Tulonganyo ti Bumalay nga Agrason
1. Ania ti kaepektibuan a pamay-an iti ministeriotayo?
1 Ania a pamay-an ti ad-adda nga epektibo iti ministerio—dogmatiko wenno ti pamay-an a tumulong iti bumalay nga agrason ken maaddaan iti umiso a konklusion? Ni apostol Pablo ket nakirinnason kadagiti Judio idiay Tesalonica, ket “kas nagbanaganna sumagmamano kadakuada ti nagbalin a manamati.” (Ara. 17:2-4) Ania ti ramanen ti pannakirinnasontayo kadagiti sabsabali?
2. Kasanotayo a matulad ti ulidan ni Pablo no iranudtayo ti naimbag a damag?
2 Ikabilanganyo ti Rikna ken Patpatien ti Bumalay: Masapul nga ikabilanganyo ti rikna ti bumalay tapno maaonyo ti kapanunotanna. Inrugi ni Pablo ti palawagna kadagiti di manamati a Griego idiay Areopago babaen ti panangdakamatna kadagiti bambanag a mabalin nga ammo ken akseptarenda. (Ara. 17:22-31) Gapuna, no agisaganakayo iti presentasionyo, ikabilanganyo dagiti gagangay a patpatien ken saan a magustuan dagiti tattao iti teritoriayo. (1 Cor. 9:19-22) No sumupiat ti bumalay, ikagumaanyo ti mangbirok iti pagtunosanyo ket dayta ti pagsaritaanyo.
3. Kasanotayo a makirinnason a sieepektibo iti bumalay babaen ti panangusar kadagiti saludsod?
3 Sisisigo nga Agusarkayo Kadagiti Saludsod: No saantayo nga ammo ti agdama nga ayan ti tao nga agbibiahe, saantayo a maibaga ti direksion a turongenna tapno matulongantayo a makadanon iti papananna. Umasping iti dayta, saantayo a matulongan ti bumalay a maaddaan iti umiso a konklusion no saantayo nga ammo ti agdama a kapanunotanna. Sakbay a nakirinnason kadagiti dumdumngeg kenkuana, masansan a nagusar ni Jesus kadagiti saludsod tapno maammuanna ti kapanunotanda. Kas pagarigan, idi adda nangisaludsod ken Jesus iti, “Babaen ti panangaramidko iti ania a matawidko ti agnanayon a biag?,” inkagumaan ni Jesus nga ammuen ti kapanunotan ti lalaki sakbay a simmungbat. (Luc. 10:25-28) Iti sabali pay a gundaway, idi kamali ti sungbat ni Pedro, sisisigo a nagusar ni Jesus kadagiti saludsod tapno mailinteg ti kapanunotanna. (Mat. 17:24-26) Gapuna, no agsaludsod ti bumalay wenno no di umiso ti kapanunotanna, agusartayo kadagiti saludsod tapno matarusanna ti punto.
4. Apay nga ikagumaantayo a tulongan ti bumalay nga agrason?
4 No tulongantayo ti bumalay nga agrason, tultuladentayo ti Naindaklan a Mannursuro, a ni Jesus, kasta met ti dadduma pay a nalalaing nga ebanghelisador idi umuna a siglo. Maipakitatayo pay a raraemen ken ik-ikkantayo iti dignidad ti bumalay. (1 Ped. 3:15) Kas resultana, mabalin a kayatna a sumarungkartayto manen.