Adda Kadi Personal a Teritoriam?
1. Ania ti personal a teritoria?
1 Ti personal a teritoria ket daydiay naituding kenka. Mabalin nga asideg laeng daytoy tapno makapanka a dagus sadiay ken mabalinmo ti mangasaba a siksika wenno adda kaduam nga agibumbunannag. Nupay makagunggona a suportaran dagiti urnos ti kongregasion para iti grupo a panangasaba no posible, maipaay ti naan-anay a panangsaksi no adda personal a teritoria a trabahuen kadagiti sabali a gundaway, nangnangruna kadagiti kongregasion a nalawa ti teritoriada.—Ara. 10:42.
2. Ania dagiti sumagmamano a pagimbagan ti pannakaadda iti personal a teritoria?
2 Dagiti Gunggona: Natakuatan ti dadduma nga adda dagiti kanayonan a gunggona iti panangasaba iti personal a teritoria nga asideg iti pagtrabahuanda, nga aramidenda dayta bayat ti pangngaldaw wenno kalpasan a dagus ti trabahoda. Tagiragsaken met ti dadduma ti sangapamiliaan a panangasaba kadagiti kaarrubada, iti maysa wenno ad-adu pay nga oras sakbay ti Panagadal iti Libro ti Kongregasion. Gapuna, adda laeng iti asideg dagidiay masarakam a mabalin a sarungkaran ken mayadalan iti Biblia isu a saanka unay a makabusbos iti adu a pigsa, tiempo, ken sanikua. Gapu ta ad-adu ti mairingpas iti basbassit a tiempo, mabalin a makatulong kadagiti dadduma no adda personal a teritoriada tapno sagpaminsan a makapag-auxiliary pioneer-da wenno agaplikarda pay ketdi kas regular pioneer. Maysa pay, mabalin a makatulong ti panangasaba iti personal a teritoria ken panagbalin a pamiliar kadagiti bumalay tapno maalatayo ti panagtalekda ken maibagaytayo ti presentasiontayo kadagiti pakaseknanda, iti kasta agbalin a mas epektibo ti ministeriotayo.
3. Ania ti kapadasan ti maysa a payunir a nangala iti personal a teritoria?
3 Maysa a payunir a pinaregta ti manangaywan iti sirkito a mangala iti personal a teritoria kinunana: “Impangagko daytoy a balakad ket di nagbayag, naam-ammo ken nagayyemko dagiti bumalay iti teritoriak. Binaliwbaliwak ti oras nga isasarungkarko sigun iti kombeniente kadakuada. Kas resultana, ti 35 a panagsarungkar nga ar-aramidek iti kada bulan ket immabut iti nasurok a 80. Naaddaanak pay iti pito nga iyad-adalan iti Biblia.”
4. Kasano a maaddaanka iti personal a teritoria ken kasanom a trabahuen dayta?
4 No Kasano ti Maaddaan iti Dayta: No kayatmo ti agkiddaw iti personal a teritoria, kasaritam ti mangas-asikaso iti teritoria. Dika bumdeng a mangawis iti sabali nga agibumbunannag a makipagtrabaho kenka, ken isuratmo dagiti pagtaengan a saanmo a nadanon dagiti bumalayna. Ikagumaam a wanasen ti teritoriam iti uneg ti uppat a bulan. No marigatanka a mangaramid iti dayta, mabalinmo ti agpatulong iti manangaywan iti Panagadal iti Libro ti Kongregasion wenno kadagiti dadduma. Kalpasan ti uppat a bulan, mabalinmo nga isubli ti nawanas a teritoria wenno kiddawem a trabahuem manen dayta. Nupay kasta, saanmo koma a bukbukodan ti isu met la a teritoria no di ket isublim tapno makiddaw met dayta dagiti dadduma. No limitado ti teritoria ti kongregasionyo ket saan a posible ti maaddaan iti personal a teritoria, nalabit mabalinmo ti agkiddaw iti maysa a paset ti teritoria iti manangaywan iti panagadal iti libro.
5. Ania ti kasapulan tapno maitungpal ti annongentayo a mangasaba?
5 Saan a kaskarina ti annongentayo a mangasaba “iti intero a mapagnaedan a daga.” (Mat. 24:14) Agkasapulan dayta iti panagtutunos. Malaksid iti grupo a panangasaba, makatulong ti panangasaba iti personal a teritoria tapno maidanontayo ti naimbag a damag iti adu a tattao aginggat’ mabalin.