“Itandudotayo a Sangsangkamaysa ti Naganna”
1. Iti ania a gundaway a maitandudotayo a sangsangkamaysa ti nagan ti Dios, ket ania ti mabalintayo nga aramiden itan kas panagsagana?
1 “O itan-okyo ni Jehova a maibuyog kaniak, ket itandudotayo a sangsangkamaysa ti naganna,” inkanta ti salmista. (Sal. 34:3) Ti mapaspasungad a “Makipagnakayo iti Dios” a Kombension Distrito ikkannatayo iti gundaway a mangitandudo iti nagan ni Jehova a kaduatayo dagiti kakabsattayo manipud kadagiti adu a kongregasion. Nayurnosyo kadin dagiti pagdagusan, pagluganan, ken panagbakasionyo iti sekular a trabahoyo? Nainsiriban no asikasuentayo dagitoy a nasaksakbay.—Prov. 21:5.
2. Apay a nasayaat no iplanotayo ti sumangpet a nasapa iti pagkombensionan?
2 Isasangpet iti Pagkombensionan: Makatulong kadatayo ti nasapa a panagrubbuat a mapan iti pagkombensionan tapno maliklikantayo dagiti saan a nasken a pakataktakan ken tapno makabiroktayo iti pagtugawan ken naimpusuan a makipasettayo iti panglukat a kanta ken kararag. (Sal. 69:30) Sumagmamano a minuto sakbay a mangrugi ti sesion, agtugawen ti tserman iti plataporma bayat a maipatpatokar ti kanta ti Pagarian. Nakatugawtayo koma aminen iti dayta nga oras tapno mangrugi ti programa iti nadayaw a pamay-an.—1 Cor. 14:33, 40.
3. Kasanotayo a maipakita ti konsiderasion kadagiti sabsabali no mangbiroktayo kadagiti pagtugawantayo?
3 Idagadag kadatayo ti Sao ti Dios a ‘maaramid koma ti amin nga aramidtayo buyogen ti ayat.’ (1 Cor. 16:14) No datayo ti umuna a sumangpet iti pagkombensionan, mangipakitatayo iti konsiderasion babaen ti saan a panagtaray, panagdardaras, wenno panagiduron tapno laeng makatugawtayo iti kayattayo a pagtugawan sakbay a matugawan dayta dagiti dadduma. Mabalin nga ireserba dagiti pagtugawan kadagiti laeng kaduayo a nagbiahe iti luganyo wenno kadagiti kabbalayyo.—1 Cor. 13:5; Fil. 2:4.
4. Ania dagiti urnos para iti pangngaldaw, ken apay a makagunggona daytoy?
4 Pangngaasiyo ta agbalonkayo iti pangngaldawyo imbes a pumanawkayo iti pagkombensionan tapno gumatang iti taraon bayat ti pangngaldaw. Daytoy ti mangted kadatayo amin iti gundaway a mangtagiragsak iti makapabileg a panaglalangen ken marugiantayo ti sesion iti malem. No kasapulan, mabalin nga usaren ti bassit a pagkargaan iti taraon a mabalin nga ipasirok iti pagtugawan. Saan a maipalubos iti pagkombensionan dagiti dadakkel a pagkargaan iti taraon, mabuong a pagkargaan, ken dagiti naingel nga inumen.
5. Kasanotayo a ‘maaramid ti naimbag’ kadagiti lallakay ken babbaket ken nakapuy ti salun-atda?
5 Kadagiti kombensiontayo, adda dagiti nairanta a pagtugawan dagiti lallakay ken babbaket wenno dagiti nakapuy ti salun-atda. Impalagip ni apostol Pablo kadagiti kongregasion idiay Galacia nga ‘aramidenda koma ti naimbag kadagiti amin, ngem nangnangruna kadagidiay nainaig kadakuada iti pammati.’ (Gal. 6:10) Mabalin a saan nga agpatulong dagiti lallakay ken babbaket wenno dagiti nakapuy ti salun-atda a kakabsat, agsolsolo a nagannak, wenno dagidiay adda iti amin-tiempo a serbisio, ngem mabalin nga adda dagiti karit a daeranda tapno makatabunoda iti kombension. Kabaelam kadi ti ‘mangaramid iti naimbag’ ken tumulong kadakuada?
6. Kasanotayo a maisagana ti pusotayo iti instruksion nga awatentayo?
6 Agur-uray Kadatayo ti Naespirituan a Padaya: Maysa ni Ari Jehosafat a ‘nangisagana iti pusona tapno birokenna ti pudno a Dios.’ (2 Cron. 19:3) Kasanotayo a maisagana ti pusotayo sakbay ti kombension? Dagiti artikulo iti maudi a panid ti Oktubre 22 ken Nobiembre 8, 2004 a ruar ti Agriingkayo! ket mangted iti pamalatpatan iti maidasar a naespirituan a padaya. Apay a dimo iwayaan nga utoben dagidiay nga artikulo a mangpatanor iti panangsegga iti isagsagana kadatayo ni Jehova? Ti panangisagana iti pusotayo ramanenna met ti panagpatulongtayo ken ni Jehova tapno maalatayo ti kababagas ken mayaplikartayo ti instruksion nga awatentayo.—Sal. 25:4, 5.
7. Ania ti tarigagayantayo, ken apay?
7 Tarigagayantayo amin ti agsursuro iti ad-adu pay manipud iti Sao ti Dios, a bigbigentayo a babaen daytoy dumakkeltayo nga agturong iti pannakaisalakan. (1 Ped. 2:2) Gapuna, tabunuantayo ti “Makipagnakayo iti Dios” a Kombension Distritotayo ken ‘itandudotayo a sangsangkamaysa ti nagan ni Jehova.’—Sal. 34:3.
[Kahon iti panid 3]
Dagiti Pamay-an a Mangitandudo iti Nagan ti Dios
◼ Nasapa a panagplano
◼ Mangipakita iti ayat kadagiti sabsabali
◼ Isaganam ti pusom