“Taginayonenyo a Nasayaat ti Kababalinyo iti Tengnga Dagiti Nasion”

1. Apay a napateg a taginayonentayo ti nasayaat a kababalintayo kabayatan ti um-umay a rehional a kombension?

¹ Maawis ti atension dagiti tattao kadagiti kombensiontayo iti tunggal tawen, isu a napateg nga irepresentartayo ti Dios a pagdaydayawantayo babaen ti kababalintayo. (Lev. 20:26) Ti nasayaat a kababalin agraman ti panagkawkawes ken panaglanglangatayo rumbeng nga ipabigbigna a datayo ket pudno a pasurot ni Kristo. Bayat ti itatabunotayo iti um-umay a rehional a kombension, kasanotayo a ‘mataginayon ti nasayaat a kababalintayo iti tengnga dagiti nasion’ tapno maidaydayawtayo ti nailangitan nga Amatayo?—1 Ped. 2:12.

2. Ania dagiti gundaway a maipakitatayo ti Nakristianuan a kababalin kabayatan ti kombension?

² Ipakita ti Nakristianuan a Personalidad: Ti ayat nga ipakpakitatayo iti maysa ken maysa ken ti panangtratotayo “kadagidiay adda iti ruar” ket dakkel ti nakaidumaanna iti espiritu ti kinamanagimbubukodan iti lubong. (Col. 3:10; 4:5; 2 Tim. 3:1-5) No mangantayo kadagiti restawran, masapul a nasingpet ken naanustayo uray no adda tumaud a problema. Maipakitatayo met ti nasayaat a kababalin no mangibatitayo iti tip para kadagiti nangasikaso kadatayo.

3. Ania ti maipalagip kadagiti nagannak, ken apay?

³ Dagiti nagannak aywananda koma a naimbag dagiti annakda bayat ti kaaddada iti pagkombensionan, restawran, ken pagdagusan. (Prov. 29:15) Ti manedyer iti maysa a restawran ti hotel kinunana iti maysa a pagassawaan: “Magusgustuandakayo unay. Nagsisingpet ken nakadaydayawkayo, uray dagiti annakyo. Pagsasaritaandakayo dagiti empleado. Kanayon koma nga umaykayo ditoy iti Sabado ken Domingo.”

4. Kasano koma ti panagkawkawes ken panaglanglangatayo bayat ti kaaddatayo iti lugar a pakaangayan ti kombension?

⁴ Nanakman a Panagkawkawes: Masapul a maitutop ken nanakman ti panagkawkawestayo kabayatan ti kombension, saan a kas iti nalabes nga estilo a gagangay iti lubong. (1 Tim. 2:9) Uray no agal-aliwaksaytayo sakbay ken kalpasan dagiti sesion, liklikantay koma ti kasual unay wenno saan a disente a panagkawkawes. Iti kasta, saantayo a mabain a mangisuot iti badge card-tayo ken naturedtayo a mangasaba no adda gundaway. No nasayaat ti panaglanglanga ken kababalintayo inton tumabunotayo kadagiti kombension, saan laeng a matignay dagiti nasingpet ti panagpuspusona a tattao a mangawat iti makaispal iti biag a mensahe ti Biblia no di ket mangyeg pay iti rag-o ken Jehova.—Sof. 3:17.

Dagiti Palagip Mainaig iti 2014 a Rehional a Kombension

◼ Oras ti Programa: Maluktan ti pagkombensionan iti 7:00 iti agsapa. Mangrugi ti panglukat a musika iti 8:20 iti amin a tallo nga aldaw. Iti dayta nga oras, masapul a nakatugawtayo aminen tapno mangrugi ti programa iti nadayaw ken naurnos a pamay-an. Mangrugi ti pangserra a kanta ken kararag iti 3:55 iti malem ti Biernes ken Sabado ken 2:50 iti malem ti Domingo.

◼ Panangireserba Kadagiti Pagtugawan: No mabalinen ti sumrek iti pagkombensionan iti tunggal agsapa, saankayo koma nga agdardaras a mangpili iti pagtugawanyo a kas man la makilumlumbakayo. Ti kinamanagsakripisio a mangtigtignay kadatayo a mangipangpangruna iti pagsayaatan ti sabsabali ti mangipabigbig kadatayo kas pudno a Kristiano ken mangtignay kadagiti agpalpaliiw a mangidayaw iti Dios. (Juan 13:34, 35; 1 Cor. 13:4, 5; 1 Ped. 2:12) Mabalin nga ireserba dagiti pagtugawan para laeng kadagiti kabbalayyo, kaduayo a nagbiahe iti lugan, wenno kadagiti iyad-adalanyo. Adda nairanta a pagtugawan dagiti nataengan ken baldado ngem limitado laeng dagitoy isu a maysa wenno dua laeng koma ti mangasistir ken makikatugaw iti tunggal nataengan wenno baldado.

◼ Pangngaldaw: Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a cooler ken mabuong a pagkargaan.

◼ Donasion: Maipakitatayo ti apresasiontayo kadagiti naaramid nga urnos iti kombension babaen ti panangted iti boluntario a kontribusion iti pagkombensionan para iti sangalubongan a trabaho. Aniaman a tseke a maidonar ket masapul a maipanagan iti Watch Tower.

◼ Agas: No agtomtomarkayo iti naireseta nga agas, siguraduenyo ti mangitugot iti umdas a suplayyo yantangay awan ti maalayo a kasta nga agas iti pagkombensionan. Dagiti ringgilia nga us-usaren dagiti diabetiko ket masapul a maibelleng laeng iti basuraan a namarkaan iti “hazardous.”

◼ Nakapuy ti Panagdengngegna: Iti dadduma a kombension, maipatangatang ti programa iti FM radio frequency. Tapno mangngegyo daytoy, masapul a mangitugotkayo iti bassit ken debateria nga FM receiver nga addaan iti earphone.

◼ Dagiti Porma a Please Follow Up (S-43): Masapul a masuratan ti porma a Please Follow Up iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Dagiti nasuratan a porma ket mabalin nga ited iti Book Room wenno iti sekretario ti kongregasionyo apaman a makaawidkayo.

◼ Restawran: Idaydayawyo ti nagan ni Jehova babaen ti nasayaat a konduktayo no addakayo kadagiti restawran. Agkaweskayo iti wagas a maitutop iti maysa a Kristiano a ministro. Mangtedkayo iti tip no gagangay dayta iti lugaryo.

◼ Panagboluntario: Ti siasinoman a mayat nga agboluntario ket masapul nga agreport iti Volunteer Service Department iti kombension. Dagiti ubbing nga awan pay 16 ti tawenna ket mabalin met a tumulong nga agtrabaho babaen ti panangiwanwan ti nagannak, ti paraaywan kadakuada, wenno ti siasinoman nga adulto a nakaitalkanda.