Idaydayawyo ni Jehova iti Dakkel a Kongregasion
1, 2. Ania a gundaway ti ipaay kadatayo ti kombension distrito, ken ania dagiti pamay-an tapno maaramidtayo dayta?
1 Dagiti tinawen a kombension distritotayo ket mangipaay kadatayo iti naisangsangayan a gundaway a mangidaydayaw ken ni Jehova. Mariknatayo ti kas iti narikna ni David a nangikanta: “Idayawkanto iti dakkel a kongregasion; iti tengnga ti ili a nakaad-adu idaydayawkanto.” (Sal. 35:18) Iti mapaspasungad a “Panagtulnog iti Dios” a Kombension Distrito, kasanotayo a masigurado a kas nagkaykaysa a tattao, maidaydayawtayo a sangsangkamaysa ni Jehova?
2 Ti maysa a pamay-an a maaramidtayo daytoy ket babaen ti kababalintayo. Ti administrasion ti maysa a pasilidad ti kombension kinunana: “Maipapan kadagiti kombensionyo, imbagami kadagiti dadduma a relihioso a grupo a mayat a mangabang iti pasilidad nga umayda kitaen ti panangangay dagiti Saksi ni Jehova iti kombensionda, ta nakasaysayaat ti urnosda.” Babaen ti panaglanglanga, pannakitunos, ken kababalintayo, adda maitulong ti tunggal maysa kadatayo tapno umawattayo kadagiti kasta a nagsayaat a pammadayaw, a maitutop nga agpaay iti Diostayo.—1 Ped. 2:12.
3, 4. Kasano a tulongannatayo ti kinaemma nga agkawes iti wagas a maitutop kadagiti Kristiano a ministro, agpada iti kombension ken kalpasan dagiti sesion?
3 Panaglanglanga: Nasken a naemmatayo tapno pakaidayawan ni Jehova ti panagkawkawes ken panaglanglangatayo. (1 Tim. 2:9) Kuna ti libro nga Eskuelaan ti Panagministro, panid 132: “Ti tao a naemma ket maseknan iti saanna a panangsair kadagiti sabsabali ken panangiturong iti di maiparbeng nga atension iti bagina.” Iti adu a pagilian, gagangayen dagiti di natakneng a kawes. Nupay kasta, apresiaren ni Jehova ti panangikagumaantayo a mangirepresentar kenkuana iti umiso a pamay-an. (Ara. 15:14) Nupay mabalin a maangay ti kombension iti sports center wenno pasilidad a paglinglingayan, ti taripnong ket agbalin a ‘dakkel a kongregasiontayo’ bayat ti tallo nga aldaw a kombension. Gapuna, bayat nga agtataripnongtayo iti imatang ni Jehova, masapul a nadayaw ti kawestayo maigapu iti kangatuan a Persona iti uniberso.—1 Cron. 29:11.
4 Nasken met nga asikasuentayo ti panaglanglangatayo kalpasan ti sesion iti tunggal aldaw. Nupay mabalin a tarigagayantayo ti agkawes iti mas komportable bayat ti panaglinglingay wenno pannangantayo iti restawran, masapul a maitutop latta ti kawes ken panaglanglangatayo kas maiparbeng kadagidiay “agkunkuna nga agraemda unay iti Dios.” (1 Tim. 2:10) Ti maitutop a kawes ket saan nga agpannuray iti no ania ti nalatak iti lubong. (1 Juan 2:16, 17) Mangipaay dagiti Nakristianuan a publikasiontayo kadagiti makatulong nga ilustrasion maipapan iti kinaemma ken naurnos a kawes dagiti lallaki ken babbai iti nadumaduma a kasasaad. Ti panangusar kadagiti badge card-tayo bayat ti kaaddatayo iti siudad a pakaangayan ti kombension ket agserbi kas palagip a Kristiano a ministrotayo iti amin a tiempo.—2 Cor. 6:3, 4.
5. Ania a nasayaat nga ulidan ti impakita dagiti umili idi kaaldawan ni Esdras?
5 Raemenyo ti Lamisaan ni Jehova: Iti kaaldawan ni Esdras idi isagsaganana a basaen ti Kasuratan, ‘timmakder dagiti umili’ kas panagraem ken panangsegga kadagiti bilin nga awatenda. “Ti laplapayag dagiti amin nga umili siiimdeng” bayat nga agbasbasa ni Esdras. (Neh. 8:3, 5, 6) Binigbigda a ni Jehova ti makisarsarita kadakuada, ket daytoy ti nangtignay kadakuada nga umimdeng a sidadayaw. Matignaytay kadi met a mangaramid iti kasta bayat dagiti kombensiontayo?
6, 7. Kasano a maipakitatayo ti panagraem iti naespirituan a lamisaan ni Jehova?
6 Ti Soberano nga Apo iti uniberso insaganaannatayo iti padaya. (Isa. 25:6; 1 Cor. 10:21) No tagipatgentayo unay ti lugartayo iti sango ti naespirituan a lamisaan ni Jehova, ikagumaantayo a tabunuan ti tallo nga aldaw a kombension. Nayurnosyo kadin ti pagdagusan, pagluganan, ken panagbakasionyo iti sekular a panggedanyo? Nakailatangkayo kadin iti umdas a tiempo para iti panagsagana ken panagbiahe tapno nasapakayo a sumangpet iti pagkombensionan ken makabirokkayo kadagiti pagtugawan, makilangen kadagiti kakabsatyo, ken makiraman kadakuada a mangidayaw ken ni Jehova iti panglukat a kanta ken kararag?—Sal. 147:1.
7 Ti panagraem iti lamisaan ni Jehova ti mangtignay kadatayo nga umimdeng a naimbag iti programa ken mangliklik iti saan a nesesita a pannakisarita kadagiti sabsabali, panagsaramsam, wenno panagpagnapagna kadagiti pasilio no manarimaan ti sesion. Babaen ti klase matalek ken masirib nga adipen, mangipapaay ni Jehova iti naespirituan a taraon a kasapulantayo ita. (Mat. 24:45) Saantayo koma a liwayan ti aniaman kadagitoy. Dagiti nagannak masapul a katugawda dagiti annakda ken tulonganda ida a magunggonaan a naan-anay.—Deut. 31:12.
8. Ania ti makiddaw nga aramidentayo bayat ti pangngaldaw, ken apay?
8 Makiddaw nga agbalontayo iti pangngaldaw imbes a pumanawtayo iti pagkombensionan tapno gumatang iti taraon bayat ti pangngaldaw. Makomendaran ta kaaduan a delegado ti nangsurot a naimbag iti daytoy nga instruksion iti kombension idi napan a tawen. Anian a nagsayaat no kasta ti aramiden ti amin iti daytoy a tawen! (Heb. 13:17) Mangipaay daytoy nga urnos iti nagsayaat a gundaway tapno matagiragsaktayo ti makapabileg a pannakilangen kadagiti kakabsattayo ken makatulong a mangtaginayon iti panagkaykaysa ken natalna a panaglalangentayo a pakaidayawan ni Jehova.—Sal. 133:1.
9, 10. Ania a kanayonan a gundaway a mangidayaw ken ni Jehova ti ipaay kadatayo ti kombension?
9 Di Pormal a Panangasaba: Bayat ti panagbiahetayo nga agpapan ken agawid manipud iti pagkombensionan, adu ti gundawaytayo a mangidaydayaw ken ni Jehova babaen ti bibigtayo. (Heb. 13:15) Mangmangantayo man iti restawran wenno makisarsaritatayo iti agtartrabaho iti hotel, mangbiroktayo kadagiti gundaway a mangasaba. Iti kombension, mapnonto kadagiti naespirituan a gameng ti isip ken pusotayo. Iranudtayo dagitoy nga agkakaimbag a bambanag kadagidiay mairana a masarakantayo.—1 Ped. 3:15.
10 Sigagagar a segseggaantayo daytoy a gundaway a mangidayaw ken ni Jehova iti “tengnga dagiti naguummong a reprep.” (Sal. 26:12) Sapay koma ta sangsangkamaysa nga idayawtayo ni Jehova iti “Panagtulnog iti Dios” a Kombension Distrito.
[Kahon iti panid 5]
Dagiti Palagip Maipapan iti Kombension Distrito
◼ Oras ti Programa: Mangrugi ti programa iti 8:30 iti bigat ti Biernes ken Sabado, ken 9:00 iti bigat ti Domingo. Sumagmamano a minuto sakbay a mangrugi ti sesion, agtugaw ti tserman iti plataporma bayat a maipatokar ti panglukat a musika ti Pagarian. Masapul a nakatugawtayo aminen iti dayta nga oras tapno mangrugi ti programa iti nadayaw a pamay-an. Agngudo ti programa iti 4:35 iti malem ti Biernes ken Sabado ket 4:10 iti malem ti Domingo.
◼ Paradaan: Kadagiti amin a pagkombensionan ikagumaantayo ti mangaramid kadagiti urnos iti pagparadaan. Dagiti addaan lugan tungpalenda koma ti panangiwanwan dagiti parking attendant tapno naan-annayas ti bambanag kadagiti sabsabali. Yantangay gagangay a limitado dagiti espasio iti paradaan, agkakalugankayo koman imbes a maysa wenno dua laeng ti agsakay iti kada lugan.
◼ Panagireserba Kadagiti Pagtugawan: Mabalin nga ireserba dagiti pagtugawan kadagiti laeng kaduayo iti luganyo wenno kadagiti kabbalayyo.
◼ Donasion: Adda dagiti paggastuan iti panagisagana iti kombension distrito. Maipakitatayo ti apresasiontayo babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti kombension. Aniaman a tseke a maidonar iti kombension ket masapul a maipanagan iti “Watch Tower.”
◼ Pangngaldaw: Pangngaasiyo ta agbalonkayo iti pangngaldaw imbes a pumanawkayo iti pagkombensionan tapno gumatang iti taraon bayat ti pangngaldaw. Mabalin ti agusar iti bassit a cooler a maipasirok iti pagtugawan. Saan a maipalubos iti pagkombensionan dagiti dadakkel a pagkargaan iti taraon, mabuong a pagkargaan, ken dagiti naingel nga inumen.
◼ Alikamen a Pagirekord: Aniaman nga alikamen a pagirekord ket saan a mabalin nga ikonektar iti koriente wenno sound system ti pasilidad ken mausar laeng dagita iti pamay-an a saan a makasinga kadagiti sabsabali.
◼ Bautismo: Nakatugaw koman dagiti kandidato ti bautismo iti naituding a benneg sakbay a mangrugi ti programa iti agsapa ti Sabado. Mangitugot koma ti tunggal maysa iti nanakman a pagbabasa ken tualia. Tapno sigurado a maitutop iti okasion dagiti kawesda, iraman koma daytoy dagiti panglakayen iti panangirepasoda kadagiti saludsod iti libro nga Organisado kadagiti kandidato.
◼ Dagiti Badge Card: Pangngaasiyo ta usarenyo a kanayon ti badge card bayat nga addakayo iti pagkombensionan ken bayat nga agbiahekayo a mapan ken agawid. Maala dagitoy iti kongregasionyo. Diyo ipaturay a sakayto la agkiddaw iti card-yo a sangapamiliaan no sumagmamano la nga aldawen sakbay ti kombension.
◼ Panagretrato: No agretratokayo, saankayo nga agusar iti flash bayat dagiti sesion.
◼ Dagiti Pager ken Cell Phone: Masapul a maiddep dagitoy tapno saan a makasinga.
◼ Dagiti Aksidente ken Emerhensia: No adda emerhensia iti pagkombensionan, pangngaasiyo ta makiumankayo iti attendant nga adda iti asideg, ta isu ti mangipakaammo a dagus iti First Aid Department. Ti agas-asikaso iti first-aid iti pagkombensionan kitaenna no nakaro ti situasion ken mangipaay iti tulong.