No Kasano ti Makabirok iti Nasayaat a Pakiasawaan

1-2. (a) Ania dagiti masapul nga ikabilangan dagiti Kristiano sakbayda nga agarem wenno makiinnarem? (b) Ania ti kaipapanan dagiti termino a “panagarem” ken “panagnobio”? (Kitaen ti “Kaipapanan Dagiti Termino.”)

KAYATMO kadin ti makiasawa? Nupay saan met ketdi a ti panagasawa ti tulbek ti kinaragsak, kayat ti adu a single a Kristiano ti makiasawa, agtutubo wenno nataenganda man. Siempre, sakbayka nga agarem wenno makiinnarem, masapul a nabilegen ti relasionmo ken Jehova, nataenganen ti panagpampanunotmo, ken kabaelamon nga ibaklay dagiti pinansial a responsabilidad ti agbalin a pamiliam.a (1 Cor. 7:36) Iti kasta, dakdakkel ti posibilidad a naragsakto ti panagasawam.

² Nupay kasta, saan a kanayon a nalaka ti makabirok iti nasayaat a pakiasawaan. (Prov. 31:10) Ken uray no nakabirokkan iti kayatmo nga am-ammuen a naimbag, mabalin a saan a nalaka nga irugi ti panagarem.b Iti daytoy nga artikulo, pagsasaritaantayo dagiti makatulong kadagiti Kristiano tapno makabirokda iti nasayaat a pakiasawaan ken tapno mairugida ti agarem. Ammuentayo met no kasano a matulongan ti kongregasion dagiti kayatda ti makiasawa.

PANAGBIROK ITI NASAYAAT A PAKIASAWAAN

3. Ania dagiti masapul nga ikabilangan ti maysa a Kristiano no agbirbirok iti pakiasawaanna?

³ No kayatmo ti makiasawa, nasayaat no ammuem dagiti kualidad a birbirokem iti agbalinto nga asawam sakbayka nga agarem wenno makiinnarem.c Ta no saan, baka mapalabasmo ti gundaway a maam-ammom ti nasayaat a pakiasawaam koma, wenno baka ti maaremmo ket daydiay saan a maibagay kenka. Siempre, ti nasayaat a pakiasawaan ket masapul a bautisado a Kristiano. (1 Cor. 7:39) Ngem saan a gapu ta Saksi ti maysa ket nasayaaten a pakiasawaan. Isu a mabalinmo nga isaludsod iti bagim: ‘Ania dagiti kalatko iti biag? Ania dagiti napateg a kualidad a birbirokek iti agbalinto nga asawak? Rasonable kadi dagiti eks-ekspektarek?’

4. Ania ti iramraman ti dadduma kadagiti kararagda?

⁴ No kayatmon ti makiasawa, sigurado nga inkararagmon dayta ken Jehova. (Fil. 4:6) Siempre, saan nga ikarkari ni Jehova iti asinoman nga ikkanna ida iti asawa. Ngem maseknan kadagiti kasapulam ken iti rikriknam ken tulongannaka bayat nga agbirbirokka iti agbalinto nga asawam. Isu nga itultuloymo nga ibaga kenkuana dagiti tarigagaymo ken ti rikriknam. (Sal. 62:8) Ikararagmo nga ikkannaka iti sirib ken tulongannaka nga agan-anus. (Sant. 1:5) Imbaga ni Johnd a single a brother a taga-United States ti iramramanna kadagiti kararagna: “Ibagbagak ken Jehova dagiti kualidad a birbirokek iti agbalinto nga asawak. Ikarkararagko nga ikkannak kadagiti gundaway a makabirokak iti agbalinto a nasayaat nga asawak. Kidkiddawek met ken Jehova a tulongannak a mangpasayaat kadagiti kualidadko tapno agbalinakto a nasayaat nga asawa.” Imbaga met ni Tanya a maysa a sister a taga-Sri Lanka: “Bayat nga agbirbirokak iti nasayaat a pakiasawaak, kidkiddawek ken Jehova a tulongannak nga agtalinaed a matalek, positibo, ken naragsak.” Uray no saanka a dagus a makabirok iti nasayaat a pakiasawaam, ikarkari ni Jehova nga itultuloyna nga ipaay dagiti pisikal ken emosional a kasapulam.—Sal. 55:22.

5. No single-ka, ania dagiti gundaway a posible a maam-ammom ti maysa a mangay-ayat ken Jehova? (1 Corinto 15:58) (Kitaen met ti ladawan.)

⁵ Iparparegta kadatayo ti Biblia nga ‘adu ti aramidentayo iti trabaho ti Apo.’ (Basaen ti 1 Corinto 15:58.) No naregtaka iti panagserbim ken Jehova, ad-adu ti gundawaymo a makalangen ti agduduma a kakabsat. Maparegtaka la ngaruden, maaddaanka pay kadagiti gundaway a mangam-ammo iti padam a single a prioridadna ti panagserbi ken Jehova. Mariknamto ti pudno a kinaragsak bayat nga ar-aramidem ti amin a kabaelam a mangparagsak ken Jehova.

6. Ania ti masapul a laglagipen dagiti single a Kristiano bayat nga agbirbirokda iti pakiasawaanda?

⁶ Ngem masapul nga agannadka. Saanmo nga ipalubos a ti panagbirokmo iti pakiasawaam ti agbalin a kapatgan iti biagmo. (Fil. 1:10) Ti pudno a kinaragsak ket nakadepende iti relasionmo ken Jehova, saan a no adda asawam wenno awan. (Mat. 5:3) Ken bayat a single-ka pay, mabalin a nawaywayaka a mangpalawa iti ministeriom. (1 Cor. 7:​32, 33) Usarem ti tiempom iti kasayaatan a pamay-an. Kuna ni Jessica a sister a taga-United States a nakiasawa idi dandanin 40 ti tawenna, “Idi balasangak pay, kanayonak a busy iti ministerio, ket dayta ti nakatulong tapno agbalinak a kontento uray no kayatko koman ti makiasawa.”

OBSERBARAM PAY LAENG

7. Apay a masirib ti maysa no obserbaranna pay laeng ti kursonadana sakbay nga armenna? (Proverbio 13:16)

⁷ Kasanon no iti panagkunam ket nakitamon ti nasayaat a pakiasawaam? Dagus kadin nga armem? Kuna ti Biblia a ti masirib a tao ket agpanunot a naimbag sakbay nga agtignay. (Basaen ti Proverbio 13:16.) Isu a masiribka no obserbaram pay laeng a naimbag sakbay nga armem. “Nalaka la a matnag ti riknam iti maysa ngem mabalin a nalaka met la a mapukaw dayta,” kuna ni Aschwin a taga-Netherlands. “Isu a no obserbaram pay laeng ti kursonadam, saanka nga agarem a naibatay iti rikna a posible a dagus a mapukawto met laeng.” Gapuna, bayat nga ob-obserbaram ti kursonadam, baka makitamto a saan gayam nga isuna ti nasayaat a pakiasawaam.

8. Kasanom a maobserbaran ti posible a pakiasawaam? (Kitaen met ti ladawan.)

⁸ Ania ti mabalinmo nga aramiden tapno di madlaw nga ob-obserbaram ti kursonadam? Kadagiti gimong wenno gathering, mabalin nga adda mapaliiwmo maipapan iti espiritualidad, personalidad, ken ugalina. Siasino ti gagayyemna, ken ania ti kanayon nga ibagbagana kadakuada? (Luc. 6:45) Agpada kadi dagiti kalatyo? Mabalinmo ti agsaludsod kadagiti panglakayen iti kongregasionna wenno iti dadduma pay a nataengan iti naespirituan a makaam-ammo unay kenkuana. (Prov. 20:18) Mabalinmo a damagen no ania ti reputasion ken kualidadna. (Ruth 2:11) Bayat nga ob-obserbaram ti kursonadam, siguraduem a saan nga alusiisen wenno mabainan. Respetuem ti riknana ken ti pribado a biagna.

9. Sakbay nga ipudnom ti riknam iti kursonadam, ania ti masapul a siguraduem?

⁹ Kasano kabayag nga obserbaram ti kursonadam sakbay nga armem? No dagus nga ipudnom ti rikriknam kenkuana, mabalin a panunotenna a darasudoska. (Prov. 29:20) Iti sabali a bangir, no nabayag unay sakbay nga ipudnom ti riknam, mabalin a panunotenna a nakapuy ti panagdesdesisionmo, lalo no nadlawnan a kursonadam isuna. (Ecl. 11:4) Laglagipem, sakbay nga ipudnom ti riknam, saan a kasapulan a siguradokan nga isuna ti pakasaram. Ngem masapul a siguraduem a nakasaganakan a mangasawa ken ti kursonadam ket posible a nasayaat a pakiasawaan.

10. Ania ti masapul nga aramidem no nadlawmo a kayatnaka ti maysa ngem saanmo met a kursonada?

¹⁰ Ngem ania ti aramidem no nadlawmo a kayatnaka ti maysa? No saanmo a kayat isuna, masapul a nalawag a makita dayta iti panagtigtignaymo. Kakaasi met no ipariknam a posible nga agbalin a dakayo idinto ta adayo met gayam a mapasamak dayta.—1 Cor. 10:24; Efe. 4:25.

11. Kadagiti lugar a maitulag ti panagarem wenno panagasawa, ania dagiti masapul a maikabilangan?

¹¹ Iti dadduma a kultura, dagiti nagannak wenno dadduma nga adulto ti mangpili iti pakiasawaan dagiti single a kabagianda. Iti dadduma a lugar, dagiti kapamilia wenno gagayyem ti single ti mangbirok iti nasayaat a pakiasawaanna sada iyurnos ti panagkitada tapno maammuanda no kayatda ti maysa ken maysa. No sika ti makiddaw a mangyurnos iti panagarem wenno panagasawa, agpada nga ikabilangam dagiti kayat ken kasapulanda a dua. No nakabirokkan, ikagumaam nga ammuen ti adu nga impormasion maipapan iti dayta a tao tapno maammuam ti personalidad, kualidad, ken kangrunaan iti amin, ti espiritualidadna. Napatpateg nga amang ti nadekket a relasionna ken Jehova ngem iti kuarta, edukasion, wenno iti kasasaad ti biagna. Nupay kasta, laglagipem nga isuda a dua ti mangaramid iti pinal a desision no kayatdanto ti agkasar wenno saan.—Gal. 6:5.

NO KASANOM A RUGIAN TI PANAGAREM

12. No talaga a kayatmo nga armen ti kursonadam, kasanom nga ibaga dayta kenkuana?

¹² No talaga a kayatmo nga armen ti kursonadam, kasanom nga ibaga dayta kenkuana?e Mabalinmo nga iyurnos ti panagtungtongyo a dua iti man publiko a lugar wenno iti selpon wenno telepono. Ibagam a kayatmo nga armen ken kayatmo nga am-ammuen a naimbag. (1 Cor. 14:9) No kasapulan, ikkam iti tiempo tapno pagpanunotanna ti isungbatna kenka. (Prov. 15:28) Ket no ibagana a saannaka a kayat, respetuem ti desisionna.

13. Ania ti mabalinmo nga aramiden no adda nangibaga kenka a kayatnaka? (Colosas 4:6)

¹³ Kasanon no adda mangibaga a kayatnaka? Sigurado nga inturturedna nga ibaga dayta kenka, isu a nasingpet ken nadayaw koma ti pannakisaritam kenkuana. (Basaen ti Colosas 4:6.) No kasapulam ti tiempo tapno pagpanunotam ti imbagana, ipakaammom dayta kenkuana. Ngem saanmo nga ibaybayag. (Prov. 13:12) No saanmo a kayat isuna, nasingpet ken nalawag koma ti panangibagam iti dayta. Kitaentayo ti imbaga ti brother a taga-Austria a ni Hans idi adda sister a nagpudno kenkuana: “Imbagak ti desisionko iti nalawag ken nasingpet a pamay-an. Dagus nga inaramidko dayta ta saanko a kayat a mangnamnama iti awan. Kalpasanna, nagan-annadak metten iti pannakilangenko kenkuana.” Iti sabali a bangir, no kursonadam met ti nagipudno kenka, ilawlawagmo ti riknam ken ibagam ti namnamaem bayat nga agnobiokayo. Mabalin nga agduma dagiti namnamaenyo a dua, depende iti kultura wenno iti dadduma pay a banag.

KASANO A MAKATULONG TI DADDUMA KADAGITI SINGLE A KAKABSAT?

14. Ania ti ibagatayo tapno matulongantayo dagiti single a kakabsat?

¹⁴ Ania ti aramidentayo tapno matulongantayo dagiti single a kakabsat a kayatda ti makiasawa? Ti maysa a pamay-an ket panunotentayo a naimbag dagiti ibagatayo. (Efe. 4:29) Isaludsodtayo iti bagitayo: ‘Sursuronek kadi dagidiay awan pay ti asawana? No makakitaak iti baro ken balasang nga agtungtungtong, dagus kadi a panunotek nga isudan?’ (1 Tim. 5:13) Kanayonanna, saantayo koma nga iparparikna kadagiti single a kapammatiantayo nga adda kurang iti biagda gapu ta awan pay ti asawada. Kuna ni Hans, a nadakamaten itay: “Ibagbaga ti dadduma a kakabsat: ‘Apay a dika pay la makiasawa? Lumaklakaykan.’ Ipakita dagita a komento a kasla saantayo nga ap-apresiaren ida ken kasla pilpilitentayo ida a makiasawa.” Imbes a kasta ti aramidentayo, nasaysayaat no mangpanunottayo iti pangkomendarantayo kadakuada!—1 Tes. 5:11.

15. (a) Sigun iti prinsipio ti Roma 15:​2, ania ti masapul a panunotentayo a naimbag sakbay a tulongantayo ti maysa a mangbirok iti pakiasawaanna? (Kitaen met ti ladawan.) (b) Ania dagiti napateg a nasursurom iti video?

¹⁵ Kasanon no panagkunam ket agkabagayan ti maysa a baro ken balasang? Ibaga ti Biblia nga ikabilangantayo ti rikna ti dadduma. (Basaen ti Roma 15:2.) Saan a kayat ti adu a single ti maireto, ket masapul a respetuentayo dayta. (2 Tes. 3:11) Baka kayat met ti dadduma ti matulongan. Ngem masapul a ditay ar-aramiden dayta no saanda nga agpatpatulong.f (Prov. 3:27) Adda met dagiti single a dida kayat ti direkta a mayam-ammo. Kuna ti balasang a ni Lydia a taga-Germany: “Mabalinmo nga awisen ida iti gathering a kadua ti dadduma pay a kakabsat. Ikkantay laeng ida iti gundaway nga agam-ammo sa makaammodanton kalpasanna.”

16. Ania ti masapul a laglagipen dagiti single a Kristiano?

¹⁶ Posible nga agbalintayo amin a naragsak ken kontento, adda man asawatayo wenno awan! (Sal. 128:1) Isu a no kayatmon ti makiasawa ngem awan pay ti nabirokam, itultuloymo latta nga iyun-una ti panagserbim ken Jehova. Kuna ti sister a ni Sin Yi a taga-Macao: “Ababa laeng ti tiempo ti kina-single-mo ita no ikomparam iti kapaut a kaduamto ti asawam idiay Paraiso. Saanmo a saysayangen ti kina-single-mo. Usarem ketdi a naimbag.” Ngem kasanon no nabirokamon ti nasayaat a pakiasawaam, inaremmon, ket agnobiokayon? Iti sumaruno nga artikulo, ammuem dagiti mabalinmo nga aramiden tapno makaaramidkayo iti nainsiriban a desision.