Dagiti Talon Purawdan a Maipaay iti Pannakaani
1. Ania a napateg a trabaho ti madama a maar-aramid?
1 Kalpasan ti panangasabana iti maysa a Samaritana, kinuna ni Jesus kadagiti adalanna: “Itannawagyo dagiti matayo ket matmatanyo dagiti talon, ta purawdan a maipaay iti pannakaani.” (Juan 4:35, 36) Madaman ti naespirituan a panagani, ken ammo ni Jesus nga agsaknapto dayta a trabaho iti intero a lubong. Uray no addan idiay langit, okupado latta ni Jesus a makiramraman iti panagani. (Mat. 28:19, 20) Ania dagiti pakakitaan nga ad-adda a naganat daytoy a trabaho bayat nga umas-asideg ti pannakairingpasna?
2. Ania a panagrang-ay ti mangipakita a pumarpartak ti trabaho a panagani iti intero a lubong?
2 Sangalubongan a Panagani: Kabayatan ti 2009 a tawen serbisio, 3.2 porsiento ti ngimmatuan ti bilang dagiti agibumbunannag iti intero a lubong. Uray kadagiti pagilian a maiparit ti mangasaba, immadu met iti 14 porsiento ti bilang dagiti agibumbunannag. Ti bilang dagiti panangyadal iti Biblia ket nasurok a 7,619,000—ad-adu nga amang daytoy ngem iti kangatuan a bilang dagiti agibumbunannag ken ad-adu iti dandani kagudua a milion no idilig iti bilang dagiti panangyadal idi napan a tawen. Bayat a pumarpartak ti panagsaknap ti trabahotayo kadagiti adu a rehion, umad-adu dagiti agkidkiddaw kadagiti misionero a nagturpos iti Gilead. Iti adu a pagilian, rumangrang-ay dagiti teritoria nga ayan dagiti ganggannaet ti pagsasaona. Nalawag a pappapartaken ni Jehova ti trabaho bayat a mairingringpas ti panagani. (Isa. 60:22) Positibo kadi ti panangmatmatyo iti “talon” wenno iti teritoriayo?
3. Ania ti nalabit ipagarup dagiti dadduma maipapan iti teritoriada?
3 Ti Teritoriayo: “Saan unay a nabunga ti teritoriami,” nalabit kuna dagiti dadduma. Pudno nga adda dagiti teritoria a kasla saan unay a nabunga no idilig kadagiti dadduma wenno no idilig iti napalabas. Gapuna, mabalin nga ipapan dagiti dadduma a Saksi a nalpasen ti panaganida isu nga agadas laengen ti obrada no adda pay. Ngem umiso kadi dayta?
4. Ania nga umiso a kababalin ti patanorentayo mainaig iti ministeriotayo, ken apay?
4 Limitado ti panawen ti panagani isu a masapul nga apuraentayo dayta manipud iti rugrugi agingga iti pannakairingpasna. Imutektekanyo ti kinaganat kadagitoy a sasao ni Jesus: “Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” (Mat. 9:37, 38) Ni Jehova, nga Apo ti panagani, ti makaammo no kaano ken sadino ti paganiantayo. (Juan 6:44; 1 Cor. 3:6-8) Ania ti annongentayo? Kuna ti Biblia: “Iti bigat imulam ti bin-im ket agingga iti rabii saanmo a paginanaen ta imam.” (Ecl. 11:4-6) Wen, saan a rumbeng nga agpamayantayo bayat a mairingringpas ti trabaho a panagani!
5. Apay a rumbeng nga itultuloytayo ti mangasaba a sireregta uray kadagiti kasla saan a nabunga a teritoria?
5 Agtultuloykayo nga Agani: Uray no namin-adun a nawanas ti teritoriatayo ken kasla awan ti masarsarakantayo nga interesado, adda latta nasayaat a panggapuantayo nga agtrabaho a sireregta ken sigaganat. (2 Tim. 4:2) Gapu kadagiti nakaro a panagbalbaliw iti lubong, mabalin nga agbalbaliw ti kababalin dagiti tattao ken panunotenda no ania pay ngata ti mapasamak iti masanguanan. Bayat nga agmataengan dagiti agtutubo, mabalin a kayatda ti maaddaan iti kinatalged ken talna ti panunot. Mabalin nga addanto dagiti aginteres gapu iti kinapingettayo. Wen, mabalin a dumngegton dagidiay saan idi a mayat a makisarita kadatayo. Uray dagidiay mangilaksid iti mensahetayo ket nasken a mapakdaaran.—Ezeq. 2:4, 5; 3:19.
6. No narigat ti teritoriatayo, ania ti makatulong kadatayo nga agtalinaed a naregta?
6 No narigat ti teritoriatayo, ania ti tumulong kadatayo nga agtalinaed a naregta? Malaksid iti panangasaba iti binalaybalay, nalabit kayattayo a padasen ti mangasaba kadagiti lugar ti negosio wenno babaen ti telepono. Wenno mabalintayo a baliwbaliwan ti presentasiontayo tapno saan a makauma. Mabalintayo met a baliwan ti eskediultayo tapno makakasabatayo iti rabii wenno iti oras a posible a madanontayo dagiti tattao iti pagtaenganda. Nalabit agsursurotayo iti sabali a lenguahe tapno ad-adu pay ti makasaritatayo maipapan iti naimbag a damag. Mabalintayo a palawaen ti ministeriotayo babaen ti panag-regular pioneer. Wenno mabalintayo ti umakar iti lugar a manmano ti agibumbunannag. No umiso ti panangmatmattayo iti trabaho a panagani, maikagumaantayo ti makiraman a naan-anay aginggat’ mabalin iti daytoy a napateg a trabaho.
7. Agingga kaano nga itultuloytayo ti trabaho a panagani?
7 Limitado ti panawen dagiti mannalon nga agapit isu a saanda nga agpampamayan agingga a mairingpas ti trabahoda. Kasta met laeng ti kinaganat ti naespirituan a panaganitayo. Agingga kaano nga agtultuloy ti trabahotayo? Agingga “iti panungpalan ti sistema ti bambanag” ken agingga iti Armagedon. (Mat. 24:14; 28:20) Kas iti kangrunaan a Ministro ni Jehova, kayattayo nga iringpas ti trabaho a naitalek kadatayo. (Juan 4:34; 17:4) Gapuna, itultuloytayo nga itungpal a sireregta ken sirarag-o ti ministeriotayo ken buyogen ti positibo a kababalin agingga iti panungpalan. (Mat. 24:13) Saan pay a nalpas ti panagani!
[Blurb iti panid 2]
Limitado ti panawen ti panagani isu a masapul nga apuraentayo dayta manipud iti rugrugi agingga iti pannakairingpasna