Pagtuladan a Presentasion

Panangirugi iti Panangyadal iti Biblia iti Umuna a Sabado ti Disiembre

“Sumarsarungkarkami ta kayatmi ti tumulong kadagiti pamilia. Kayat ti adu a nagannak nga ayaten dagiti annakda ti Dios. Iti panagkunayo, rumbeng kadi nga isuro dagiti nagannak ti annakda a mangayat iti Dios, wenno makaammon dagiti annak a mangsursuro iti dayta?” Palubosanyo a sumungbat. Ipakitayo ti likud ti Disiembre 1 a Pagwanawanan, ken pagsaritaanyo ti material iti babaen ti umuna a saludsod ken ti uray maysa laeng kadagiti naisitar a teksto. Itukonyo dagiti magasin, ken ibagayo nga agsublikayto ta pagsaritaanyo ti sumaruno a saludsod.

Ti Pagwanawanan Disiembre 1

“Sumarsarungkarkami iti apagbiit ta kayatmi ti makisarita maipapan iti Dios. Ammomi nga adda bukod nga opinion ti amin maipapan iti Dios. Panagkunayo, ti kadi Dios ket ibilang ti adu kas maysa laeng a puersa ti nakaparsuaan wenno kas maysa a gayyem a maseknan kadakuada? [Palubosanyo a sumungbat.] Ibaga daytoy a teksto no ania ti kayat ti Dios a relasiontayo kenkuana. [Basaenyo ti Santiago 4:8a.] Ipakita daytoy a magasin ti tallo a banag nga aramidentayo tapno sumingedtayo iti Dios.”

Agriingkayo! Disiembre

“Sumarsarungkarkami iti apagbiit ta maseknankami iti gagangay a problema iti salun-at. Sigun iti World Health Organization, addanto tiempo iti biag ti 1 iti kada 4 a tao a maapektaranda iti sakit ti isip, kas iti depresion. Iti panagkunayo, gagangay kadin ti maaddaan kadagiti sakit ti isip? [Palubosanyo a sumungbat.] Ipanamnama ti Biblia nga iti masanguanan, awanton ti sakit ken ut-ot. [Basaenyo ti Apocalipsis 21:3, 4.] Ipakita daytoy a magasin ti sumagmamano a banag a masapul a maammuan ti amin maipapan iti sakit ti isip.”