Ti Maitulong Kenka ti Kararag

Nagpadoktor ni Pamela gapu ta nakaro ti sakitna. Nagkararag met iti Dios tapno maibturanna ti narigat a situasionna. Nakatulong kadi kenkuana ti kararag?

Imbaga ni Pamela: “Idi agpapaagasak iti kanser, mabutbutengak unay. Ngem no agkararagak ken Jehova a Dios, agkalma ti riknak ken makapagpanunotak a naimbag. Agpapaut-otak pay laeng ngem tultulongannak ti kararag tapno saanko nga ay-ayen ti bagik. No adda mangkomusta kaniak, ibagak nga agsaksakitak latta ngem naragsakak!”

Siempre, saantayo nga urayen a rumigat ti kasasaadtayo sakbay nga agkararagtayo. Adda problematayo amin, dakkel ken bassit, ket masansan a mariknatayo a kasapulantayo ti tulong tapno mapagballigiantayo dagita. Makatulong kadi ti kararag?

Kuna ti Biblia: “Ipalladawmo ken Jehova ti dadagsenmo, ket saranayennakanto. Dinanto pulos ipalubos a matumba ti nalinteg.” (Salmo 55:22) Talaga a makaliwliwa dayta! Kasano ngarud a makatulong kenka ti kararag? No agkararagka iti Dios iti umiso a pamay-an, itedna ti kasapulam tapno mapagballigiam dagiti problemam.—Kitaem ti kahon a “Ti Maited Kenka ti Kararag.”

Ti Maited Kenka ti Kararag

Talna ti panunot

“Ipakaammoyo koma iti Dios ti amin a kiddawyo . . . ket ti talna ti Dios a mangartap iti amin a pannakaawat salaknibannanto ti puso ken isipyo babaen ken Kristo Jesus.” (Filipos 4:6, 7) No iyebkasmo iti Dios ti amin a pakadanagam, tulongannaka nga agtalinaed a kalmado ken agaramid iti nainsiriban a desision uray mais-stress-ka.

Sirib manipud iti Dios

“No agkurang iti sirib ti asinoman kadakayo, agtultuloy koma nga agdawat iti Dios, ta sipaparabur nga ikkanna ti amin ken saan a mangumsi, ket maitedto dayta kenkuana.” (Santiago 1:5) No dadduma, makaaramidtayo iti saan a nasayaat a desision gapu ta mais-stress-tayo. No dumawatka iti sirib iti Dios, ipalagipna kenka dagiti makatulong a prinsipio iti naisurat a Saona, ti Biblia.

Bileg ken liwliwa

“Ta adda pigsak a mangsango iti amin a banag gapu iti daydiay mangpabpabileg kaniak.” (Filipos 4:13) Ni Jehova ti Mannakabalin-amin a Dios isu a maikkannaka iti bileg a kasapulam a mangibtur iti pakarigatan wenno pakasuotan. (Isaias 40:29) Awagan met ti Biblia ni Jehova kas “Dios ti amin a liwliwa.” Maliwliwanatayo “iti amin a pakasuotantayo.”—2 Corinto 1:3, 4.