Oceania

Natured a Nangipakaammo iti Website

Agtawen iti 12 ni Emily a taga-Australia. Insuro ti maestrana iti klase ti kinapateg ti panangpili iti nasayaat a gagayyem. Gapu iti dayta, impabuya ni Emily iti maestrana ti whiteboard animation video nga Ania ti Pudno a Gayyem? Idi impabuya ti maestra ti video iti klase, nagatension a naimbag dagiti estudiante ket maysa nga oras a nagsasaritaanda dayta. Impabuya met ti maestra ti video iti dadduma pay a klase. Impakita pay ni Emily ti website a jw.org iti maestrana ken kadagiti kaklasena. “Pinaturednak ni Apo Jehova a mangipakaammo iti maipapan iti website iti ginasut nga estudiante,” kuna ni Emily. “Talaga a tinulongannak.”

Maysa a Trade Fair iti Nasulinek a Lugar

Siam nga oras a nagbiahe ti lima nga agibumbunannag iti lasonglasong a kalsada iti bantay tapno mangidispley kadagiti literatura iti maysa a trade fair, wenno eksibit ti nadumaduma a produkto, idiay Suai, Timor-Leste. Nasorpresa dagiti bimmisita a nakakita kadagiti literatura a naibatay iti Biblia iti 12 a lengguahe iti dayta a lugar gapu ta bassit wenno awan pay ketdi ti naipablaak a pagbasaan iti kaaduan kadagita a lengguahe. Idi nakita ti maysa a babai ti paulo ti maysa a broshur, maragragsakan a nangibaga, “Lengguahek dayta!” Damona ti makabasa iti nayimprenta a literatura iti nakayanakanna a lengguahe a Bunak. Iti uppat laeng nga aldaw, nakaipaima dagiti kakabsat iti 4,571 a literatura, ken adu ti nangibaga a kayatda ti masarungkaran. Kaaduan kadagiti interesado ket damoda ti makisarita kadagiti Saksi ni Jehova. Adu nga oras a nagbuybuya dagiti ubbing kadagiti video iti serye nga Agbalinka a Gayyem ni Jehova iti lengguahe a Tetun Dili. Kabesado payen ti dadduma nga ubbing dagiti kanta iti dayta a serye ken maragragsakanda a mangkankanta kadagita.

“Dagita ti Talaga a Kasapulan Dagiti Estudiante”

Plano dagiti misionero a da Brian ken Roxanne ti mangidispley iti cart iti eskuelaan ti kolehio iti isla ti Palau. Nakisaritada iti presidente ti eskuelaan tapno dumawat iti permiso ket impabuyada ti maysa a video iti jw.org maipapan iti panangasabatayo iti publiko. Nangibatida met iti kopia dagiti literatura a planoda nga idispley iti cart. Imbaga ti presidente kada Brian ken Roxanne a masapul a makisaritada iti sabali pay nga opisial. Nakisaritada iti opisial ngem imbagana a masapul a makisaritada iti dean.

“Nagmayat ti pannakisaritami iti dean,” kuna ni Brian, “ngem pinagsublinakami iti opisina ti presidente. Imbaga ti presidente nga agaramidkami iti surat a dumawat iti permiso a mangidispley iti cart. Medio maup-upaykamin ta kasla pagpipinnasaandakami laeng, ngem nagaramidkami latta iti surat.”

Di nagbayag, napan manen da Brian ken Roxanne iti dean tapno ammuenda ti resulta ti kiddawda, ngem dida nangnamnama a mapatganda. Insalaysay ni Brian: “Nasorpresakami idi imbaga ti dean a nabasanan dagiti libro nga imbatimi ken imbagana pay a nagmamayat dagita. Kinunana a dagita ti talaga a kasapulan dagiti estudiante.” Naikkanda met laeng iti permiso!

Kinuna pay ni Brian: “Imbaga pay ti opisial a nakasaritami idi a mabalinda nga itulod dagiti estudiante nga aggigian iti dormitorio iti aniaman a simbaan a kayatda a papanan iti kada Domingo. ‘No kayatda ti mapan iti simbaanyo, itulodmi ida,’ kinunana. Nasorpresakami ken Roxanne ta saanda la a pinatgan ti kiddawmi, imbagada pay a mabalinda nga itulod dagiti estudiante iti Kingdom Hall!”

Iti umuna nga aldaw a panangiplastar da Brian ken Roxanne iti cart iti eskuelaan, nakaipaimada iti 65 a libro, 8 a magasin, ken 11 a broshur. Adu met nga interesado nga estudiante ti nakasaritada. Imbaga ti dean ken ti opisial nga agsublidanto manen.

Nabuya Dagiti Aggatgatang Dagiti Video-tayo

Agaw-awiden iti Bethel idiay Solomon Islands ti Bethelite a ni Lipson kalpasan ti panangasabana iti maysa a bigat. Bayat a magmagna, adda nangngegna a kanta ti Pagarian manipud iti maysa a paglakuan. Nagusioso, isu a napanna kinita. Nasdaaw idi nakitana dagiti ubbing ken nataengan a mangbuybuya iti video ti kanta numero 55, a natemaan iti “Biag nga Awan Inggana​—Kamaudiananna!,” iti serye nga Agbalinka a Gayyem ni Jehova. Idi nalpasen, imbaga ti makinkukua iti paglakuan, “Adda pay video a kayatko nga ipabuya.” Impabuyana ti video a Dakes ti Agtakaw. Kalpasan a naipabuyana, imbagana a dida agtaktakaw iti paglakuanna.

Gapu ta adu ti simrek iti paglakuan idi madama a maipabpabuya ti video, imbaga ti makinkukua, “Kayatko a mangngegyo ti paboritok a kanta.” Sa impabuyana manen ti kanta numero 55. Kalpasanna, impabuyana dagiti video nga Apay nga Adalem ti Biblia? ken Kasano ti Panagadal iti Biblia? iti lengguahe a Solomon Islands Pidgin.

Manmano a taga-Solomon Islands ti makausar iti internet gapu ta nangina ken narigat ti maaddaan iti koneksion. Ngem daytoy a makinkukua iti paglakuan, a saan a Saksi ni Jehova, ket tumultulong a mangimula kadagiti bukel ti kinapudno babaen ti panangipabuyana kadagiti video-tayo kadagiti mapmapan iti paglakuanna.

Nabirokanna ti Nagan ti Dios iti Libro

Kada Lunes a mangaskasaba ti maysa a pagassawaan babaen iti cart idiay Nouméa, a kabesera ti New Caledonia. Maysa nga aldaw, adda mababain a babai nga immasideg iti cart sa nangala lattan iti libro nga Ania a Talaga ti Isursuro ti Biblia? a saan a nagun-uni. Kalpasan ti 30 a minuto, nagsubli nga iggemna ti libro. Imbagana, “Nakitayo kadi daytoyen?” Inukradna ti libro sana intudo ti nagan ni Jehova. “Daytoy ti nagan ti Dios!” kinunana. “Adun a lawas a mapmapanak iti libraria tapno ag-research ta kayatko a maammuan ti kinapudno maipapan iti Dios. Ngem nangalaak tattay iti libroyo sa napanak iti luganko ket idi inukradko, ti umuna a nakitak ket ti nagan ti Dios a Jehova. Isu a nagsubliak tapno agyaman.” Nagmayat ti pannakisarita ti agassawa iti babai ket impakitada ti topiko a “Nagan ti Dios​—Pannakausar ken Kaipapananna” iti apendise ti libro nga Isursuro ti Biblia. Imbaga ti babai a kayatna latta nga ituloy ti ag-research iti libraria, ngem no adda pay ti saludsodna maipapan iti Biblia, ammonan ti papananna!