Nalawa Kadi ti Teritoria ti Kongregasionyo?
1 Manipud kadagiti siudad ti Judea agingga iti aw-away ti Galilea, naan-anay a nangasaba ni Jesus iti intero a nalawa a teritoria ti nagkauna nga Israel. (Mar. 1:38, 39; Luc. 23:5) Masapul met nga idanontayo ti naimbag a damag kadagiti amin a tattao a mabalintayo a makasarita. (Mar. 13:10) Ngem mabalin a narigat daytoy. Apay?
2 Adu a kongregasion ditoy Pilipinas ti addaan iti naiputputong a teritoria, nga adu kadagitoy ket bambantay ken narigat a madanon. Ania ti mabalintay nga aramiden tapno matulongan dagiti tattao nga agnanaed kadagita nga adayo a teritoria, iti kasta, maammuanda ti kinapudno maipapan ken Jehova, ni Jesus, ken ti Pagarian?
3 Agplano a Naimbag: Nasken nga imatonan ti manangaywan iti serbisio ken ti agay-aywan iti teritoria dagiti urnos ti kongregasion tapno maaramid ti kasayaatan. Nalabit nga adda dagiti naisangsangayan a Sabado nga agmalmalem a makaruar ti kaaduan. No mangasabakayo kadagiti adayo a teritoria, iplanoyo ti mangbusbos iti sumagmamano nga aldaw iti tay-ak ti serbisio no mabalin, a mangitugotkayo iti pangngaldawyo. Mabalinyo ti agtitipon maipaay iti serbisio a nasapsapa ngem iti gagangay tapno adda tiempoyo nga agbiahe a mapan iti teritoria wenno mangangay iti taripnong sakbay ti panangasaba iti asideg ti lugar a mawanas. Iyurnosyo ti mangasaba kadagiti adayo a lugar kadagiti panawen a nasayaat ti paniempo ken kasasaad ti kalsada.
4 No adda ammo dagiti panglakayen a kabangibang a kongregasion a masansan a mawanasda ti teritoriada, mabalin a kayatda nga awisenyo ida a tumulong iti kongregasionyo a mangwanas kadagiti adayo a teritoria, nangruna kadagiti bulan ti kalgaw. Mabalin a makaparagsak ken nabunga ti kasta a panagtitinnulong.
5 Siguraduenyo ti mangitugot iti nawadwad a literatura. No manmano a mawanas ti teritoria, mabalin a nasayaat ti mangibati iti tract wenno daan a kopia ti magasin kadagiti awan iti pagtaenganda. Itukonyo iti tunggal masabetyo ti tract a Kayatyo Kadi a Maammuan ti Ad-adu Pay Maipapan iti Biblia?
6 Tumulongkayo a Naan-anay: Tapno mawanas ti nalawa a teritoria, kasapulan ti kooperasion ti tunggal maysa iti kongregasion. No kasapulan ti nawatiwat a panagbiahe, dagidiay agkukuyog ket mabalin a pagtitinnulonganda ti panggasolina. Mannakaawatkayo koma no makasarakkayo iti bumalay a situtulok a makisao. Sipapanunotkayo koma a kasapulan a madanon dagiti amin a tattao iti teritoria, ken ipakitayo ti konsiderasion kadagiti agur-uray a kagrupoyo. No tarigagayanyo nga ibaybayag ti pannakisaritayo iti interesado a tao, mabalin kadi nga ipamuspusanyo dagiti bambanag tapno maituloy dagiti kagrupoyo ti mangasaba?
7 Mangyurnoskayo iti espesipiko nga aldaw a panagsarungkar kadagiti amin nga interesado. Irekordyo dagiti address tapno maitultuloyyo ti mangasaba babaen ti surat. No awan ti nagan dagiti kalsada iti away wenno awan ti numero dagiti pagtaengan, mangaramidkayo iti nasayaat a mapa wenno isuratyo dagiti detalye no kasano a masarakan ti maysa nga interesado a sarungkaranyonto.
8 Anian a pribilehio ti adda kadatayo a mangitungpal iti bilin ni Jesus: “Iti aniaman a siudad wenno purok a serkanyo, birokenyo no siasino iti dayta ti maikari”! (Mat. 10:11) Sigurado a bendisionan ni Jehova ti panagreggetyo bayat a situtulok a makiramankayo iti daytoy makagunggona unay a trabaho!