Masapul Kadin nga Isardengko ti Agmaneho?

Kasta kadi met ti situasionmo? No wen, ania ti makatulong kenka tapno makapagdesisionka no masapul nga isardengmon ti agmaneho?

Iti dadduma a pagilian, no ti drayber ket maysan a senior citizen, ken kayatna nga i-renew ti lisensiana, masapul nga agpadoktor nga umuna tapno makaala iti medical certificate a mangipakita a kabaelanna pay ti agmaneho. Linteg dayta dagiti gobierno kadagita a pagilian. Ket masapul a suroten dayta dagiti Kristiano nga agnanaed kadagita a lugar. (Roma 13:1) Ngem sadinoman ti pagnanaedam, adda dagiti pamay-an a makatulong tapno makapagdesisionka no masapul nga isardengmon ti agmaneho.

USIGEM TI PANAGMANEHOM

Insingasing ti website ti National Institute on Aging (NIA) iti United States nga isaludsodmo dagitoy iti bagim:

• Marigatanak kadin a mangbasa kadagiti road sign wenno pagilasinan iti kalsada? No met rabii, marigatanak kadin a mangkita iti dalan?

• Marigatanak kadin a mangkita iti side mirror, rear mirror wenno kadagiti blind spot bayat nga agmanmanehoak?

• Alistoak pay kadi nga agtignay no agmanmanehoak kas koma no masapul nga agprenoak a dagus wenno baddekak ti siliniador?

• Nakabumbuntog kadin ti panagmanehok nga uray la siak no kuan ti pakaigapuan ti traffic?

• Namin-adu kadin a gistayanak naaksidente wenno adda kadin kuppit wenno gasgas ti luganko gapu ta adda dagiti banag a nadungparko?

• Pinaranak kadin ti polis wenno traffic enforcer gapu iti panagmanehok?

• Adda kadin dagiti tiempo nga agdungsaak bayat nga agmanmanehoak?

• Adda kadi dagiti tomtomarek a posible a makaapektar iti panagmanehok?

• Imbaga kadin dagiti kapamilia wenno gagayyemko a madanaganda no agmanmanehoak?

No wen ti sungbatmo iti maysa wenno dua kadagita a saludsod, baka addan dagiti masapul a balbaliwam iti panagmanehom. Kas pagarigan, baka limitaramon ti panagmanehom, lalo iti rabii. Kanayon nga usigem ti panagmanehom. Mabalinmo ti agsaludsod kadagiti kapamilia wenno gagayyemmo no ania ti makunada iti panagmanehom. Mabalinmo met ti agenrol iti driving school tapno masursurom ti nataltalged a panagmaneho. Ngem no wen ti sungbatmo iti tallo wenno ad-adu pay kadagiti saludsod iti ngato, baka nasaysayaat no isardengmon ti agmaneho.a

AGPAIWANWANKA KADAGITI PRINSIPIO TI BIBLIA

Mabalin a marigatantayo a mangakseptar a saanen a kas iti dati ti panagmanehotayo. Ken no dadduma, saantayo pay ketdi a kayat a pagsaritaan dayta. Ania ngarud dagiti prinsipio ti Biblia a makatulong kenka a mangusig iti panagmanehom tapno makaaramidka iti nasayaat a desision? Kitaentayo dagitoy dua a prinsipio.

Agtalinaedka a naemma. (Prov. 11:2) Bayat a tumataengantayo, mabalin a kumapuyen ti panagkita, panagdengngeg, ken dagiti maseltayo. Saan metten a kasdiay kapartak ti panagtignaytayo. Kas pagarigan, kaaduan a nataengan ti agsardengen nga agay-ayam iti isports gapu ta ammoda a nalaklakadan a maaksidente bayat a tumataenganda. Agaplikar met dayta a prinsipio iti panagmaneho. Ti naemma a tao isardengnan ti agmaneho ta sipapanunot iti kinatalgedna. (Prov. 22:3) Ket no ibaga ti dadduma a madanaganda iti panagmanehona, denggen ken ipangagna ida.—Idilig ti 2 Samuel 21:​15-17.

Liklikam ti makabasol iti dara. (Deut. 22:8) No saan a naannad ti maysa a drayber, mabalin nga adda madangran wenno matay gapu iti panagmanehona. No met itultuloy latta ti maysa a nataenganen ti agmaneho uray no saanen a kas iti dati ti kalaingna nga agmaneho, pagpegpeggadenna ti biagna ken ti sabsabali. Ket no adda matay gapu iti panagmanehona, makabasol la ketdi iti dara wenno panangpapatay.

No marigatanka nga agdesision no masapul nga isardengmon ti agmaneho, dimo koma panunoten a dayta ti mangkissay iti dignidad wenno pategmo kas maysa a tao. Ay-ayatennaka ni Jehova gapu kadagiti nagsasayaat a kualidadmo kas iti kinaemma, kinapakumbaba, ken ti panangpampanunotmo iti pagimbagan ti sabsabali. Ikarkarina pay ketdi a suportaran ken liwliwaennaka. (Isa. 46:4) Dinakanto pulos panawan. Isu a kiddawem kenkuana a tulongannaka a mangusar iti praktikal a siribmo ken kadagiti prinsipio ti Biblia tapno makapagdesisionka no masapul nga isardengmon ti agmaneho.