Adda Kadi Bileg ti Sao ti Dios iti Inaldaw a Panagbiagyo?

Makatulong ti inaldaw a panagbasatayo iti Biblia tapno “maparamut” ken ‘mapatibkertayo iti pammati.’ (Col. 2:6, 7) Nupay kasta, tapno adda bileg ti Sao ni Jehova iti biagtayo, masapul nga utoben ken iyaplikartayo dagiti prinsipiona. (Heb. 4:12; Sant. 1:22-25) Ipakita ti Josue 1:8 ti tallo nga epektibo nga addang iti panagbasa: (1) Basaen ti Sao ti Dios “iti aldaw ken rabii.” (2) Basaen dayta “iti nababa a timek” a kayatna a sawen, basaen iti kapartak nga addaan iti gundaway a mangutob ken mangiladawan iti eksena ken kasasaad. (3) Pagreggetan nga iyaplikar ti “isuamin a naisurat iti dayta.” No iyugalitayo dagitoy a singasing, ‘agballigitayto ken agtignaytayto a sisisirib’ iti inaldaw a panagbiagtayo.