Apay a Saan a Maaw-awan ti Gura?

Apay a saan a maaw-awan ti gura ditoy lubong? Tapno maammuantayo ti rason, masapul a maawatantayo no ania ti gura, no apay a tumubo ti gura, ken no kasano nga agwaras dayta.

Ania ti Gura?

Ti gura ket grabe a pannakasuron wenno panangbusor iti maysa a tao, wenno grupo dagiti tattao. Ken saan a basta maawan dayta.

NO APAY A TUMUBO TI GURA KADAGITI TATTAO

Adu ti rason a gumura dagiti tattao. Magurgura ti dadduma, saan a gapu iti ar-aramidenda, no di ket gapu iti kinasiasinoda. Dagiti magurgura ket maibilbilang a dakes, naranggas, wenno saanen a makapagbalbaliw. Mabalin a maibilangda a nababbaba, perhuisio, wenno sakit ti ulo. Posible a nagbalinda a biktima ti kinaranggas, kinaawan hustisia, wenno dadduma pay a pasamak nga isu ti rason a timmubo ti gura iti pusoda.

NO KASANO NGA AGWARAS DAYTA

Posible a guraen ti maysa uray dagiti saanna pay nga am-ammo. Kas pagarigan, mabalin a saan a mapupuotan ti maysa a maimpluensiaan isuna iti negatibo a kapanunotan dagiti kapamilia wenno gagayyemna. Gapu iti dayta, nagbiit nga agwaras ti gura agingga a maimpluensiaan metten ti intero a komunidad.

No ammotayo no kasano kabiit nga agwaras ti gura, maawatantayo no apay a nagadu ti aggiginnura. Ngem tapno mapasardeng ti panagwaras ti gura iti lubong, masapul nga ammuentayo ti ibagbaga ti Biblia a nangrugian ti gura.

IBAGA TI BIBLIA TI RAMUT TI GURA

Diagram nga addaan iti dua nga agrinrinnikus nga arrow a mangipakpakita kadagiti rason nga agwarwaras ti gura. 1. Di umiso nga impormasion manipud iti kakadua, social media, ken damdamag. 2. Kinaawan ti ammo maipapan iti kultura, puli, wenno relihion. 3. Buteng iti panagbalbaliw, a mapukawan, wenno iti posible a mapasamak. 4. Gura a pakairamanan ti diskriminasion, kinaranggas, ken panangidumduma.

SAAN A TAO TI NANGRUGIAN TI GURA. Nangrugi dayta idi nagrebelde iti Dios ti maysa nga anghel idiay langit, a naawagan idi agangay iti Satanas a Diablo. “Nagbalin [ti Diablo] a mammapatay idi nangrugi” nga agrebelde. Gapu ta “ulbod ken isu ti ama ti kinaulbod,” im-impluensiaanna dagiti tattao tapno guraen ken saktanda ti maysa ken maysa. (Juan 8:44; 1 Juan 3:11, 12) Ibagbaga ti Biblia nga isu ket nakadakdakes, nauyong, ken agresibo.—Job 2:7; Apocalipsis 12:9, 12, 17.

GAPU TA IMPERPEKTO DAGITI TATTAO, NALAKADA LAENG A GUMURA. Nagbasol ti umuna a tao a ni Adan gapu ta tinuladna ni Satanas. Kas resultana, natawid ti amin a tao ti basol ken kinaimperpekto. (Roma 5:12) Ti umuna nga anak ni Adan a ni Cain, pinatayna ti kabsatna a ni Abel gapu iti gura. (1 Juan 3:12) Nupay kasta, adu a tattao ti mangipakpakita iti ayat ken asi. Ngem gapu iti natawid a basol, adu ti naapal, natangsit, ken bagida laeng ti pampanunotenda—ug-ugali a mangrubrob iti gura.—2 Timoteo 3:1-5.

PANANGGURA GAPU ITI DISKRIMINASION. Gapu ta saan a naasi ti adu a tattao ken naalas ti ug-ugali ken ar-aramidda, kumarkaro ti gura iti lubong. Kumarkaro ti panangidumduma, diskriminasion, panangin-insulto, panang-bully, ken bandalismo gapu ta “ti intero a lubong ket adda iti pannakabalin daydiay managdakdakes,” ni Satanas a Diablo.—1 Juan 5:19.

Ngem saan la a basta ilawlawag ti Biblia ti ramut ti gura. Ibagana met ti solusion.