Salsaludsod Dagiti Agbasbasa
Siasino “dagiti napili nga anghel” a nadakamat iti 1 Timoteo 5:21?
Sinuratan ni apostol Pablo ti padana a panglakayen a ni Timoteo. Imbagana: “Sipapasnek a bilinenka iti sanguanan ti Dios ken ni Kristo Jesus ken dagiti napili nga anghel a tungpalem dagitoy nga instruksion nga awan ti dasdasigam wenno pabpaboram.”—1 Tim. 5:21.
Umuna, pagsasaritaantayo no siasino dagiti saan a karaman kadagidiay nga anghel. Nalawag a saan a karaman ditoy ti 144,000. Idi sinuratan ni Pablo ni Timoteo, saan pay idi a nangrugi ti panagungar idiay langit dagiti Kristiano a dinutokan ti espiritu. Saan pay met idi a nagbalin nga espiritu a parsua dagiti apostol ken ti dadduma pay a dinutokan ti espiritu, isu a saan a mabalin a tumukoy kadakuada “dagiti napili nga anghel.”—1 Cor. 15:50-54; 1 Tes. 4:13-17; 1 Juan 3:2.
Kasta met, “dagiti napili nga anghel” ket saan a tumukoy kadagiti anghel a nagsukir idi tiempo ti Layus. Dimmasig dagita nga anghel ken Satanas. Nagbalinda a demonio ken kabusor ni Jesus. (Gen. 6:2; Luc. 8:30, 31; 2 Ped. 2:4) Iti masanguanan, maitapuakdanto iti nakaun-uneg nga abut iti 1,000 a tawen, sa kalpasanna, madadaeldanto a kadua ti Diablo.—Jud. 6; Apoc. 20:1-3, 10.
Dagiti ngarud “napili nga anghel” a tuktukoyen ni Pablo ket dagiti anghel idiay langit a nangsuporta iti “Dios ken ni Kristo,” nga agpada a nadakamat iti isu met laeng a bersikulo.
Pinullo a ribu ti bilang dagiti matalek nga anghel. (Heb. 12:22, 23) Agparang a saan nga agpapada ti annongen nga inted ni Jehova iti tunggal maysa kadakuada. (Apoc. 14:17, 18) Lagipentayo nga adda idi gundaway a naibaon ti maysa laeng nga anghel a mangdadael iti 185,000 nga Asiriano a soldado. (2 Ar. 19:35) Mabalin nga adu met nga anghel ti addaan iti annongen a ‘mangurnong ken mangikkat manipud iti Pagarian ni Jesus ti amin a pakaigapuan ti pannakaitibkol ken dagiti tattao nga agar-aramid iti dakes.’ (Mat. 13:39-41) Ti met dadduma ket mabalin a ‘mangummong kadagiti napili’ a mapan idiay langit. (Mat. 24:31) Adda met dagiti ‘mangbantay iti amin a dalantayo.’—Sal. 91:11; Mat. 18:10; idilig ti Mateo 4:11; Lucas 22:43.
“Dagiti napili nga anghel” a nadakamat iti 1 Timoteo 5:21 ket posible a dagiti naikkan iti espesial nga annongen a tumulong kadagiti kongregasion. Iti konteksto, nangipaay ni Pablo iti nainsiriban a balakad no kasano nga asikasuen dagiti panglakayen dagiti responsabilidadda, ken no kasano met a maipakita dagiti kakabsat ti panagraemda kadagiti panglakayen. Para kadagiti panglakayen, masapul nga ibaklayda dagiti responsabilidadda nga ‘awan ti dasdasigan wenno pabpaboranda’ ken saanda koma nga agdesision wenno mangukom a sidadarasudos. Kalpasanna, nangipaay ni Pablo iti nagsayaat a rason no apay a masapul a surotenda ti balakadna. Imbagana a dagiti panglakayen ket agserserbi kadagiti kakabsat “iti sanguanan ti Dios ken ni Kristo Jesus ken dagiti napili nga anghel.” Nalawag ngarud a ti dadduma nga anghel ket naikkan iti responsabilidad a tumulong kadagiti kongregasion kas iti panangipaayda iti proteksion kadagiti agdaydayaw iti Dios, panangtulongda kadakuada iti trabaho a panangasaba, ken panangireportda ken Jehova kadagiti naobserbaranda.—Mat. 18:10; Apoc. 14:6.