Surotenyo ti Kristo Babaen ti Panangiparangarang iti Dayaw
1. Kasano a ti tema ti kombension iti daytoy a tawen ket mainaig iti panangiparangarang iti dayaw?
1 Kuna ti Biblia a ni Jehova a Soberano iti Uniberso ket nakawesan iti dayaw. (Sal. 104:1) Kanayon a nagsao ken nagtignay ni Jesus iti wagas a pakaidayawan ni Amana ken dagiti probision ni Amana. (Juan 17:4) Addaan ti tunggal maysa kadatayo iti gundaway a mangtulad kenni Jesus ken mangidaydayaw kenni Jehova bayat dagiti mapaspasungad a “Surotenyo ti Kristo!” a Kombension Distritotayo.
2. Kasano a pakaidayawan ni Jehova ti panagsaganatayo a tumabuno iti tunggal sesion?
2 Panagdaydayaw a Napnuan iti Panagraem: Maidaydayawtayo ni Jehova babaen ti panangaramidtayo kadagiti urnos tapno matabunnuantayo ti naespirituan a padaya nga insagana ni Jehova agpaay kadatayo. Nakapagpakadakayo kadin iti amoyo ken naurnosyon ti eskediulyo tapno matabunuanyo ti kombension, agraman ti Biernes? Naiplanoyo kadin ti sumangpet a nasapa tapno makapilikayo iti pagtugawan ken makiramankayo iti panglukat a kanta ken kararag? Naiplanoyo kadin no ania ti pangngaldawyo tapno agkakaduakayo kadagiti kakabsat a mangan iti pagkombensionan? Iti rugi ti tunggal sesion, ket ibaga ti tserman nga agsimpatayon iti pagtugawantayo sakbay a mangrugi ti musika, masapul nga agulimek ken agtugawtayon para iti panangrugi ti programa.
3. Kasano a ti panagimdengtayo a naimbag iti programa ipakitana nga agdaydayawtayo buyogen ti panagraem?
3 Maidaydayaw met ti nailangitan nga Amatayo no agimdengtayo a naimbag iti programa. Ti maysa a reporter a nakapaliiw iti kombension distrito iti lugarda insuratna a sigurado nga apresiaren dagiti agpalpaliiw “ti mapagwadan a kababalin dagidiay timmabuno, bayat nga im-imdenganda a naimbag dagiti palawag, a mangipakita nga ipatpategda dagiti naespirituan a bambanag.” Kinomentuanna pay “ti adu a bilang dagiti ubbing . . . , a nakataltalna wenno okupado pay ketdi a mangbirbirok kadagiti teksto iti Nasantuan a Biblia.” Kabayatan ti programa, saan a panawen dayta para iti panagsasarita, panag-text, pannangan, wenno panagpagnapagna kadagiti pasilio. Dagiti agtutubo masapul a makikatugawda kadagiti dadakkelda tapno matulongan ida dagiti dadakkelda a magunggonaan iti programa. (Deut. 31:12; Prov. 29:15) Dagiti kasta a panagregget ipakitana a raraementayo dagiti sabsabali ken ap-apresiarentayo ti naidasar a napateg a naespirituan a taraon.
4. Apay a rumbeng a nadayaw ti panaglanglangatayo bayat ti kombension?
4 Nadayaw a Panaglanglanga: Adu ti nangyebkas iti apresasion kadagiti palagip iti palawag iti kombension distrito idi napan a tawen. Napauluan daytoy iti “Nadayawkayo Koma iti Amin a Tiempo.” Naipaganetget ditoy a dagiti adipen ti Dios masapul nga ikagumaanda ti agbalin a nadayaw iti panagkawkawes ken panaglanglangada. Iti daytoy a tawen, nasken nga ipaayantayo manen iti atension daytoy a banag. Ti panaglanglangatayo iparangarangna no ania ti riknatayo kenni Jehova ken iti pribilehio nga agbalin a Saksina. Kanayon koma nga agkawestayo kas kadagidiay “agkunkuna nga agraemda unay iti Dios.”—1 Tim. 2:9, 10.
5. Kasanotayo a mataginayon ti nadayaw a panaglanglanga uray no agal-aliwaksaytayo iti siudad a pakaangayan ti kombension?
5 Bayat laeng kadi ti itatabunotayo iti programa nga iparangarangtayo ti nadayaw a panaglanglanga? Laglagipenyo nga adu ti makapaliiw iti badge card iti kombensiontayo bayat ti kaaddatayo iti siudad a pakaangayan ti kombension. Masapul ngarud a naiduma ti panaglanglangatayo no idilig iti publiko. Gapuna, uray no agal-aliwaksaytayo, kas koma no rummuartayo a mapan mangan kalpasan ti programa, masapul nga agkawestayo kas maitutop kadagiti ministro nga adda iti dayta a siudad tapno tumabuno iti Nakristianuan a kombension ken saantayo nga agusar kadagiti maong, shorts, wenno T-shirt. Dakkel a pammaneknek ti maipaay daytoy iti komunidad! Maay-ayo ni Jehova no ti panaglanglangatayo iparangarangna ti akemtayo kas ministro.
6. Ania dagiti positibo a resulta ti panagbalin a nadayaw?
6 Dagiti Makapnek a Resulta: Ti panagbalin a nadayaw bayat dagiti kombensiontayo ket mangilukat kadagiti gundaway tapno makakasabatayo iti di pormal ken mangibati iti nasayaat nga impresion kadagiti tattao a makapaliiw kadatayo. Kalpasan ti kombension, kinuna ti maysa nga opisial: “Awan pay ti tattao a nakitami a kastoy ti kasayaat ti kababalinda. Agtigtignaykayo iti wagas a kayat ti Dios.” Ti panagbalin a nadayaw ipakitana a raraementayo ken ipatpategtayo ti maysa ken maysa ken pakaidayawan dayta ni Jehova. (1 Ped. 2:12) Iparangarangna ti nadiosan a panagbutengtayo ken ti panangapresiartayo iti pribilehio nga agpaisuro iti Amatayo. (Heb. 12:28) Sapay koma ta ikagumaantayo ti agbalin a nadayaw bayat a paspasungadantayo ti “Surotenyo ti Kristo!” a Kombension Distrito iti daytoy a tawen.
[Kahon iti panid 5]
Dagiti Palagip Maipapan iti Kombension Distrito
◼ Oras ti Programa: Mangrugi iti 8:20 ti bigat ti programa iti tallo nga aldaw. No maipatokaren ti panglukat a musika ti Pagarian, masapul a nakatugawtayo aminen tapno mangrugi ti programa iti nadayaw a pamay-an. Agngudo ti programa iti 4:05 iti malem ti Biernes ken Sabado ket 4:10 iti malem ti Domingo.
◼ Paradaan: Yantangay gagangay a limitado dagiti espasio iti pagparadaan, agkakalugankayo laeng koman no mabalbalin.
◼ Panangireserba Kadagiti Pagtugawan: Mabalin nga ireserba dagiti pagtugawan kadagiti laeng kaduayo a nagbiahe iti luganyo wenno kadagiti kabbalayyo.
◼ Pangngaldaw: Pangngaasiyo ta agbalonkayo iti pangngaldaw imbes a pumanawkayo iti pagkombensionan tapno gumatang iti pangngaldaw. Mabalin ti agusar iti bassit a cooler a maipasirok iti tugawyo. Saan a maipalubos iti pagkombensionan dagiti dadakkel a pagkargaan iti taraon, mabuong a pagkargaan, ken dagiti naingel nga inumen.
◼ Donasion: Dakkel dagiti paggastuan iti panagisagana iti kombension distrito. Maipakitatayo ti apresasiontayo babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti kombension. Aniaman a tseke a maidonar iti kombension ket masapul a maipanagan iti “Watch Tower.”
◼ Panagirekord: Aniaman nga alikamen a pagirekord ket saan a mabalin nga ikonektar iti koriente wenno iti alikamen a pangpapigsa iti timek iti pasilidad ken mausar laeng dagita iti pamay-an a saan a makasinga kadagiti sabsabali.
◼ Dagiti Porma a Follow-Up: Masapul a masuratan ti porma a Please Follow Up (S-43) iti panangipaay iti impormasion maipapan iti siasinoman a mangipakita iti interes kas resulta ti di pormal a panangasabatayo bayat ti kombension. Mangitugot koma dagiti agibumbunannag iti maysa wenno dua a kopia ti porma a follow-up bayat ti kombension. Dagiti nasuratan a porma ket mabalin nga ited iti Departamento a Pagalaan iti Libro wenno iti sekretario ti kongregasionyo apaman a makasublikayo iti kongregasionyo.—Kitaenyo ti Pebrero 2005 a Ti Ministeriotayo iti Pagarian, p. 6.