Dagiti Bendision Para Kadagiti Agtulnog iti Dios

Imbaga ni propeta Moises a no agtulnogtayo kadagiti bilin ti Dios, bendisionannatayo. (Deuteronomio 10:13; 11:27) Saantayo laeng nga agtultulnog iti Dios gapu ta mabutengtayo a madusa. Matignaytayo nga agtulnog iti Dios gapu kadagiti nagsasayaat a kualidadna ken gapu ta ay-ayatentayo ken saantayo a kayat a mapagladingit. “Daytoy ti kaipapanan ti panagayat iti Dios, a tungpalentayo dagiti bilinna.”​—1 Juan 5:3.

Kasano a mangyeg iti bendision ti panagtulnog iti Dios? Kitaentayo ti dua a pamay-an.

1. AGBALINTAYO A MASIRIB NO AGTULNOGTAYO ITI DIOS

“Siak, ni Jehova a Diosyo, Daydiay mangisursuro kadakayo tapno magunggonaankayo, Daydiay mangiturturong iti dalan a rumbeng a pagnaanyo.”​—ISAIAS 48:17.

Am-ammo ken idaldalannatayo ni Jehova a Dios, ti Namarsua kadatayo. No kayattayo ti makaaramid kadagiti nasayaat a desision maitunos kadagiti pannursurona, masapul nga ammuentayo dagiti pagayatan ti Dios manipud iti Nasantuan a Kasuratan ken iyaplikartayo dagita.

2. AGBALINTAYO A NARAGSAK NO AGTULNOGTAYO

“Naragragsak ketdi dagidiay dumdumngeg iti sao ti Dios ken mangtungtungpal iti dayta!”​—LUCAS 11:28.

Ita, nakaragragsak dagiti minilion nga agtultulnog iti Sao ti Dios. Kas pagarigan, usigentayo ti maysa a lalaki idiay Spain a managpungpungtot ken saan a nasayaat ti panangtratona iti sabsabali, uray iti asawana. Naminsan, nabasana ti insurat ni propeta Moises maipapan iti kinaalumamay ni Jose nga anak ni Jacob. Nailako ni Jose kas adipen ken naibalud uray awan basolna; ngem naalumamay, mannakikappia, ken manangpakawan latta. (Genesis, kapitulo 37-45) Inamin ti lalaki: “Ti ulidan ni Jose ti nakatulong kaniak nga agbalin a naalumamay, naasi, ken managteppel isu a naragragsakak itan.”

Ad-adu pay a tulong ti mabasatayo iti Nasantuan a Kasuratan no kasano a tratuen ti sabsabali. Usigentayo dagita iti sumaruno nga artikulo.