Sangapulo ket Dua a Rason No Apay a Mangasabatayo

Apay nga ikasaba ken isurotayo ti naimbag a damag? Ti kadi kangrunaan a rason ket gapu ta kayattayo a tulongan dagiti napudno ti panagpuspusona a tattao a magna iti dana ti biag? (Mat. 7:14) Dayta ti umuna a rason a nailista iti baba, ngem saan nga isu ti kangrunaan. Iti panagkunayo, ania kadagiti sumaganad a 12 a rasontayo a mangasaba ti kapatgan?

1. Tapno maisalakan dagiti tattao.—Juan 17:3.

2. Tapno mapakdaaran dagiti nadangkes.—Ezeq. 3:18, 19.

3. Tapno matungpal ti padto iti Biblia.—Mat. 24:14.

4. Tapno maiparangarang ti kinalinteg ti Dios. Awanto ti mangibaga a dinadael lattan ni Jehova dagiti nadangkes a dina man la inikkan ida iti gundaway nga agbabawi.—Ara. 17:30, 31; 1 Tim. 2:3, 4.

5. Tapno maitungpaltayo ti obligasiontayo a mangipaay iti naespirituan a tulong kadagiti tattao, a nagatang babaen iti dara ni Jesus.—Roma 1:14, 15.

6. Tapno saantayo a makabasol iti dara.—Ara. 20:26, 27.

7. Tapno maisalakantayo a mismo.—Ezeq. 3:19; Roma 10:9, 10.

8. Tapno maipakitatayo ti ayattayo kadagiti padatayo a tao.—Mat. 22:39.

9. Tapno maipakitatayo a natulnogtayo ken Jehova ken iti Anakna.—Mat. 28:19, 20.

10. Paset ti panagdaydayawtayo.—Heb. 13:15.

11. Tapno maipakitatayo ti ayattayo iti Dios.—1 Juan 5:3.

12. Tapno masantipikar ti nagan ni Jehova.—Isa. 43:10-12; Mat. 6:9.

Siempre, saan laeng a dagitoy ti rasontayo a makiraman iti panangasaba. Kas pagarigan, ti panangasaba patibkerenna ti pammatitayo ken ikkannatayo iti naisangsangayan a gundaway nga agbalin a katrabahuan ti Dios. (1 Cor. 3:9) Nupay kasta, ti kapatgan a rason a makiramantayo iti ministerio ket ti maika-12. Aniaman ti reaksion dagiti tattao, ti ministeriotayo ket makatulong iti pannakasantipikar ti nagan ti Dios ken mangipaay iti sungbat iti daydiay mangrurrurod ken ni Jehova. (Prov. 27:11) Wen, adu ti panggapuantayo nga ‘agtultuloy nga awan sarday a mangisuro ken mangideklara iti naimbag a damag.’—Ara. 5:42.