Ti Opisial a Web Site-tayo—Nairanta a Tumulong Kadatayo ken Kadagiti Sabsabali
Binilinnatayo ni Jesus a mangikasaba iti naimbag a damag maipapan iti Pagarian “iti intero a mapagnaedan a daga maipaay a pangsaksi kadagiti amin a nasion.” (Mat. 24:14) Tapno matulongantayo a ‘mangitungpal a naan-anay iti ministeriotayo,’ ti watchtower.org, jw-media.org, ken jw.org ket napagtitipon ken nabaliwan ti diseniona. Maawagan daytoyen iti jw.org Web site.—2 Tim. 4:5.
“Iti Intero a Mapagnaedan a Daga”: Agarup kakatlo iti populasion ti lubong ket agus-usar iti Internet. Daytoy ti nagbalin a kangrunaan a gubuayan ti impormasion para iti adu, nangruna kadagiti agtutubo. Ti site-tayo ket mangipaay kadagiti pudno a sungbat dagiti saludsod maipapan iti Biblia kadagiti agus-usar iti Internet. Daytoy ti mangilawlawag kadakuada iti maipapan iti organisasion ni Jehova ken nalaklakan ti panagkiddawda iti panangyadal iti Biblia. Gapuna, ti naimbag a damag ket posiblen a mangngeg dagiti tattao nga agnanaed kadagiti lugar a narigat a madanon ti mensahe maipapan iti Pagarian.
“Kadagiti Amin a Nasion”: Tapno makaipaaytayo iti panangsaksi “kadagiti amin a nasion,” masapul a mailawlawag ti kinapudno a linaon ti Biblia iti nagduduma a lengguahe. Dagiti manglukat iti jw.org ket nalaka laeng a makabirok iti impormasion iti agarup 400 a lengguahe, saan a kas iti dadduma a Web site.
Usarenyo a Naimbag Daytoy: Ti nabaliwan ti diseniona a jw.org Web site ket saan laeng a nairanta para iti panangasaba kadagiti di manamati no di ket agpaay met kadagiti Saksi ni Jehova. No addaankayo iti Internet, iparegtami a kabesaduenyo ti jw.org. Makita iti baba ti sumagmamano a singasing no kasanotay nga usaren daytoy.
[Diagram iti panid 3]
Padasem
1 I-type-mo ti www.jw.org iti address field iti Internet browser ti kompiutermo.
2 Sawarem ti site babaen ti panangi-click-mo kadagiti section headings, menu options, ken links.
3 Padasem a luktan ti jw.org iti mobile device a makapag-internet. Agbaliw ti kadakkel ti panid tapno umanay iti basbassit nga iskrin, ngem isu met laeng ti impormasion a linaonna.