Salsaludsod Dagiti Agbasbasa
Ania a ‘panunot’ ti ikabilto ni Jehova iti puso dagiti nasion iti asidegen a masanguanan?
Maipapan iti panangrugi ti dakkel a rigat, kuna ti Apocalipsis 17:16, 17: “Ti nakitam a 10 a sara ken ti narungsot nga animal guraendanto ti balangkantis ket alaendanto ti amin a kinabaknangna ken labusanda. Kanendanto ti lasagna ken interamente a puoranda. Ta inkabil dayta ti Dios iti pusoda tapno itungpalda ti panunotna, uray ti panangitungpalda iti maymaysa a panggepda babaen ti panangtedda iti pagarianda iti narungsot nga animal.” Ibaga idi dagiti publikasiontayo a ti ‘panunot’ nga ikabil ni Jehova iti puso dagiti nasion ket ti panangdadaelda iti ulbod a relihion.
Ngem nalawlawagan ti pannakaawattayo iti daytoy a banag. Ti ‘panunot’ nga ikabil ni Jehova iti puso dagiti nasion ket ti panangtedda “iti pagarianda iti narungsot nga animal.” Tapno maawatantayo no kasanonto a matungpal daytoy, sungbatantayo dagitoy a saludsod.
Siasino dagiti matuktukoy iti daytoy a padto? “Ti balangkantis” ket maawagan met iti “Babilonia a Dakkel.” Irepresentarna ti sangalubongan nga imperio ti ulbod a relihion. Ti “nalabaga a narungsot nga animal” irepresentarna ti United Nations. Damo a naipasdek daytoy nga organisasion idi 1919 tapno mapagtalinaed ti sangalubongan a talna. Maawagan idi dayta iti League of Nations. (Apoc. 17:3-5) Ti “10 a sara” irepresentarna ti amin a gobierno a mangsupsuportar iti narungsot nga animal.
Ania ti relasion ti balangkantis ken ti nalabaga a narungsot nga animal? “Nakatugaw” ti balangkantis iti narungsot nga animal. Kayatna a sawen, supsuportaran ken padpadasenna a kontrolen dayta.
Anianto ti mapasamak iti balangkantis? Ti narungsot nga animal, agraman ti 10 a sara a mangsupsuporta iti dayta, “guraendanto ti balangkantis.” Gapu iti kasta unay a gurada, alaendanto ti kinabaknangna ken ibutaktakda ti kinadakesna. Dadaelendanto isuna kas iti eksakto nga imbaga ni Jehova a mapasamak. (Apoc. 17:1; 18:8) Daytanto ti panagpatingga dagiti ulbod a relihion. Nupay kasta, sakbay a mapasamak dayta, tignayento ni Jehova dagiti nasion a mangaramid iti saan pay a pulos a napasamak iti intero a pakasaritaan ti tao.
Tignayento ni Jehova dagiti nasion a mangaramid iti ania? Ikabilnanto iti puso ti 10 a sara ti “panunotna,” kayatna a sawen, ‘iteddanto ti pannakabalin ken autoridadda iti nalabaga a narungsot nga animal’—ti United Nations. (Apoc. 17:13) Panunotem ti kaipapanan dayta. Basta itedto latta kadin dagiti gobierno ti pannakabalin ken autoridadda iti narungsot nga animal? Saan! Ipakita ti padto a ti Dios a mismo ti mangtignayto kadakuada a mangaramid iti dayta. (Prov. 21:1; idilig ti Isaias 44:28.) In-inutto kadi nga itedda ti pannakabalinda iti United Nations? Saan! Nalawag a biglanto nga aramidenda dayta. Ket gapu ta napigpigsanton ti pannakabalin ti narungsot nga animal, itungpalnanton ti panangukom ni Jehova kadagiti ulbod a narelihiosuan nga organisasion babaen ti mamimpinsan a panangdadaelna kadakuada.
Ania ngarud ti ekspektarentayo? No addanto dagiti damag nga in-inuten nga ad-adda a supsuportaran dagiti gobierno ti United Nations, saantayto a maseknan unay wenno agpokus kadagita. Daytoyto ketdi ti ekspektarentayo: Biglanto nga ikabil ni Jehova iti puso dagiti nasion ti panangitedda iti pannakabalinda iti narungsot nga animal. Inton mapasamak dayta, ammotayo a dandanin mangrugi ti dakkel a rigat. Bayat nga ur-urayentayo dayta, “agtalinaedtayo a siririing ken sipupuot” gapu ta asidegen a mapasamak dagiti bigla a panagbalbaliw!—1 Tes. 5:6.