Agtultuloykayo a Manginanama ken Jehova

1. Ania ti tema ti kombension, ken apay a naintiempuan dayta?

¹ “Ni Jehova maysa a Dios ti panangukom,” insurat ni Isaias. “Naragsak amin dagidiay mangin-inanama kenkuana.” (Isa. 30:18b) Adu ti salaysay ti Biblia maipapan iti panangdadael ti Dios kadagiti kabusorna ken iti panangispalna kadagiti matalek nga adipenna. Ania ti isuro dagita a salaysay kadagiti agdaydayaw ken ni Jehova iti kaaldawantayo? Ania ti mabalin nga aramidentayo ita kas panagsagana iti “naindaklan ken nakaam-amak nga aldaw ni Jehova”? (Joel 2:31, 32) Ti paspasungadentayo nga “Asidegen ti Pannakaisalakan!” a Kombension Distrito tignayennatayo a mangutob kadagitoy a saludsod ken mangsukimat iti bagitayo. Tulongannatayo daytoy nga agtultuloy a manginanama ken Jehova.

2. Kasano a maipakitatayo ti apresasiontayo iti kombension distritotayo?

² Nakaaramidkayo kadin kadagiti urnos tapno magunggonaankayo iti tallo nga aldaw a kombension? Kas pagarigan, nakapagpakadakayo kadin iti amoyo nga agbakasionkayo iti trabahoyo tapno makatabunokayo? Diyo itungtungkua daytoy. Agkararagkayo sakbay a makisaritakayo. (Neh. 2:4, 5) Umasping iti dayta, iyurnostayo a nasaksakbay ti pagluganan, pagdagusan, ken dadduma pay a napateg a banag a kasapulantayo. Ti kasta a nasayaat a panagplano iparangarangna ti nauneg nga apresasiontayo iti naespirituan a lamisaan ni Jehova. Nasken nga alerto dagiti panglakayen a mangbadang kadagidiay agkasapulan iti tulong mainaig iti panagsaganada a tumabuno iti kombension, nangruna kadagidiay lallakay ken babbaket iti kongregasion.—Gal. 6:10.

3. Ania dagiti galad a nasken nga iparangarang dagiti adipen ni Jehova iti lugar a pagkombensionan?

³ Pakaidayawan ti Dios ti Nasayaat a Kondukta: Ti nasayaat a konduktatayo ket agserbi kas pangsaksi iti komunidad no agtataripnongtayo kadagiti dadakkel a kombension. Ania ti maiparbeng nga aramidentayo? No addatayo kadagiti restawran ken iti dadduma pay a lugar ti negosio nga asideg iti pagkombensionan, makaay-ayo koma ti pannakilangentayo gapu iti panangipakitatayo kadagiti Nakristianuan a galad, kas iti mabayag a panagitured, kinaalumamay, panagteppel, ken kinanainkalintegan. (Gal. 5:22, 23; Fil. 4:5) Rumbeng nga iparangarangtayo amin ti kita ti ayat a “saan a naalas ti panagtigtignayna, saanna a sapulen dagiti bukodna a pagimbagan, saan a magargari nga agpungtot.” Uray no adda tumaud a parikut wenno pakarigatan, kayattayo nga ‘aramiden ti amin a bambanag a maipaay iti dayag ti Dios.’—1 Cor. 10:31; 13:5.

4. Kasano a dagiti nagannak matulonganda dagiti annakda nga agtignay iti wagas a pakaidayawan ni Jehova?

⁴ Kalpasan ti maysa a kombension, inapresiar unay ti maysa a manedyer ti hotel ti kondukta ken panaglanglanga dagiti agtutubotayo ta uray la kinunana a kayatna a kanayon koma nga adda Saksi ni Jehova nga agdagus iti hotel. Anian a makaparag-o dayta! Maigapu daytoy iti panangsanay ken panangiwanwanyo a nagannak. Saan a nainsiriban a dagiti nagannak baybay-anda lattan dagiti annakda nga agbukbukod dagitoy kadagiti pagdagusanda. Masapul a kanayon nga aywananda a naimbag dagiti annakda. (Prov. 29:15) Sapay koma ta ti nasayaat a konduktada ket pakaidayawan ni Jehova ken mangparag-o iti pusona!—Prov. 27:11.

5. Kasano a maidaydayawtayo ni Jehova babaen ti panagkawkawes ken panaglanglangatayo?

⁵ Naemma a Panagkawkawes ken Panaglanglanga: Adda maitulong ti tunggal maysa kadatayo a mangpasayaat iti pakasarsaritaan ti kombension babaen ti panangliklik kadagiti estilo ti panagkawkawes ken panaglanglanga nga uso, nalabes, naalas, wenno saan a natakneng. Agaplikar daytoy bayat ti panagdaliasattayo a mapan ken agawid manipud iti pagkombensionan, bayat a tumultulongtayo a mangisagana iti pagkombensionan, ken kabayatan dagiti sesion. Kas ad-adipen ti Dios, ti nagan ken reputasion ni Jehova ti kangrunaan a pakaseknantayo, saan ket a ti kayat ken pagnam-ayantayo. Responsabilidad dagiti ulo ti pamilia a siguraduen a kanayon koma a naemma ken nanakman ti panaglanglanga ti pamiliada.—1 Tim. 2:9.

6. Uray iti tiempo ti panagaliwaksay, apay a rumbeng a taginayonentayo ti nadayaw a langa nga iparparangarangtayo no addatayo iti pagkombensionan?

⁶ Napateg met a taginayonen ti nadayaw a langa bayat ti panagaliwaksay kadagiti pagtagilakuan ken restawran. Maitutop nga usarentayo dagiti kawestayo a nakikombension no mangantayo kalpasan dagiti sesion. Ti panangisuottayo kadagiti badge card ket mangted kadatayo iti gundaway a mangasaba iti di pormal.—2 Cor. 6:3, 4.

7. Kasanotayo a makatulong iti kinaurnos ken rag-o ti kombension? (Kitaenyo ti “Dagiti Palagip Maipapan iti Kombension Distrito.”)

⁷ Impadto ni Isaias: “Ni Jehova mangin-inanamanto a maipaayannakayo iti parabur, ket ngarud isu tumakderto tapno ipakitaannakayo iti asi.” (Isa. 30:18a) Ti panangapresiar iti asi ni Jehova ken ti di kaikarian a kinamanangngaasina rumbeng a tignayennatayo a mangidayaw kenkuana babaen ti kondukta ken panaglanglangatayo bayat nga agtataripnongtayo kadagiti kombensiontayo. Sapay koma ta ti “Asidegen ti Pannakaisalakan!” a Kombension Distrito idaydayawna ti Diostayo ken tulongannatayo nga agtultuloy a manginanama kenkuana!

[Kahon iti panid 5]

Dagiti Palagip Maipapan iti Kombension Distrito

◼ Oras ti Programa: Mangrugi ti tallo nga aldaw a programa iti 8:30 ti bigat. Sumagmamano a minuto sakbay a mangrugi ti sesion, agtugaw ti tserman iti plataporma bayat a maipatokar ti panglukat a musika ti Pagarian. Masapul a nakatugawtayo aminen iti dayta nga oras tapno mangrugi ti programa iti nadayaw a pamay-an. Agngudo ti programa iti 4:15 iti malem ti Biernes, 4:05 iti malem ti Sabado, ken 4:10 iti malem ti Domingo.

◼ Paradaan: Kadagiti amin a pagkombensionan ikagumaantayo ti mangaramid kadagiti urnos iti pagparadaan. Dagiti addaan lugan tungpalenda koma ti panangiwanwan dagiti parking attendant tapno naan-annayas ti bambanag kadagiti sabsabali. Yantangay gagangay a limitado dagiti espasio ti paradaan kadagiti pagkombensionan, agkakalugankayo koman imbes a maysa wenno dua laeng ti agsakay iti kada lugan.

◼ Panagireserba Kadagiti Pagtugawan: Mabalin nga ireserba dagiti pagtugawan kadagiti laeng kaduayo iti lugan wenno kadagiti kabbalayyo.

◼ Pangngaldaw: Pangngaasiyo ta agbalonkayo iti pangngaldaw imbes a pumanawkayo iti pagkombensionan tapno gumatang iti taraon bayat ti pangngaldaw. Mabalin ti agusar iti bassit a cooler a maipasirok iti pagtugawan. Saan a maipalubos iti pagkombensionan dagiti dadakkel a pagkargaan iti taraon, mabuong a pagkargaan, ken dagiti naingel nga inumen.

◼ Donasion: Dakkel ti paggastuan iti panagisagana iti kombension distrito. Maipakitatayo ti apresasiontayo babaen ti panangted iti boluntario a kontribusion iti sangalubongan a trabaho iti Kingdom Hall-tayo wenno iti kombension. Aniaman a tseke a maidonar iti kombension ket masapul a maipanagan iti “Watch Tower.”

◼ Aksidente ken Emerhensia: No adda medikal nga emerhensia iti pagkombensionan, pangngaasiyo ta makiumankayo iti attendant nga adda iti asideg, ta isu ti mangipakaammo a dagus iti First Aid Department. Ti agas-asikaso iti first-aid iti pagkombensionan kitaenna no nakaro ti situasion ken mangipaay iti tulong.

◼ Panagirekord: Aniaman nga alikamen a pagirekord ket saan a mabalin nga ikonektar iti koriente wenno sound system ti pasilidad ken mausar laeng dagita iti pamay-an a saan a makasinga kadagiti sabsabali.

◼ Panagretrato: No agretratokayo bayat dagiti sesion, pangngaasiyo ta dikay agusar iti flash.

◼ Pager ken Cell Phone: Masapul a maiddep dagitoy tapno saan a makasinga.

◼ Porma a Please Follow Up: Mausar ti porma a Please Follow Up (S-43) a mangipaay iti impormasion maipapan iti siasinoman a mangipakita iti interes iti panangasabatayo iti di pormal bayat ti kombension. Masapul a mangitugot dagiti agibumbunannag iti maysa wenno dua a Please Follow Up a porma bayat ti kombension. Dagiti nasuratan a porma ket mabalin nga ited iti Book Room wenno iti sekretario iti kongregasion apaman a makasublikayo iti kongregasionyo.—Kitaenyo ti Pebrero 2005 a Ti Ministeriotayo iti Pagarian, p. 6.

◼ Dagiti Badge Card: Pangngaasiyo ta usarenyo a kanayon ti badge card bayat nga addakayo iti pagkombensionan ken bayat nga agbiahekayo a mapan ken agawid. Maala dagitoy iti kongregasionyo. Diyo ipaturay a sakayto la agkiddaw iti card-yo a sangapamiliaan no sumagmamano la nga aldawen sakbay ti kombension.

◼ Bautismo: Nakatugaw koman dagiti kandidato ti bautismo iti naituding a benneg sakbay a mangrugi ti programa iti agsapa ti Sabado. Mangitugot koma ti tunggal maysa iti nanakman a pagbabasa ken tualia. Tapno sigurado a maitutop iti okasion dagiti kawesda, iraman koma daytoy dagiti panglakayen iti panangirepasoda kadagiti saludsod iti libro nga Organisado kadagiti kandidato.