Ni Jesus—Ti Naasi a Nangato a Paditayo

1-2. (a) Apay nga imbaon ni Jehova ti Anakna ditoy daga? (b) Ania ti pagsasaritaantayo iti daytoy nga artikulo? (Hebreo 5:​7-9)

AGARUP 2,000 a tawenen ti napalabas, imbaon ni Jehova a Dios ditoy daga ti kapatgan nga Anakna. Apay? Ti maysa a rason ket tapno wayawayaanna dagiti tattao iti basol ken ipapatay ken tapno ikkatenna ti amin a problema a pinataud ni Satanas. (Juan 3:16; 1 Juan 3:8) Malaksid iti dayta, ammo met ni Jehova a no mapadasan ni Jesus ti agbiag kas tao, ad-adda a maipakitana ti empatia, ken agbalin a mas mannakipagrikna ken naasi a Nangato a Paditayo. Nagbalin ni Jesus kas Nangato a Padi kalpasan a nagpabautisar idi 29 C.E.a

² Iti daytoy nga artikulo, pagsasaritaantayo no kasano a nakatulong ken Jesus dagiti kapadasanna ditoy daga tapno agbalin a mas kualipikado nga agserbi kas mannakipagrikna a Nangato a Padi. No ad-adda a maawatantayo no kasano a ni Jesus ket “napagbalin a perpekto” para iti dayta nga akemna, nalaklakatayo ti agkararag ken suminged ken Jehova, nangruna no maup-upaytayo gapu kadagiti basol ken pagkapuyantayo.—Basaen ti Hebreo 5:​7-9.

IMMAY DITOY DAGA TI DUNGDUNGNGUEN NGA ANAK TI DIOS

3-4. Ania dagiti dadakkel a panagbalbaliw a napadasan ni Jesus idi immay ditoy daga?

³ Adu kadatayo ti nakapadas kadagiti panagbalbaliw iti biag. Kas pagarigan, mabalin a pinanawantayo ti balaytayo ken dagiti ipatpategtayo a kapamilia ken gagayyem. Sigurado a narigat dayta. Ngem awan ti tao a nakapadas kadagiti panagbalbaliw a napasaran ni Jesus. Idiay langit, isu ti kaunaan ken kapatgan kadagiti espiritu nga annak ti Dios. Kasta la unay ti panagayat kenkuana ni Jehova. Kanayon met a nakaragragsak nga agserserbi iti ‘kannawan nga ima’ ti Dios. (Sal. 16:11; Prov. 8:30) Ngem sigun iti Filipos 2:7 situtulok nga “insukona ti amin nga adda kenkuana” ken pinanawanna ti nangato a posisionna idiay langit tapno makipagnaed kadagiti imperpekto a tattao ditoy daga.

⁴ Panunotentayo met dagiti immuna a tawen ti biag ni Jesus ditoy daga. Nayanak iti napanglaw a pamilia. Kasanotayo nga ammo? Makita dayta iti nanumo nga indaton dagiti nagannakna iti templo kalpasan a nayanak. (Lev. 12:8; Luc. 2:24) Idi naammuan met ti dakes nga ari a ni Herodes a nayanaken ni Jesus, pinadasna a patayen. Ngem nagkamang ti pamilia ni Jesus idiay Egipto iti sumagmamano a tiempo tapno malisianda dayta a dakes a plano ni Herodes. (Mat. 2:​13, 15) Talaga a naiduma unay ti biag ni Jesus ditoy daga no ikompara iti biagna idi idiay langit!

5. Ania dagiti nakita ni Jesus idi adda ditoy daga, ken kasano a dagiti kapadasanna ti nangisagana kenkuana iti akemna kas Nangato a Padi? (Kitaen met ti ladawan.)

⁵ Bayat ti kaadda ni Jesus ditoy daga, nakitana ti adu a tattao nga agrigrigat. Sigurado a nariknana ti saem ti matayan iti ipatpateg iti biag, a nalawag a pakairamanan ti pannakaamana a ni Jose. Bayat ti ministerio ni Jesus, nakalangenna dagiti agkukutel, bulsek, paralitiko, ken nagannak a natayan iti annak, ket sigurado a naasian kadakuada. (Mat. 9:​2, 6; 15:30; 20:34; Mar. 1:​40, 41; Luc. 7:13) Agpayso met ketdi nga idi adda pay laeng ni Jesus idiay langit, nakitanan nga agrigrigat dagiti tattao. Ngem idi adda isunan ditoy daga kas maysa a tao, ad-adda a maawatannan ti ut-ot a marikrikna dagiti tattao. (Isa. 53:4) Nakatulong ken Jesus dagiti napadasanna ditoy daga tapno maawatanna ti rikrikna, pannakaupay, ken panagsagaba dagiti tattao. Apay? Ngamin, nariknana a mismo ti emosion a gagangay kadagiti tattao, kas ti mariribukan, mabannog, ken maladingitan.

IMPAKITA NI JESUS TI PANNAKIPAGRIKNANA KADAGITI TATTAO

6. Ania ti masursurotayo iti padto ni Isaias maipapan iti pannakipagrikna ken asi ni Jesus kadagiti tattao? (Isaias 42:3)

⁶ Bayat ti ministerio ni Jesus, impakitana ti kasta unay nga empatia kadagiti nakapuy ken kakaasi. Gapu iti dayta, tinungpalna ti impadto ni Isaias. Iti Hebreo a Kasuratan, dagiti narang-ay ken nabileg a tattao ket nayarig iti masibsibugan a hardin wenno dadakkel ken narangpaya a kayo. (Sal. 92:12; Isa. 61:3; Jer. 31:12) Ngem dagiti pobre ken mailupitlupit a tattao ket nayarig iti naparpar a runo ken agkurkuridemdem a pabilo ti lampara, nga agpada a nagbassit ti pategda. (Basaen ti Isaias 42:3; Mat. 12:20) Babaen ken propeta Isaias, inusar ni Jehova dagitoy a pagarigan tapno ipakpakaunana ti ayat ken asi nga impakita ni Jesus kadagiti ordinario a tattao nga ibilang ti dadduma nga awan serserbida.

7-8. Kasano a tinungpal ni Jesus ti padto ni Isaias?

⁷ Impakita ni Mateo iti Ebangheliona a ni Jesus ti tuktukoyen ni Isaias iti daytoy a padtona: “Awanto ti tukkolenna a naparpar a runo, ken saannanto nga iddepen ti agkurkuridemdem a pabilo.” Nangaramid ni Jesus iti adu a milagro para kadagiti nailupitlupit a nayarig iti naparpar a runo, wenno dagiti awanan namnama a nayarig iti agkurkuridemdem a pabilo a dandanin maiddep. Kas pagarigan, adda lalaki a nakaro ti kukutelna. Adda pay kadi namnamana nga umimbag tapno makaduanan dagiti kapamilia ken gagayyemna? (Luc. 5:​12, 13) Adda met lalaki a tuleng ken marigatan nga agsao. Ania ngata ti marikriknana idi no makitkitana nga agsasarita dagiti tattao ngem awan man la a pulos ti maawatanna? (Mar. 7:​32, 33) Ngem saan la a dagita.

⁸ Idi kaaldawan ni Jesus, mamati ti adu a Judio nga addaanda iti sakit wenno depekto ta madusdusada kano kadagiti basolda wenno iti basol dagiti nagannakda. (Juan 9:2) Gapu iti dayta a di umiso a patpatien, masansan nga ilupitlupit ida ti dadduma ken iparpariknada kadakuada nga awan serserbida. Kas kaitungpalan ti padto ni Isaias, pinaimbag ida ni Jesus ken impanamnamana nga ipatpateg ida ti Dios. Ania ti isuro dayta maipapan iti marikrikna ni Jesus kadatayo?

9. Kasano nga ipakita ti Hebreo 4:​15, 16 a talaga a maawatan ti Nangato a Paditayo dagiti imperpekto a tattao?

⁹ Basaen ti Hebreo 4:​15, 16. Masiguradotayo a kanayon a maawatannatayo ni Jesus ken makipagrikna kadatayo. Maawatanna dagiti rigat ken marikriknatayo. Iti daytoy a bersikulo, ti Griego a sao a naipatarus kas “maawatan,” kaipapananna a marikrikna ni Jesus ti saem ken ladingit iti pusotayo. (Kitaen met ti Hebreo 10:​34, a sadiay, inusar ni Pablo ti isu met la a Griego a sao a naipatarus kas ‘makipagrikna.’ Kaipapanan dayta a maawatantayo koma ti rikna dagiti nakabalud a kakabsat.) No mabasatayo dagiti salaysay ti Biblia maipapan kadagiti milagro ni Jesus, makitatayo a naasian unay kadagiti tattao nga agrigrigat. Pinaimbagna kadi dagiti tattao gapu laeng ta obligado a mangaramid iti dayta? Saan. Imbes ketdi, talaga a maseknan kadakuada ken kayatna ida a tulongan. Kas pagarigan, idi pinaimbagna ti maysa nga agkukutel, mabalinna met koma a pinaimbag uray iti adayo. Ngem saanna nga inaramid dayta. Imbes ketdi, inasitgan ken iniggaman ni Jesus. Gapu iti dayta, nalabit daydi ti kaunaan a gundaway, kalpasan ti adu a tawen, a narikna manen ti agkukutel ti apros ti ima ti padana a tao! Ti ngay met umel a lalaki? Idi pinaimbag ni Jesus, inyadayona nga umuna kadagiti natagari a tattao. Ti ngay met agbabbawi a babai a dagiti luana ti pinangbabasana iti saka ni Jesus sana pinunasan babaen ti buokna? Linais ti maysa a Fariseo iti un-unegna ti inaramid dayta a babai. Ngem indepensa ni Jesus ti babai ken inlintegna ti Fariseo. (Mat. 8:3; Mar. 7:33; Luc. 7:44) Saan a pulos a naariek wenno inadaywan ni Jesus dagiti adda depektona wenno dagiti nakaaramid iti nadagsen a basol. Imbes ketdi, inawisna ida nga agbalin nga adalanna, ken impasiguradona nga ipatpategna ida. Makapagtalektayo a kasta met laeng ti marikriknana kadatayo.

TULADENTAYO TI NANGATO A PADITAYO

10. Ania dagiti us-usarentayo ita a mangtulong kadagiti umel, tuleng, ken bulsek? (Kitaen met dagiti ladawan.)

¹⁰ Kas matalek a pasurot ni Jesus, ikagkagumaantayo a tuladen ti panangipakitana iti ayat, simpatia, pannakipagrikna, ken asi. (1 Ped. 2:21; 3:8) Agpayso a saantayo a maisubli ti panagsao dagiti umel, panagdengngeg dagiti tuleng, wenno panagkita dagiti bulsek. Ngem adda maaramidantayo tapno matulongantayo ida iti naespirituan. Kas pagarigan, dagiti publikasiontayo a naibatay iti Biblia ket magun-odanen iti nasurok a 100 a sign language. Tapno met matulongantayo dagiti nakapuy ti panagkitada, magun-odanen dagiti braille a publikasiontayo iti nasurok nga 60 a lengguahe. Adda metten dagiti audio description para iti dadduma a video-tayo iti nasurok a 100 a lengguahe. Dagita ti tumultulong kadagiti umel, tuleng, ken bulsek a suminged ken Jehova ken iti Anakna.

11. Kasano a tultuladen ita ti organisasion ni Jehova ti pannakaseknan ni Jesus iti amin a kita ti tattao? (Aramid 2:​5-7, 33) (Kitaen met dagiti ladawan.)

¹¹ Ikagkagumaan ti organisasion ni Jehova a tulongan ti amin a kita ti tattao. Kalpasan ti panagungar ni Jesus, imbukbokna ti nasantuan nga espiritu kadagiti adalanna. Iti kasta, maikasabada ti naimbag a damag ‘iti bukod a lengguahe’ ti amin a naguummong para iti piesta ti Pentecostes. (Basaen ti Aramid 2:​5-7, 33.) Iti panangidaulo ni Jesus, mangipapaay ti organisasiontayo kadagiti publikasion a naibatay iti Biblia iti nasurok a 1,000 a lengguahe. Karaman kadagita ti dadduma a lengguahe a manmano laeng ti mangus-usar. Kas pagarigan, manmano laeng iti North ken South America ti mangus-usar iti dadduma a lengguahe dagiti American Indian. Ngem naipatarus dagiti publikasiontayo iti nasurok a 160 kadagita a lengguahe tapno makadanon ti naimbag a damag iti adu a tattao agingga a posible. Magun-odan metten dagiti publikasiontayo iti nasurok a 20 a lengguahe dagiti Romany. Kas resultana, rinibu nga agsasao kadagita a lengguahe ti agserserbi itan ken Jehova.

12. Ania pay ti ar-aramiden ti organisasion ni Jehova tapno matulongan dagiti tattao?

¹² Malaksid iti panangtulong kadagiti tattao a mangammo iti naimbag a damag, tumultulong met ti organisasion ni Jehova kadagiti biktima dagiti natural a didigra. Kas pagarigan, rinibu a kakabsat ti agbolboluntario a tumulong kadagiti agkasapulan a kakabsat. Mangipatpatakder met ti organisasiontayo kadagiti simple a paggigimongan tapno ad-adu pay ti maammuan dagiti tattao maipapan iti ayat ti Dios kadakuada.

MATULONGANNAKA TI NANGATO A PADITAYO

13. Ania ti dadduma a pamay-an a tultulongannatayo ni Jesus?

¹³ Kas nasayaat a pastortayo, sigsiguraduen ni Jesus nga adda ti amin a kasapulan ti tunggal maysa kadatayo. (Juan 10:14; Efe. 4:7) No dadduma, gapu kadagiti mapaspasarantayo, panagriknatayo ket kaslatayo iti agkurkuridemdem a pabilo wenno naparpar a runo. Mabalin a permi a maupaytayo no adda nakaro a sakittayo, nakaaramidtayo iti di umiso, wenno baka adda ditay pagkinnaawatan iti maysa a kapammatiantayo. Gapu kadagita, baka sangkapanunottayo laengen dagiti agdama a problema ket kumudrepen ti namnamatayo para iti masanguanan. Laglagipem a makitkita ni Jesus ti mapaspasaram ken maawatanna ti marikriknam. Gapu ta naasi ni Jesus, sigurado a tulongannaka. Kas pagarigan, mabalinna nga usaren ti nasantuan nga espiritu a mangpabileg kenka. (Juan 16:7; Tito 3:6) Kasta met, usaren ni Jesus dagiti “lallaki a kas sagut” ken ti dadduma pay a kapammatiam tapno paregtaen, pabilgen, ken tulongannaka.—Efe. 4:8.

14. No maupaytayo, ania ti aramidentayo?

¹⁴ No panagriknam ket kaslaka iti naparpar a runo wenno agkurkuridemdem a pabilo, makatulong no utobem ti akem ni Jesus kas ti Nangato a Paditayo. Laglagipem nga imbaon ni Jehova ni Jesus ditoy daga tapno itedna ti biagna kas subbot. Imbaonna met tapno mas maawatan ni Jesus ti marikrikna dagiti imperpekto a tattao no maipasangoda iti problema. No maupaytayo gapu kadagiti basol ken pagkapuyantayo, nakasagana ken situtulok ni Jesus a tumulong kadatayo “iti umiso a tiempo.”—Heb. 4:​15, 16.

15. Mangisalaysay iti kapadasan no kasano a natulongan ti maysa a nangpanaw ken Jehova nga agsubli kenkuana.

¹⁵ Iwanwanwan met ni Jesus ti ilina a mangbirok ken tumulong kadagiti immadayo iti arban ni Jehova. (Mat. 18:​12, 13) Kasta ti napadasan ni Stefano.b Dose a tawenen a naikkat iti kongregasion. Ngem nagdesision a makigimong manen. “Mababainak, ngem talaga a kayatko ti agsubli iti naayat a pamilia ni Jehova,” imbagana. “Nakasingsingpet dagiti panglakayen a nangabrasa kaniak. Ngem no dadduma, mariknak latta nga awan serserbik. Diak koma kayat idin ti agsubli. Ngem impalagip kaniak dagiti kakabsat a kayat da Jehova ken Jesus a saanak a sumuko. Idi naisubliakon, nariknak ken ti pamiliak ti nabara nga ayat ti intero a kongregasion. Idi agangay, nagpayadal metten iti Biblia ni baketko. Ket ita, agserserbikamin a sangapamiliaan ken Jehova.” Maragsakan la ketdi ti Nangato a Paditayo no makitkitana a tultulongantayo dagiti agbabbabawi a nakabasol nga agsubli iti kongregasion!

16. Apay nga agyamyamanka gapu ta addaantayo iti kasta a mannakipagrikna a Nangato a Padi?

¹⁶ Bayat ti panagbiag ni Jesus ditoy daga, tinulonganna ti adu a tattao iti umiso a tiempo. Naan-anay met a makapagtalektayo a tulongannatayo no kasapulantayo dayta. Ket iti asidegen a baro a lubong, tulongannanto dagiti natulnog a tattao a mawayawayaan iti amin nga epekto ti basol ken kinaimperpekto. Anian a yamantayo iti nakaay-ayat ken nakaas-asi a Diostayo a ni Jehova ta dinutokanna ti Anakna kas mannakipagrikna a Nangato a Paditayo!