Kababalin a Mangitan-ok iti Dios
1. Apay a nalaka a malasin dagiti Saksi ni Jehova no tumabtabunoda kadagiti kombension distrito?
1 Nalakadatayo a malasin dagiti tattao no tumabtabunotayo kadagiti kombension distrito. Naka-badge ken grinupo nga agbiahetayo iti kada aldaw. Dagiti sumaganad ti sumagmamano a palagip a makatulong kadatayo a mangitan-ok iti Dios babaen iti nasayaat a kababalintayo bayat nga addatayo iti pagkombensionan.—1 Ped. 2:12.
2. Kasanotayo a maitan-ok ti Dios babaen iti naemma a panagkawkawes bayat nga addatayo iti pagkombensionan?
2 Naemma a Kawes: Masansan nga ap-apresiaren dagiti makakitkita kadatayo ti naemma a panagkawkawestayo bayat a tabtabunuantayo ti programa. Ngem dakdakkel ti epektona kadakuada ti estilo ti panagkawkawestayo no mangmangantayo iti restawran wenno no gumatgatangtayo. Masapul a naemma ken saan unay a kasual ti kawestayo kadagiti kasta a gundaway. Makita koma dagiti agpalpaliiw ti nakaidumaantayo kadagiti saan a Saksi. (Roma 12:2) Masapul met a naka-badge card-tayo tapno maammuan dagiti tattao ti maipapan iti kombension, mangted dayta iti gundaway kadatayo a mangasaba, ken tapno mailasindatayo ti dadduma a delegado.
3. Kasanotayo a maipakita ti kinaanus ken kinadayaw?
3 Kinaanus ken Kinadayaw: Adu ita ti managimbubukodan isu a talaga a makapabang-ar kadagiti agpalpaliiw ti kinaanus ken kinadayawtayo! (2 Tim. 3:1-5) No agreserbatayo iti pagtugawan wenno makipilatayo a mangala kadagiti publikasion a nairuar iti kombension, masapul a yun-unatayo ti pagimbagan ti sabsabali imbes a ti bagitayo. (1 Cor. 10:23, 24) Kalpasan ti damo a pannakikombension ti maysa nga interesado a lalaki, kinunana: “Awan ti malagipko kadagiti naipalawag iti dayta nga aldaw. Ngem diak pulos malipatan ti kababalin dagiti Saksi.”
4. Apay a nasayaat nga agboluntariotayo iti kombension no ipalubos ti kasasaadtayo?
4 Sitatallugod a Panagboluntario: Pagaammo dagiti pudno a Kristiano gapu iti sitatallugod a panagboluntarioda. (Sal. 110:3) Iti maysa a pasilidad a pagkombensionan, agarup 600 a kakabsat ti nagboluntario nga agdalus sakbay ti kombension. Kinuna ti maysa nga agtrabtrabaho sadiay: “Ita pay laeng a nakakitakami iti kastoy! Diak pulos impagarup a boluntarioda amin.” Magagarantayo a mangpaspasungad iti 2013 kombension distrito ken ti gundawaytayo a maitan-oktayo ti Dios babaen ti kababalintayo.
[Kahon iti panid 3-6]
Dagiti Palagip Mainaig iti 2013 a Kombension Distrito
◼ Oras ti Programa: Mangrugi iti 8:20 iti agsapa ti programa iti amin a tallo nga aldaw. Iti dayta nga oras, masapul a nakatugawtayo aminen tapno mangrugi ti programa iti nadayaw ken naurnos a pamay-an. Mangrugi ti pangserra a kanta ken kararag iti 3:50 iti malem ti Biernes ken Sabado ken 2:35 iti malem ti Domingo.
◼ Panangireserba Kadagiti Pagtugawan: Mabalin nga ireserba dagiti pagtugawan para laeng kadagiti kabbalayyo, kaduayo a nagbiahe iti lugan, wenno kadagiti yad-adalanyo.—1 Cor. 13:5.
◼ Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a cooler ken mabuong a pagkargaan.
◼ Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti pagkombensionan para iti sangalubongan a trabaho. Aniaman a tseke a maidonar ket masapul a maipanagan iti “Watch Tower.”
◼ Aksidente ken Emerhensia: No adda emerhensia iti pagkombensionan, pangngaasiyo ta makiumankayo iti paraasistir nga adda iti asideg, a mangipakaammo a dagus iti First Aid tapno dagiti kualipikado nga agas-asikaso iti dayta a departamento kitaenda ti kinakaro ti situasion. No kasapulan, umawagda iti kaasitgan nga ospital.
◼ Agas: No agtomtomarkayo iti naireseta nga agas, siguraduenyo ti mangitugot iti umdas a suplayyo yantangay awan ti maalayo a kasta nga agas iti pagkombensionan.
◼ Dagiti Porma a Please Follow-Up (S-43): Masapul a masuratan ti porma a Please Follow Up iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Dagiti nasuratan a porma ket mabalin nga ited iti Pagalaan iti Libro wenno iti sekretario ti kongregasionyo apaman a makaawidkayo.
◼ Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Agkaweskayo iti wagas a maitutop iti maysa a Kristiano a ministro. Mangtedkayo iti tip no gagangay dayta iti lugaryo.
◼ Panagboluntario: Ti siasinoman a mayat nga agboluntario ket masapul nga agreport iti Volunteer Service Department iti kombension. Dagiti ubbing nga awan pay 16 ti tawenna ket mabalin met a tumulong nga agtrabaho babaen iti panangiwanwan ti nagannak, ti paraaywan kadakuada, wenno ti siasinoman nga adulto a nakaitalkanda.