No Awan Dagiti Tattao Kadagiti Pagtaenganda
1. Ania ti gagangay a parikut no makiramantayo iti ministerio a panagbalaybalay?
1 Iti adu a lugar, manmanon a madanon dagiti tattao kadagiti pagtaenganda. Kadagitoy “napeggad a tiempo,” adu ti napilitan nga agtrabaho iti adu nga oras tapno maaddaanda kadagiti kasapulanda iti biag. (2 Tim. 3:1) Adda dagidiay awan iti pagtaenganda gapu ta napanda nakitienda wenno naglinglingay. Kasano a maidanontayo ti naimbag a damag kadagiti kasta a tattao?
2. Kasanotayo a masigurado a masarungkaran dagidiay awan kadagiti pagtaenganda?
2 Isuratyo Dagidiay Pagtaengan nga Awan Dagiti Bumalayna: Ti umuna nga addang ket ti panangisurat kadagidiay pagtaengan nga awan dagiti bumalayna. Nangnangruna a napateg daytoy no masansan a mawanas ti teritoriayo. Isursuratyo kadi ti nagan ti kalsada, ti naganyo, ken ti petsa? Mabalin a mangibatikayo iti espasio tapno addanto pay pagsuratanyo wenno ti sabali pay nga agibumbunannag a mangsarungkar kadagidiay saanyo a nadanon iti pagtaenganda. Kalpasan ti panangasabayo iti dayta a teritoria, laglagipenyo nga ited ti rekord wenno dagiti innotaryo iti tao a mangig-iggem iti territory card malaksid no umanamong a dakayo ti mangasaba kadagidiay awan kadagiti pagtaenganda. Isuratyo iti sabali a papel ti siasinoman a sarungkaranyo nga interesado.
3. Ania ti sumagmamano a singasing tapno makasabaan dagidiay awan kadagiti pagtaenganda?
3 Padasenyo ti Sumarungkar iti Sabali nga Oras: Nalabit a dadduma kadagidiay awan kadagiti pagtaenganda iti aldaw ket madanonyo iti rabii wenno kadagiti ngudo ti lawas. Mabalinyo kadi a baliwan ti eskediulyo tapno makasublikayo iti sabali nga oras? (1 Cor. 10:24) No saan, mabalinyo nga ited ti adres dagidiay awan kadagiti pagtaenganda iti agibumbunannag nga adda wayana a sumarungkar iti sabali nga oras. No saan a posible daytoy, mabalinyo a suratan dagidiay awan kadagiti pagtaenganda wenno padasenyo a kasabaan ida babaen ti telepono. Maragsakan la ketdi a tumulong kadakayo dagiti agibumbunannag a limitado ti pannakiramanda iti trabaho a panagbalaybalay gapu ta nakapuy ti salun-atda.
4. Ania a kapadasan ti mangipakita a napateg ti isasarungkar kadagidiay awan kadagiti pagtaenganda?
4 Adda maysa a kapadasan a mangipakita iti kinapateg ti panangikagumaan a mangdanon kadagidiay awan kadagiti pagtaenganda. Kalpasan ti tallo a tawen a maulit-ulit a panagsarungkar dagiti agibumbunannag iti maysa a pagtaengan, nakasaritada met laengen ti bumalay. Nabayag gayamen nga ur-urayenna ti isasarungkar dagiti Saksi tapno maitultuloy ti panagadalna iti Biblia a nairugina sakbay nga immakar iti dayta a lugar.
5. Kaano a maikuna a nawanasen ti teritoria?
5 Wanasenyo ti Teritoriayo: Kaano a maikuna a nawanasen ti teritoria? Kaaduanna a maikuna a nawanasen ti teritoria no inkagumaanyo ti mangasaba iti tunggal pagtaengan. Mabalin a maitutop ti mangibati iti polieto wenno daan a magasin iti lugar a saan a makita dagiti lumablabas kadagiti pagtaengan nga awan dagiti bumalayna, nangnangruna kadagiti teritoria a manmano a makasabaan. Nasken a mawanas ti teritoria iti uneg ti uppat a bulan. Kalpasanna, ikur-ityo dayta iti territory card tapno ti mangas-asikaso iti teritoria mapabarona ti rekordna.
6. Apay a rumbeng nga ikagumaantayo nga idanon ti naimbag a damag kadagiti amin iti teritoriatayo?
6 Kayattayo nga adu a tattao aginggat’ mabalin ti maaddaan iti oportunidad a mangammo ken umawag iti nagan ni Jehova tapno maisalakanda. (Roma 10:13, 14) Ramanen daytoy dagidiay nairana nga awan kadagiti pagtaenganda bayat ti panagbalaybalaytayo. Kas ken apostol Pablo, maaddaankayo koma iti tarigagay a ‘naan-anay a mangsaksi iti naimbag a damag ti di kaikarian a kinamanangngaasi ti Dios.’—Ara. 20:24.