Panangparang-ay iti Abilidadtayo iti Ministerio—Sanayen Dagiti Iyad-adalan a Maaddaan iti Nasayaat nga Ugali iti Panagadal

No Apay a Napateg: Tapno agmataengan iti naespirituan dagiti iyad-adalan iti Biblia, saan laeng a dagiti pagdamdamuan a sursuro iti Biblia ti taraon ti panunot ken pusoda. (Heb. 5:12–6:1) Ti panagadal ket agkasapulan iti panagregget. Ramanen daytoy ti pananginaig kadagiti baro nga impormasion iti dati nga ammotayon ken panangusig iti praktikal a pategda. (Prov. 2:1-6) Makatulong kadagiti iyad-adalan ti panagsursuroda nga agsukimat tapno masungbatan dagiti saludsod mainaig iti Biblia babaen ti panangusarda kadagiti publikasiontayo. Makatulong ti panagreggetda a mangyaplikar kadagiti naadalda tapno maibturanda dagiti pakasuotanda kas Kristiano.—Luc. 6:47, 48.

No Kasano nga Aramiden:

Ipaganetgetmo ti kinapateg ti panagpatulong ken Jehova babaen ti kararag sakbay nga agadal.—Juan 14:26; 1 Cor. 2:10.
Sipud pay damo, paregtaemon ti iyad-adalam nga agsagana a nasaksakbay para iti panagadalna iti Biblia. Ipakitam kenkuana ti bukodmo a kopia ti literatura nga ad-adalenyo, ken isurom no kasano nga ugedan dagiti kangrunaan laeng a sasao.
Tulongam ti iyad-adalam a sungbatanna dagiti saludsod iti bukodna a sasao. Dimo koma pagbalinen a puro saludsod ken sungbat ti panagadalyo, a basta basaenna laeng dagiti sungbat iti libro.
Paregtaem ti iyad-adalam a mangbasa iti maysa a paset ti Biblia iti inaldaw. Ipakitam ti eskediul ti panagbasa iti Biblia nga adda iti jw.org, a naglaon iti praktikal a pamay-an no kasanona nga aramiden daytoy. Kasapulan ti determinasion tapno mayugali ti inaldaw a panagbasa iti Biblia, ngem saan a sayang dayta a panagregget.—Sal. 1:2, 3.
Ipakitam iti iyad-adalam no kasanona a biroken ti sungbat dagiti saludsod maipapan iti Biblia babaen ti panangusar iti Watchtower Library wenno Watchtower ONLINE LIBRARY. Tulongam a mangammo iti pangababaan a simbolo dagiti publikasion a maus-usar kadagiti gimong ti kongregasion.

Padasenyo Ita a Bulan:

Iti ngudo ti maysa a subtema wenno kapitulo, kiddawem iti iyad-adalam iti Biblia a mangted iti sumagmamano a sentensia kas sumario iti naadalna. No awananka iti iyad-adalan, agpraktiska a mangsumario iti maysa a teksto ti Biblia wenno parapo Ti Pagwanawanan iti sumagmamano a sentensia tapno rumang-ay ti panangtarusmo iti basbasaem.