Tulong Kadagiti Babbai a Biktima ti Panangabuso
“ITI intero a lubong, maab-abuso ti minilion a babbai, a pakairamanan dagiti ubbing. Maysaka kadi kadakuada? Kitaem no apay a napateg iti Dios a maprotektaranka ken no anianto ti aramidenna iti panangabuso kadagiti babbai.”
Dagita ti damo a mabasa iti artikulo a “Panangprotektar Kadagiti Babbai—Ti Ibaga ti Biblia” a makita iti jw.org. Iti maudi a paset dayta nga artikulo, adda link a mabalinmo nga i-click tapno mai-download-mo ti mai-print a bersion dayta nga artikulo. Ket no nai-print-mo daytan, mabalinmo a kulpien tapno agbalin a tract nga uppat ti panidna. Kasta ti inaramid ti sister a ni Stacy a taga-United States. Imbagana: “Im-print-ko dayta nga artikulo. Kalpasanna, kinaduanak ti maysa a sister a nangipan kadagita iti maysa a women’s shelter (pagkamangan dagiti babbai a biktima ti panangabuso) iti maysa a teritoria ti kongregasionmi.”
Dinamag ti maysa nga empleado idiay no mabalinna ti agkiddaw iti kanayonan a kopia ti tract tapno itedna kadagiti aggigian iti women’s shelter. Gapu iti dayta, nangitulod ti dua a sister iti 40 pay a tract ken 30 a jw.org contact card. Iti simmaruno nga isasarungkar dagiti sister, dinamag met ti administrador iti women’s shelter no mabalinda nga idemostra kadagiti babbai nga aggigian sadiay no kasano ti maar-aramid a panangyadal iti Biblia.
Napan met ni Stacy ken ti dua pay a sister iti sabali pay a women’s shelter. Nakaipaimada iti lima a kopia ti tract ken nakiddaw a mangipanda iti ad-adu pay a kopia. Imbaga ti maysa nga empleado sadiay: “Dakkel a tulong daytoy a pampleta para kadagiti babbai ditoy.” Innayonna: “Kasapulanmi daytoy.” Idi simmarungkar manen dagiti sister, impakitada met iti sumagmamano a babbai sadiay no kasano ti maar-aramid a panangyadal iti Biblia. Kas resultana, dua kadakuada ti nangibaga a kayatda ti makigimong iti Kingdom Hall iti ngudo ti lawas.
Imbaga ni Stacy: “Maragragsakankami ta nagustuan dagiti tattao daytoy nagpintas nga artikulo. No mai-print ken makulpi, nagsayaat dayta nga usaren tapno maipakaammo ti mensahe ti Pagarian kadagiti babbai a biktima ti panangabuso. Naparegtakami la unay ta adu ti naginteres. Padpadaananmin no kasanonto a bendisionan ni Jehova dagiti panagreggetmi a mangidanon kadagidiay a babbai iti naimbag a damag.”