Dagiti Palagip Mainaig iti Kombension
Oras ti Programa: Maluktan ti pagkombensionan iti 7:00 iti agsapa. Mangrugi ti panglukat a musika iti 8:20 bayat ti tallo nga aldaw. Iti dayta nga oras, masapul a nakatugawtayo aminen tapno mangrugi ti programa iti nadayaw ken naurnos a pamay-an. Ti pangserra a kanta ken kararag ket 3:55 iti malem ti Biernes ken Sabado, sa 2:45 iti malem ti Domingo.
‘Idaydayawyo ni Jehova Babaen ti Kanta’: Dagiti nagkauna nga adipen ti Dios indaydayawda ni Jehova babaen ti kanta. Agingga ita, ti musika ket napateg pay laeng a paset ti pudno a panagdaydayaw. (Sal. 28:7) Iti rehional a kombensiontayo, adda musika a maipatokar sakbay a mangrugi ti tunggal sesion. Saan laeng a maipatokar daytoy kas background music no di ket nairanta daytoy tapno maisagana ti panunottayo a mangpauneg iti pannakaammo maipapan ken Jehova ken maidaydayawtayo. Gapuna, agtulnogtayo koma no ibaga ti tserman nga agsimpatayon iti pagtugawantayo tapno dumngegtayo iti maipatokar a musika sakbay ti tunggal sesion. No aramidentayo dayta, ipakpakitatayo nga ap-apresiarentayo ti amin nga inaramid dagiti miembro ti Watchtower orchestra. Mamindua iti makatawen nga agbiahe dagitoy a kakabsat iti bukodda a gastos a mapan iti Patterson, New York, tapno mangpataudda kadagiti makaay-ayo a musika a matagiragsaktayo. Kalpasan a maimdengantayo a naimbag ti panglukat a musika, amintayo koma ket makiraman iti panangidaydayaw ken Jehova babaen ti panangkanta kadagiti kanta ti Pagarian.
Paradaan: Kadagiti amin a pagkombensionan, addanto dagiti pagparadaan. Dagiti umuna a makasangpet ti umuna a makapagparada. Yantangay gagangay a limitado dagiti pagparadaan kadagiti pagkombensionan, agkakalugankayo koma laengen aginggat’ mabalin. Siguraduen koma dagiti addaan iti rebbengen a kakabsat a lallaki a dagiti laeng lugan nga addaan kadagiti baldado a pasahero ti mapalubosan nga agparada iti lugar a naireserba para kadakuada.
Panagreserba iti Pagtugawan: No mabalinen ti sumrek iti pagkombensionan iti tunggal agsapa, saankayo koma nga agdardaras a mangpili iti pagtugawanyo a kas man la makilinlinnumbakayo. Pangngaasiyo ta ipakitayo koma ti konsiderasion iti sabsabali, nga iyun-unatayo ti pagimbagan dagiti kakabsattayo. Ti kinamanagsakripisio ti mangipabigbig a datayo dagiti pudno a Kristiano ken mangtignay kadagiti agpalpaliiw a mangidaydayaw iti Dios. (Juan 13:34, 35; 1 Cor. 13:5; 1 Ped. 2:12) Mabalinyo ti mangireserba iti pagtugawan ngem para laeng koma kadagiti kabbalayyo, kaduayo a nagbiahe iti lugan, wenno kadagiti iyad-adalanyo. Pangngaasiyo ta saankayo a mangikabil iti aniaman a banag kadagiti tugaw a saanyo nga ireserba. Makatulong daytoy tapno maammuan ti dadduma a bakante dagita a pagtugawan. Adda nairanta a pagtugawan dagiti nataengan ken baldado ngem limitado laeng dagitoy isu a maysa wenno dua laeng koma ti mangasistir ken makikatugaw iti tunggal nataengan wenno baldado.
Nanakman a Panagkawkawes: Masapul a maitutop ken nanakman ti panagkawkawestayo kabayatan ti kombension, saan a kas iti nalabes nga estilo a gagangay iti lubong. (1 Tim. 2:9) Uray no agal-aliwaksaytayo sakbay ken kalpasan dagiti sesion, liklikantay koma ti saan a disente wenno kasual unay a panagkawkawes ken panaglanglanga. Iti kasta, saantayo a mabain a mangisuot iti badge card-tayo ken naturedtayo a mangasaba no adda gundaway. No nasayaat ti panaglanglanga ken kababalintayo inton tumabunotayo kadagiti kombension, saan laeng a matignay dagiti nasingpet ti panagpuspusona a tattao a mangawat iti makaispal iti biag a mensahe ti Biblia no di ket mangyeg pay iti rag-o ken Jehova.—Sof. 3:17.
Nasayaat a Kondukta No Agusar iti Electronic Device: Ipakpakitatayo ti nasayaat a kondukta no iddepen wenno ikabil iti silent mode ti selpontayo tapno saan a masinga dagiti dadduma kabayatan ti programa. No agusar iti camera, video recorder, tablet, wenno dadduma pay a gadyet, kayattayo ti agbalin a nakonsiderar iti sabsabali babaen ti saan a panangsinga wenno pananglinged kadakuada. Maipakitatayo met ti nasayaat a kondukta no saantayo a mangipatulod iti di kasapulan a text wenno email bayat ti programa.
Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti mangitugot iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a cooler ken mabuong a pagkargaan.
Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti pagkombensionan para iti sangalubongan a trabaho. Aniaman a tseke a maidonar ket maipanagan iti “Watch Tower.” Mabalin met ti agdonar babaen ti debit wenno credit card.
Agas: No agtomtomarkayo iti naireseta nga agas, siguraduenyo ti mangitugot iti umdas a suplayyo yantangay awan ti maalayo a kasta nga agas iti pagkombensionan. Dagiti ringgilia nga us-usaren dagiti diabetiko ket masapul a maibelleng iti basuraan a namarkaan iti “hazardous” saan ket a kadagiti gagangay a pagbasuraan iti pagkombensionan wenno pagdagusan.
Panagannad: Sipapanunotkayo koma iti panagannad tapno maliklikan ti aksidente kas iti pannakaikaglis ken pannakaitikleb. Kada tawen, adda dagiti maak-aksidente gapu iti sapatos, nangruna dagiti nangato ti takongna. Nasaysayaat no pilientayo laeng dagiti nanakman ken komportable a sapatos a natalged nga ipagna kadagiti salogan, agdan, kalub ti kanal nga adda abut-abutna (grating), ken dadduma pay.
Nakapuy ti Panagdengngegna: Iti dadduma a kombension, maipatangatang ti programa iti FM radio frequency. Tapno mangngegyo daytoy, masapul a mangitugotkayo iti bassit ken debateria nga FM receiver nga addaan iti earphone.
Dagiti Please Follow Up (S-43) Form: Masapul a maisurat iti Please Follow Up form dagiti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Dagiti nasuratan a porma ket mabalin nga ited iti Book Room wenno iti sekretario ti kongregasionyo apaman a makaawidkayo.
Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Agkaweskayo iti mayanatup kas maysa a Kristiano a ministro. Mangtedkayo iti tip no gagangay dayta iti lugaryo.
Panagboluntario: Siasinoman a mayat nga agboluntario ket masapul nga agreport iti Volunteer Service Department iti pagkombensionan. Dagiti ubbing nga awan pay 16 ti tawenna ket mabalin met nga agboluntario a kadua ti nagannak, paraaywan kadakuada, wenno siasinoman nga adulto a nakaitalkanda.