Tallo nga Aldaw a Pannakabang-ar iti Naespirituan
1. Ania ti manamnama nga awatentayo iti kombension distrito iti daytoy a tawen?
1 Iti lubong ni Satanas a mabisbisin iti naespirituan, agtultuloy a mangipapaay ni Jehova iti bang-ar kadagiti adipenna. (Isa. 58:11) Ti maysa a probision nga us-usaren ni Jehova a mangpakired kadatayo ket ti tinawen a kombension distrito. Bayat nga umad-adani ti kombension iti daytoy a tawen, kasanotayo a makapagsagana nga umawat ken mangiranud iti naespirituan a pannakabang-ar?—Prov. 21:5.
2. Ania dagiti rumbeng nga asikasuentayo itan?
2 Nasayaat no rugianyo itan nga urnosen ti personal nga eskediulyo wenno ti eskediulyo iti sekular a trabahoyo tapno matabunuanyo ti tallo nga aldaw a kombension. Natantiayo kadin no mano nga oras ti biaheyo a mapan iti pagkombensionan iti inaldaw tapno nasapakayo a makasangpet ken makabirokkayo iti pagtugawanyo sakbay a mangrugi ti programa? Sigurado a saantayo a kayat ti maikapis iti aniaman a makaparegta a naespirituan a taraon nga insagana ni Jehova kadatayo! (Isa. 65:13, 14) Adda kadin ti pagdagusan ken paglugananyo?
3. Ania dagiti singasing a makatulong kadatayo ken iti pamiliatayo tapno naan-anay a mabenepisiarantayo iti programa?
3 Ania ti aramidenyo tapno saan nga agtawataw ti panunotyo kabayatan dagiti sesion? No mabalbalin, maaddaankayo iti umdas nga inana iti tunggal rabii kabayatan ti kombension. Kitaenyo ti ispiker. Ukradenyo iti Bibliayo ti tunggal teksto nga ibagana. Aginotarkayo. Nasayaat no agkakatugaw dagiti miembro ti pamilia tapno masigurado dagiti nagannak a dumdumngeg a naimbag dagiti annakda. (Prov. 29:15) Mabalin a rinabii a pagsasaritaan ti pamilia dagiti tampok iti programa. Tapno agtultuloy a mabang-aran ti pamiliayo uray kalpasan ti kombension, mabalinyo nga iraman a pagsasaritaan iti sangapamiliaan a panagdaydayawyo dagiti espesipiko a punto a masapul nga iyaplikar ti pamiliayo.
4. Kasanotayo a matulongan dagiti dadduma iti kongregasiontayo nga umawat iti naespirituan a pannakabang-ar?
4 Tulonganyo Dagiti Sabsabali a Maaddaan met iti Pannakabang-ar: Kayattayo met a mabang-aran dagiti sabsabali iti naespirituan. Adda kadi natataengan wenno dadduma iti kongregasionyo nga agkasapulan iti tulong tapno makatabunoda iti kombension? Kabaelanyo kadi a tulongan ida? (1 Juan 3: 17, 18) Dagiti panglakayen, nangnangruna dagiti manangaywan iti grupo, masapul a siguraduenda a maipapaay ti tulong a kasapulan dagiti kasta nga agibumbunannag.
5. Kasanotayo nga iwaras dagiti imbitasion iti kombension? (Kitaenyo met ti kahon iti baba.)
5 Kas idi napalabas, tallo a lawas sakbay a mangrugi ti kombension, makiramantayto iti kampania a mangawis kadagiti tattao a tumabuno. Masapul nga ikagumaan dagiti kongregasion nga iwaras dagiti suplayda nga imbitasion ken wanasenda ti teritoriada aginggat’ mabalin. Dagiti imbitasion a saan a naiwaras ti pamiliayo kalpasan ti kampania ket mabalinyo nga itugot iti kombension tapno usarenyo a mangasaba iti di pormal a pamay-an. Ti kanayonan nga impormasion maipapan iti daytoy ket maipaayto kabayatan ti programa iti Biernes. Dagiti imbitasion a namnamaenyo a saanen a mausar ti pamiliayo bayat ti kaaddayo iti lugar a pakaangayan ti kombension ket itedyo iti paraasistir no sumrekkayo iti pagkombensionan. Mangibatikayo iti maysa a kopiayo ta mausaryonto dayta iti maudi a palawag iti Domingo.
6. Kadagiti ania a pamay-an a maiparangarangtayo ti nasayaat a kondukta iti kombension?
6 Makapabang-ar ti Nasayaat a Kondukta: Iti tiempo nga adu a tattao ti ‘managayat iti bagbagida’ ken saan a mangikabkabilangan iti rikna dagiti dadduma, anian a makapabang-ar ti makilangen kadagiti padatayo a Kristiano a mangikagkagumaan a mangiparangarang iti nasayaat kondukta! (2 Tim. 3:2) Mangipakpakitatayo iti nasayaat a kondukta no kalmado ken naurnos ti iseserrektayo iti pagkombensionan no sumangpettayo iti tunggal aldaw ken no dagiti laeng kabbalay wenno kaduatayo iti lugan wenno dagiti iyad-adalantayo ti ireserbaantayo iti pagtugawan. Agtulnogtayo no ibaga ti tserman nga agsimpatayon iti pagtugawantayo tapno dumngegtayo iti maipatokar a musika sakbay ti tunggal sesion. Mangipakpakitatayo met iti nasayaat a kondukta no iddepentayo ti selpontayo wenno ikabiltayo iti silent mode tapno saan a masinga dagiti dadduma kabayatan ti programa. Nasayaat met no saantayo a sao a sao, agteteks, mangmangan, wenno agpagnapagna kabayatan ti programa.
7. Kasanotayo nga umawat ken mangiranud iti pannakabang-ar bayat ti pannakitimpuyogtayo kadagiti kakabsat?
7 Makapabang-ar a Pannakitimpuyog: Dagiti kombension ket mangipapaay kadatayo iti kanayonan a gundaway a mangtagiragsak iti makapabang-ar a Nakristianuan a panagkaykaysa ken panagkakabsat. (Sal. 133:1-3) Apay a saanyo nga ikagumaan ti ‘agpalawa’ ket makiam-ammokayo kadagiti kakabsat a saanyo a kakongregasion? (2 Cor. 6:13) Nalabit pagbalinenyo a kalat ti makiam-ammo iti uray maysa laeng a kabsat wenno pamilia iti kada aldaw. Nasayaat nga aramiden daytoy kabayatan ti oras ti pangngaldaw. Gapuna, agbalonkayo iti simple a pangaldaw ket tagiragsakenyo ti mangan ken makilangen kadagiti dadduma iti pagkombensionan imbes a pumanawkayo tapno gumatang iti makan wenno mangan iti asideg a restawran. No aramidenyo daytoy, mabalin a maaddaankayo kadagiti baro ken agpaut a gagayyem.
8. Apay nga agboluntariotayo a tumulong iti kombension, ken kasanotayo a maaramid daytoy?
8 Anian a makapabang-ar ti makibinnulig kadagiti kapammatiantayo iti sagrado a panagserbi! Makapagboluntariokayo kadi a tumulong iti maysa a departamento wenno tumulong iti kongregasionyo iti batangyo a dalusan? (Sal. 110:3) No awan ti naited kadakayo nga annongen, mabalinyo ti umasideg iti Volunteer Service Department iti pagkombensionan. Nalaglag-an ken ad-adda a makaparagsak ti agtrabaho no ad-adu ti agboluntario.
9. Apay a rumbeng a nasayaat ti kondukta ken panaglanglangatayo kabayatan ti kombension?
9 Ti Konduktatayo ket Makapabang-ar Kadagiti Agpalpaliiw: Datayo ket delegado iti kombension kabayatan ti tallo nga aldaw ti kombension, saan laeng a kabayatan ti programa. Dagiti mangpalpaliiw kadatayo bayat ti kaaddatayo iti lugar a pakaangayan ti kombension masapul a makitada ti makapabang-ar a nakaidumaantayo kadagiti saan a Saksi. (1 Ped. 2:12) Ti panagkawkawes ken panaglanglangatayo iti pagkombensionan, iti pagdagusan, ken kadagiti restawran ket masapul a pakaidayawan ni Jehova. (1 Tim. 2:9, 10) No nakakabil ti badge card-tayo, mabigbig dagiti tattao a datayo ket Saksi ni Jehova. Mabalin a mangilukat daytoy iti gundaway tapno maibagatayo kadakuada ti maipapan iti kombension ken makasabaantayo ida.
10. Ania ti aramidentayo tapno dagiti agtartrabaho iti hotel ken restawran ket nasayaat ti maibagada iti kombensiontayo?
10 Mabalin nga adda dagiti agdagus iti hotel kabayatan ti kombension. Kasanotayo a makitinnulong kadagiti agtartrabaho iti hotel ken restawran? Masapul a surotentayo dagiti paglinteganda no mano ti maipalubos nga agyan iti tunggal kuarto. Saantayo met a naariwawa tapno saan a maisturbo dagiti dadduma. No adu ti as-asikasuen dagiti agtartrabaho iti hotel no ag-check-in wenno ag-check-out-tayo, masapul a naanus ken naisemtayo latta. (Col. 4:6) Masapul a mangtedtayo iti tip kadagiti serbidor iti restawran ken kadagiti agtartrabaho iti hotel a mangbagkat kadagiti bagahetayo, mangdalus kadagiti kuartotayo, ken mangipaay iti dadduma pay a serbisio.
11. Ania dagiti kapadasan a mangipakita a nasayaat ti resulta ti Nakristianuan a kondukta?
11 Ania ti maikuna dagiti sabsabali iti nasayaat a konduktatayo kabayatan ti kombension? Sigun iti artikulo iti maysa a pagiwarnak, kastoy ti kinuna ti manedyer iti maysa kadagiti pasilidad a nakaangayan ti kombension: “Nakadaydayaw dagita a tattao. Maragsakankami a makakita kadakuada iti tinawen.” Idi napan a tawen, adda saan a Saksi a nakapukaw iti pitakana iti hotel a nagdagusan dagiti delegado iti kombension. Idi naisubli ti pitaka iti manedyer ti hotel nga awan ti naksay iti linaonna, kinuna ti manedyer iti makinkukua: “Imbag ta madama ti kombension dagiti Saksi ni Jehova iti asideg isu a napno ti hotel kadagiti Saksi ta no saan, diak la ammo no maisubli pay ti pitakam.”
12. Bayat nga umad-adani ti kombension, ania ti ikagumaantayo nga aramiden, ken apay?
12 Umad-adanin ti kombension ita a tawen. Adu a tiempo ken pigsa ti nausar a mamagbalin iti programa ken iti kombension a makapabang-ar. Ikagumaanyo a tabunuan ti tallo nga aldaw, ken agsaganakayo a mangtagiragsak kadagiti insagana ni Jehova ken ti organisasionna nga agpaay kadakayo. Determinadokayo koma a mangbang-ar kadagiti dadduma babaen ti nasayaat a kababalin, makaparagsak a panaglalangen, ken nasayaat a kondukta. No kasta, agpapada a mariknayo ti kas iti insurat ti maysa kadagiti delegado idi napan a tawen, “Daytoy ti kasasayaatan pay laeng a kapadasak!”
[Blurb iti panid 3]
Kas idi napalabas, tallo a lawas sakbay a mangrugi ti kombension, makiramantayto iti kampania a mangawis kadagiti tattao a tumabuno
[Blurb iti panid 4]
Ti panagkawkawes ken panaglanglangatayo iti pagkombensionan, iti pagdagusan, ken kadagiti restawran ket masapul a pakaidayawan ni Jehova
[Blurb iti panid 4]
Determinadokayo koma a mangbang-ar kadagiti dadduma babaen ti nasayaat a kababalin, makaparagsak a panaglalangen, ken nasayaat a kondukta
[Kahon iti panid 3]
Kasanotayo nga Itukon ti Imbitasion?
Masapul nga ababa laeng ti presentasiontayo tapno mawanastayo ti teritoriatayo. Mabalintayo nga ibaga: “Naimbag a bigatyo. Makiramramankami iti panagiwaras iti daytoy nga imbitasion iti intero a lubong. Daytoy ti imbitasionyo. Mabasayo dita ti dadduma nga impormasion.” Makapainteres ti parupa ti imbitasion isu a dayta ti ipakitayo iti bumalay no iyawatyo ti imbitasionna. Naganaygaykayo koma. No makiramankayo iti panagiwaras iti imbitasion kadagiti ngudo ti lawas, mabalinyo met nga itukon dagiti magasin no maitutop.
[Kahon iti panid 5]
Dagiti Palagip Mainaig iti 2011 a Kombension Distrito
◼ Oras ti Programa: Mangrugi iti 8:20 ti agsapa ti programa iti Biernes ken Sabado ken 8:50 ti agsapa iti Domingo. No maipatokaren ti panglukat a musika, masapul a nakatugawtayo aminen tapno mangrugi ti programa iti nadayaw a pamay-an. Agngudo ti programa iti 4:00 ti malem iti Biernes ken Sabado ken 3:15 ti malem iti Domingo.
◼ Paradaan: Kadagiti amin a pagkombensionan, addanto dagiti pagparadaan. Dagiti umuna a makasangpet ti umuna a makapagparada. Yantangay gagangay a limitado dagiti espasio, agkakalugankayo koma laengen aginggat’ mabalin.
◼ Panangireserba Kadagiti Pagtugawan: Mabalin nga ireserba dagiti pagtugawan kadagiti laeng kaduayo a nagbiahe iti luganyo wenno kadagiti kabbalayyo, kasta met kadagiti iyad-adalanyo.—1 Cor. 13:5.
◼ Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a cooler ken mabuong a pagkargaan.
◼ Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti pagkombensionan. Aniaman a tseke a maidonar iti kombension ket masapul a maipanagan iti “Watch Tower.”
◼ Aksidente ken Emerhensia: No adda emerhensia iti pagkombensionan, pangngaasiyo ta makiumankayo iti paraasistir nga adda iti asideg, a mangipakaammo a dagus iti Emerhensia a Pagpaagasan tapno ti kualipikado nga agas-asikaso iti emerhensia a pagpaagasan iti pagkombensionan kitaenna no nakaro ti situasion ken mangipaay iti tulong. No kasapulan, ti agas-asikaso iti emerhensia a pagpaagasan ti umawag iti kaasitgan nga ospital.
◼ Agas: No agtomtomarkayo iti agas, siguraduenyo ti mangitugot iti umdas a suplayyo yantangay awan ti maalayo a kasta nga agas iti pagkombensionan.
◼ Sapatos: Tinawen nga adu ti maak-aksidente maigapu kadagiti sapatosda. Kasayaatan a pilien ti nanakman ken komportable a sapatos tapno natalged ti pannagnayo kadagiti agdan, basar, ken dadduma pay.
◼ Panagirekord: Aniaman nga alikamen a pagirekord ket saan a mabalin nga ikonektar iti koriente wenno iti alikamen a pangpapigsa iti timek iti pasilidad ken mausar laeng dagita iti pamay-an a saan a makasinga kadagiti sabsabali.
◼ Panagretrato: No agretratokayo kabayatan dagiti sesion, saankayo nga agusar iti flash wenno lingdan dagiti sabsabali a dumdumngeg iti programa.
◼ Dagiti Porma a Please Follow-Up: Masapul a masuratan ti porma a Please Follow Up (S-43) iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Mangitugot koma dagiti agibumbunannag iti maysa wenno dua a kopia ti porma a follow-up bayat ti kombension. Dagiti nasuratan a porma ket mabalin nga ited iti Pagalaan iti Libro (Book Room) wenno iti sekretario ti kongregasionyo apaman a makasublikayo iti kongregasionyo.—Kitaenyo ti Nobiembre 2009 a Ti Ministeriotayo iti Pagarian, panid 4.
◼ Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Mangtedkayo iti tip no gagangay dayta iti lugaryo.
◼ Badge Card: Pangngaasiyo ta usarenyo dagiti badge card-yo bayat nga addakayo iti pagkombensionan wenno bayat ti panagbiaheyo nga agpapan agawid. Dagiti badge card ket maala laeng iti kongregasionyo. Saanyo nga itungtungkua ti mangala iti badge card nga agpaay kadakayo ken iti pamiliayo.
◼ Bautismo: Nakatugaw koman dagiti kandidato ti bautismo iti naituding a pagtugawanda sakbay a mangrugi ti programa ti kombension iti bigat ti Sabado. Mangitugotda koma iti disente a pagbabasa ken tualia. Tapno masigurado a maitutop ti kawes dagiti mabautisaran agpaay iti daytoy nga okasion, masapul nga ilawlawag daytoy dagiti panglakayen a natudingan a mangirepaso kadagiti saludsod iti libro nga Organisado.
◼ Panagboluntario: Ad-adda a naragsaktayo a makikombension no agboluntariotayo a tumulong kadagiti napateg a trabaho. (Ara. 20:35) Ti siasinoman a mayat nga agboluntario ket masapul nga agreport iti Volunteer Service Department iti kombension. Dagiti ubbing nga awan pay 16 ti tawenna mabalinda met ti tumulong nga agtrabaho babaen ti panangiwanwan ti nagannak wenno paraaywan kadakuada wenno ti siasinoman nga adulto a nakaitalkanda.