Makagunggona a Panagregget
1. Kasano nga agaplikar iti ministerio ti 1 Corinto 9:26 iti ministerio?
1 Insurat ni apostol Pablo: “Ti wagas a panagtarayko di mapagduaduaan; ti wagas a panangiturongko kadagiti danogko saan a kasla panangkabkabil iti angin.” (1 Cor. 9:26) Tuktukoyen ni Pablo ti ad-adda a panangipamaysana a mangragpat kadagiti naespirituan a kalat. Ngem ti prinsipiona ket agaplikar met iti ministerio. Kayattayo nga iturong a nainsiriban dagiti ‘danog,’ wenno panagreggettayo, tapno nasayaat ti magapuanantayo. Kasano?
2. Kasanotayo a matulad ni Pablo ken ti dadduma pay nga ebanghelisador iti panangikeddeng no kaano ken sadino ti pangasabaantayo?
2 Mapankayo iti Sadinoman nga Ayan Dagiti Tattao: Ni Pablo ken ti dadduma pay nga ebanghelisador idi umuna a siglo ket nangasaba iti sadinoman a mabalin nga ayan dagiti tattao. (Ara. 5:42; 16:13; 17:17) Isu a no adu kadagiti tattao iti teritoriatayo ti adda kadagiti pagtaenganda iti rabii, mabalin a dayta ti kasayaatan a panagbalaybalaytayo. Adu kadi ti matatao kadagiti estasion ti bus wenno tren iti bigbigat wenno iti malmalem bayat a mapan agtrabaho wenno agaawiden dagiti tattao? Ania nga oras ti kaadu ti tattao kadagiti pagtagilakuan? Mabalin a nasayaat ti mangasaba kadagiti lansangan kadagita nga oras.
3. Kasano ti nainsiriban a panangikagumaantayo a mangwanas iti teritoriatayo?
3 Nainsiriban a Panangwanas iti Teritoria: Masapul a naannad ken nainsiriban met ti panangikagumaantayo a mangwanas iti teritoriatayo. Kas pagarigan, imbes a nakaad-adutayo a mangasaba iti maymaysa a lugar, nga agkalikagum iti adu a tiempo ken panangikagumaan a mamagtalinaed iti grupo nga organisado ken makakasaba ti amin, mabalin a nasaysayaat no mabingaybingaytayo iti nagduduma a grupo. Kasta met laeng no mangasabatayo kadagiti away, al-alisto a mawanas ti teritoria ken ad-adu ti gundawaytayo a makakasaba no saan unay a dakkel ti grupotayo. Kabaelantayo kadi ti agkiddaw iti personal a teritoria nga asideg iti pagtaengantayo tapno basbassit ti oras a mabusbostayo nga agbiahe?
4. Ania ti makatulong tapno agballigitayo kas “dumadaklis iti tattao”?
4 Inyarig ni Jesus dagiti ebanghelisador kadagiti “dumadaklis iti tattao.” (Mar. 1:17) Ti panggep ti maysa a mangngalap ket saan laeng a mangisaruag iti iket no di ket agkalap iti ikan. Gapuna, ti naballigi a mangngalap ket mapan iti lugar nga ammona nga ayan dagiti ikan ken iti tiempo a kaaduda, ket awan ti sayangenna nga oras nga agkalap. Wen, makagunggona ti panagreggetna. Sapay koma ta kasta met ti kinagagettayo iti ministerio.—Heb. 6:11.