Agimdeng ken Agsursuro

1. Apay a mabalin a kasapulan ti ad-adda a panagregget tapno makapagimdeng ken makasursurotayo iti kombension distrito?

¹ Dandanin mangrugi ti 2013 kombension distrito. Nagadu a trabaho ti naaramid iti panagisagana iti programa agpaay iti agdama a kasapulan dagiti kakabsat iti intero a lubong. Nayurnosyo kadin a matabunuan ti amin a tallo nga aldaw a kombension? Mabalin nga adu ti pakasingaan kadagiti dadakkel a kombension, isu a kasapulan ti ad-adda a panagregget tapno makapagimdeng a naimbag iti programa. Gapu ta napapaut dagiti sesion ngem kadagiti gimong iti kongregasion, masapul a napapaut ti konsentrasiontayo. Mabalin a makabannog met ti biahe ken dadduma pay a banag. Ania ti makatulong kadatayo nga agtalinaed nga alerto tapno makapagimdeng ken makasursurotayo?—Deut. 31:12.

2. Kasanotayo a maisagana ti pusotayo para iti programa ti kombension?

² Sakbay a Mangrugi ti Kombension: Adda iti opisial a Web site-tayo a www.jw.org/ilo ti programa ti kombension, a pakairamanan dagiti paulo ti amin a palawag ken ti maysa wenno dua a kangrunaan a teksto para iti tunggal palawag. No adda koneksiontayo iti Internet, makatulong ti nasaksakbay a panangbasatayo iti daytoy nga impormasion tapno maisagana ti pusotayo kadagiti maiparangto. (Esd. 7:10) Iti Panagdaydayaw ti Pamiliayo, mabalinyo kadi nga iraman a pagsasaritaan ti programa iti kombension tapno ad-adda a magagarankayo iti dayta?

3. Ania ti makatulong kadatayo nga agimdeng a naimbag?

³ Kabayatan ti Programa: No mabalin, mapankayon iti CR sakbay a mangrugi ti sesion. Iddepenyo ti selponyo tapno dikay maistorbo iti awag wenno teks wenno masulisog nga agteks bayat ti programa. No masapul a naka-on ti selponyo, ikabilyo iti setting a di makaistorbo iti sabsabali no bilang adda umawag. No agusarkayo iti tablet bayat ti programa, siguraduenyo a saan a makaistorbo dayta. Dikay mangmangan wenno uminum bayat ti programa. (Ecl. 3:1) Ipokusyo ti atensionyo iti agpalpalawag. No adda mabasa a teksto, surotenyo dayta iti bukodyo a Biblia. Aginotarkayo.

4. Kasano a matulongan dagiti nagannak ti annakda nga agimdeng ken agsursuro?

⁴ Kayattayo met nga agimdeng ken agsursuro dagiti annaktayo. Kuna ti Proverbio 29:15: “Ti ubing a mabaybay-an ibabainnanto ni inana.” Nasayaat ngarud no agkakatugaw ti intero a pamilia tapno masigurado dagiti nagannak nga agim-imdeng dagiti annakda iti programa imbes nga agtutungtong, agteteks, wenno agpagnapagnada. Uray no dida maawatan ti amin a mangmangngegda gapu ta ubingda pay unay, mabalin a sanayen ida nga agtugaw a siuulimek ken saan a matmaturog.

5. Apay a makagunggona ti panangrepaso iti programa, ken kasanotayo a maaramid dayta?

⁵ Kalpasan ti Programa iti Kada Aldaw: Dikay agpuypuyat. Maturogkayo a nasapa tapno makainanakayo a naimbag. Ti panangrepaso kadagiti nangngegyo ti makatulong tapno nabaybayag a matandaananyo dagita. Gapuna, makagunggona ti sumagmamano a minuto iti kada rabii a panagsasarita ti pamilia maipapan iti programa. No mapankayo nga aggagayyem iti restawran, itugotyo koma dagiti notayo ken iranudyo ti maysa wenno dua a punto a nagustuanyo unay. No nakaawidkayon kalpasan ti kombension, mabalin a pagsasaritaanyo bayat ti Panagdaydayaw ti Pamiliayo no kasanoyo a mayaplikar a sangapamiliaan dagiti nasursuroyo. Mabalinyo met ti mangilatang iti tiempo iti kada lawas tapno repasuenyo ti maysa a paset ti aniaman a baro a publikasion a nairuar.

6. Umdas kadin ti kaaddatayo iti kombension? Ilawlawagyo.

⁶ Ditay magunggonaan iti maysa a padaya no saantayo a kanen ken nanamen dagiti taraon. Kasta met laeng kadagiti naespirituan a taraon a maidasar iti kombension distrito. Sapay koma ta naan-anay a magunggonaantayo babaen iti itatabunotayo iti amin a sesion, panagimdeng a naimbag, ken panangyaplikar kadagiti nasursurotayo.