma a paset ti nasion ken lubong, ket daytoy ti nangitandudo iti panagkaykaysa. (Ara. 2:1, 5) Kabayatan dagiti kombension distrito, nakadkadlaw unay ti naisangsangayan a panagkakabsattayo kas Kristiano. Daytoy a makaay-ayo nga aspeto ti naespirituan a paraisotayo ket masansan a maapresiar dagiti agpalpaliiw. (Sal. 133:1) Imbes a mapantayo gumatang iti makan kabayatan ti pangngaldaw, nasaysayaat no agbalontayo iti simple a pangaldaw ken gundawayantayo ti makiam-ammo ken makisarita kadagiti kakabsat nga adda iti asidegtayo!
7. Ania dagiti rason nga agboluntariotayo nga agtrabaho no ipalubos ti kasasaadtayo?
7 Masansan a maapresiar dagiti agpalpaliiw dagiti nasayaat ti pannakaorganisarna ken naurnos a kombensiontayo, nangnangruna no maammuanda nga amin a trabaho ket ar-aramiden dagiti boluntario. Kabaelanyo kadi nga ‘idaton a situtulok ti bagbagiyo’ a tumulong iti trabaho iti kombension? (Sal. 110:3) Masansan nga agboluntario ti intero a pamilia tapno masanay dagiti annakda a tumulong kadagiti dadduma. No managbabainka, ti panagtrabaho iti kombension ti nasayaat a pamay-an tapno maam-ammom dagiti dadduma a delegado. Kinuna ti maysa a kabsat a babai: “Awan unay ti am-ammok sadiay, malaksid iti pamiliak ken ti sumagmamano a gagayyemko. Ngem idi timmulongak iti panagdalus, adu ti naam-ammok a kakabsat. Nakaragragsak!” Mangyeg iti kasta unay a rag-o no umadu ti gagayyemtayo babaen ti panagboluntario nga agtrabaho iti kombension. (2 Cor. 6:12, 13) No saanmo pay a napadasan ti nagboluntario, agsaludsodka kadagiti panglakayen no ania ti aramidem tapno makapagboluntarioka.
8. Kasanotayo nga awisen dagiti sabsabali a tumabuno iti kombension?
8 Awisenyo Dagiti Sabsabali a Dumngeg iti Kinapudno: Kas kadagiti kallabes a tawen, tallo a lawas sakbay ti kombensiontayo, makiramantayo iti kampania a mangawis kadagiti tattao a tumabuno. Kayat dagiti kongregasion a mawarasan iti imbitasion ti intero a teritoriada aginggat’ mabalin. (Kitaenyo ti kahon a “Kasanotayo nga Itukon ti Imbitasion?”) Itugottayo iti pagkombensionan dagiti amin a nabati nga imbitasion. Usarento dagitoy dagiti delegado a mangasaba iti di pormal bayat ti kaaddada iti lugar a pagkombensionan.
9. Mangisalaysaykayo kadagiti kapadasan a mangipakita a nasayaat ti resulta ti tinawen a kampaniatayo a panagiwaras iti imbitasion.
9 Adda kadi mangipangpangag iti daytoy a tinawen a kampaniatayo? Iti maysa a kombension, tinulongan ti attendant ti agassawa a mangbirok iti pagtugawan. Imbaga dagiti agassawa a nakaawatda iti imbitasion ket kunada a “kasla makapainteres dayta.” Gapuna, nagbiaheda iti nasurok a 320 kilometro tapno tumabunoda! Maysa pay, ti kabsat a babai a mangaskasaba iti binalaybalay ket nangted iti imbitasion iti lalaki a kasla interesado maipapan iti kombension. Gapuna, inwayaan ti kabsat nga ilawlawag ti imbitasion. Kalpasan ti sumagmamano nga aldaw, kabayatan ti kombension, ti kabsat nakitana ti lalaki ken ti maysa kadagiti gagayyemna a timmabuno ken nakaiggemda iti maysa kadagiti baro a publikasion a nairuar iti dayta a kombension!
10. Apay a napateg ti itatabuno kadagiti tinawen a kombension distritotayo?
10 Dagiti regular a piesta ket naayat a probision a naggapu ken Jehova a tumulong kadagiti Israelita nga ‘agserbi kenkuana iti kinaawan pagkurangan ken iti kinapudno.’ (Jos. 24:14) Umasping iti dayta, ti itatabunotayo kadagiti tinawen a kombension distrito tulongannatayo a ‘magna iti kinapudno’ ken napateg daytoy a paset ti panagdaydayawtayo. (3 Juan 3) Sapay koma ta bendisionan ni Jehova ti panagregget dagiti amin a mangay-ayat iti kinapudno a tumabuno ken magunggonaan a naan-anay!
[Blurb iti panid 3]
Ti nasayaat a konduktatayo bayat nga addatayo iti lugar a pakaangayan ti kombension arkosanna ti kinapudno
[Blurb iti panid 3]
Tallo a lawas sakbay ti kombensiontayo, makiramantayo iti kampania a mangawis kadagiti tattao a tumabuno
[Kahon iti panid 5]
Dagiti Palagip Mainaig iti 2012 Kombension Distrito
◼ Oras ti Programa: Mangrugi iti 8:20 iti agsapa ti programa iti tallo nga aldaw. No maipatokaren ti panglukat a musika, masapul a nakatugawtayo aminen tapno mangrugi ti programa iti nadayaw a pamay-an. Agngudo ti programa iti 3:55 iti malem iti Biernes ken Sabado ken 2:40 iti malem iti Domingo.
◼ Paradaan: Kadagiti amin a pagkombensionan, addanto dagiti pagparadaan. Dagiti umuna a makasangpet ti umuna a makapagparada. Yantangay gagangay a limitado dagiti espasio, agkakalugankayo koma laengen aginggat’ mabalin.
◼ Panangireserba Kadagiti Pagtugawan: Mabalin nga ireserba dagiti pagtugawan para laeng kadagiti kabbalayyo, kaduayo a nagbiahe iti lugan, wenno kadagiti iyad-adalanyo.—1 Cor. 13:5.
◼ Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a cooler ken mabuong a pagkargaan.
◼ Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti pagkombensionan. Aniaman a tseke a maidonar iti kombension ket masapul a maipanagan iti “Watch Tower.”
◼ Aksidente ken Emerhensia: No adda emerhensia iti pagkombensionan, pangngaasiyo ta makiumankayo iti paraasistir nga adda iti asideg, a mangipakaammo a dagus iti Emerhensia a Pagpaagasan tapno ti kualipikado nga agas-asikaso iti emerhensia a pagpaagasan iti pagkombensionan kitaenna no nakaro ti situasion ken mangipaay iti tulong. No kasapulan, ti agas-asikaso iti emerhensia a pagpaagasan ti umawag iti kaasitgan nga ospital.
◼ Agas: No agtomtomarkayo iti agas, siguraduenyo ti mangitugot iti umdas a suplayyo yantangay awan ti maalayo a kasta nga agas iti pagkombensionan. Dagiti ringgilia nga us-usaren dagiti diabetiko ket masapul a maibelleng laeng iti basuraan a namarkaan iti “hazardous.”
◼ Sapatos: Tinawen nga adu ti maak-aksidente maigapu kadagiti sapatosda. Kasayaatan a pilien ti nanakman ken komportable a sapatos tapno natalged ti pannagnayo kadagiti agdan, basar, ken dadduma pay.
◼ Panagirekord: Aniaman nga alikamen a pagirekord ket saan a mabalin nga ikonektar iti koriente wenno iti alikamen a pangpapigsa iti timek iti pasilidad ken mausar laeng dagita iti pamay-an a saan a makasinga kadagiti sabsabali.
◼ Panagretrato: No agretratokayo kabayatan dagiti sesion, saankayo nga agusar iti flash wenno lingdan dagiti sabsabali a dumdumngeg iti programa.
◼ Dagiti Porma a Please Follow-Up (S-43): Masapul a masuratan ti porma a Please Follow Up iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Mangitugot koma dagiti agibumbunannag iti maysa wenno dua a kopia ti porma a follow-up bayat ti kombension. Dagiti nasuratan a porma ket mabalin nga ited iti Pagalaan iti Libro (Book Room) wenno iti sekretario ti kongregasionyo apaman a makasublikayo iti kongregasionyo.—Kitaenyo ti Nobiembre 2009 a Ti Ministeriotayo iti Pagarian, panid 4.
◼ Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Mangtedkayo iti tip no gagangay dayta iti lugaryo.
◼ Badge Card: Pangngaasiyo ta usarenyo dagiti badge card-yo bayat nga addakayo iti pagkombensionan wenno bayat ti panagbiaheyo nga agpapan agawid. Dagiti badge card ket maala laeng iti kongregasionyo. Saanyo nga itungtungkua ti mangala iti badge card nga agpaay kadakayo ken iti pamiliayo.
◼ Bautismo: Nakatugaw koman dagiti kandidato ti bautismo iti naituding a pagtugawanda sakbay a mangrugi ti programa ti kombension iti bigat ti Sabado. Mangitugotda koma iti disente a pagbabasa ken tualia. Tapno masigurado a maitutop ti kawes dagiti mabautisaran agpaay iti daytoy nga okasion, masapul nga ilawlawag daytoy dagiti panglakayen a natudingan a mangirepaso kadagiti saludsod iti libro nga Organisado.
◼ Panagboluntario: Ad-adda a naragsaktayo a makikombension no agboluntariotayo a tumulong kadagiti napateg a trabaho. (Ara. 20:35) Ti siasinoman a mayat nga agboluntario ket masapul nga agreport iti Volunteer Service Department iti kombension. Dagiti ubbing nga awan pay 16 ti tawenna mabalinda met ti tumulong nga agtrabaho babaen ti panangiwanwan ti nagannak wenno paraaywan kadakuada wenno ti siasinoman nga adulto a nakaitalkanda.
[Kahon iti panid 4]
Kasanotayo nga Itukon ti Imbitasion?
Tapno mawanas ti teritoriatayo, masapul nga ababa laeng ti presentasiontayo. Mabalintayo nga ibaga: “Naimbag nga aldawyo. Makiramramankami iti panagiwaras iti daytoy nga imbitasion iti intero a lubong. Daytoy ti kopiayo. Mabasayo iti imbitasion ti ad-adu pay a detalye.” Naganaygay koma ti pannakisaritayo. No makiramramankayo iti panagiwaras iti imbitasion kadagiti ngudo ti lawas, itukonyo met dagiti magasin no maitutop.