‘Ummongem Dagiti Umili’
1. Ania ti pagpadaan dagiti rehional a kombension ken ti nakallalagip a panagtataripnong dagiti Israelita kalpasan unay ti ipapanawda iti Egipto?
1 Kalpasan unay ti ipapanawda iti Egipto, binilin ni Jehova ni Moises nga ‘ummongenna dagiti umili’ iti Bantay Sinai tapno dumngegda iti Saona ket agbutengda Kenkuana ken tapno maisuroda dagiti annakda. (Deut. 4:10-13) Iti sumaruno a bulbulan, agtataripnong ti ili ni Jehova kadagiti rehional a kombension tapno agpaisuroda kenkuana. Ania ti masapul nga aramidentayo tapno naan-anay a mabenepisiarantayo?
2. Kasanotayo a ‘makapagsagana’ para iti kombensiontayo?
2 ‘Agsaganakayo’: Binilin ni Jehova dagiti Israelita nga ‘agsaganada’ para iti dayta a nakallalagip a taripnong iti Bantay Sinai. (Ex. 19:10, 11) Umasping iti dayta, masapul nga agsagana a naimbag ti amin a tumabuno. Kas pagarigan, adu ti masapul nga agpakada a nasaksakbay iti trabahoda. Nalabit umasping ti kasasaadyo iti situasion idi ni Nehemias. Kayatna idi a panawan ti trabahona kas paraawit iti kopa ni Ari Artaxerxes tapno makapan idiay Jerusalem, ngem ammona a mabalin a di palubosan ti ari. Nagkararag ni Nehemias ket situtured nga imbagana ti kiddawna. Pinalubosan ti ari a pumanaw ken nangted pay iti suporta para iti panagdaliasatna! (Neh. 2:1-9) Kanayonanna, nayurnosyo kadin ti pagluganan ken pagdagusanyo? Iplanoyo ti sumangpet a nasapa iti tunggal sesion, ken agsaganakayo a dumngeg “nga ad-adda ngem iti gagangay.”—Heb. 2:1.
3. Ania ti makatulong a mangisagana iti pusotayo para iti programa?
3 Ti sabali pay a napateg nga isaganatayo ket ti pusotayo tapno makapagimdeng ken makasursurotayo. (Esd. 7:10) Ti programa ti kombension ket naikabil a nasaksakbay iti Web site a jw.org/ilo ken nailista ti tema ti amin a palawag agraman ti maysa wenno dua a teksto a nakaibatayan dagita. Nagsayaat nga usigen dagitoy a material bayat ti panagdaydayaw ti pamiliatayo kadagiti lawas sakbay ti naituding a kombensiontayo. Adda dagiti agibumbunannag a mangyimprenta iti programa sa usarenda a paginotaran bayat ti kombension.
4. Kasano a maisuro dagiti nagannak ti annakda bayat ti kombension?
4 ‘Suruanyo ti Annakyo’: Ti maysa kadagiti panggep ti kombension idiay Bantay Sinai ket tapno dagiti nagannak nga Israelita “maisuroda ti annakda.” (Deut. 4:10) Ti rehional a kombension ipaayanna met dagiti nagannak iti nagsayaat a gundaway a mangaramid iti kasta. Masapul a kaabay dagiti nagannak ti annakda kabayatan dagiti sesion tapno matulonganda ida a dumngeg. Iti ngudo ti tunggal aldaw ken bayat ti panagdaydayaw ti pamilia, mabalin a pagsasaritaan dagiti pamilia ti programa.
5. Kasanotayo a magunggonaan iti itatabuno iti rehional a kombension?
5 Iti uneg ti tallo nga aldaw a kombension, arigna a makaruk-attayo iti nadangkes a lubong ni Satanas ket matagiragsaktayo ti naespirituan a pannakabang-ar ken makapabileg a panagtitimpuyog iti naespirituan a paraisotayo. (Isa. 35:7-9) Bayat nga umas-asideg ti aldaw ni Jehova, sapay koma ta ditay liwliwayan ti agtataripnong ken agpipinnaregta!—Heb. 10:24, 25.