Nangrugi Laeng iti Maysa a Panagadal iti Biblia

Ni Marta, a Saksi ni Jehova idiay Guatemala, ket agsursuro iti lengguahe a Kekchi tapno maipakaammona ti mensahe ti Biblia kadagiti agsasao iti kasta a lengguahe. Maysa nga aldaw, nakakita iti lalaki a rimmuar iti ospital. Gapu iti itsura ti lalaki, impapan ni Marta a naggapu ti lalaki iti maysa a barrio dagiti Kekchi iti kabambantayan a manmano a makasabaan dagiti Saksi ni Jehova. Inasitganna ket kinasaritana iti Kekchi uray bassit laeng ti ammona iti dayta a lengguahe.

Inawis ni Marta ti lalaki nga agadal iti Biblia. Siraragsak nga inawatna ngem imbagana ken Marta nga awan pagbayadna. Inlawlawag ni Marta a libre ti panangyadal iti Biblia dagiti Saksi ni Jehova. Imbagana pay a mabalinda ti agadal babaen ti selpon tapno mairaman met ti intero a pamilia ti lalaki. Immanamong ti lalaki, ket gapu ta makasao ken makabasa met iti Spanish, inikkan ni Marta iti Spanish a Baro a Lubong a Patarus ti Nasantuan a Kasuratan. Inikkanna pay iti libro a katulongan iti panagadal iti Biblia, ti Ania a Talaga ti Isursuro ti Biblia? iti lengguahe a Kekchi. Iti simmaruno a lawas, ti lalaki, ti asawana, ken ti dua nga annakda ket nagpayadal iti Biblia ken Marta babaen ti selpon. Mamindua nga agadalda kada lawas. Kuna ni Marta, “Gapu ta saanak a nalaing iti Kekchi ken maawatan met dagiti annakna ti Spanish, dayta ti inusarmi nga agadal. Ipatarus ti lalaki ti panagadalmi para ken baketna.”

Pastor dayta a lalaki iti relihionna. Rinugianna nga isuro kadagiti miembro ti relihionna dagiti nasursurona iti panagadalna iti Biblia. Nagustuanda ti isursurona ket dinamagda no nakaammuanna kadagita a baro a naadalna. Idi imbagana nga agpapayadal iti Biblia, nakiramanda metten iti panagadal. Di nagbayag, agarup 15 a tattaon ti linawas nga aguummong tapno agpayadal ken Marta babaen ti selpon. Idi agangay, nangikabilda iti mikropono iti asideg ti selpon tapno mangngeg ti amin.

Imbaga ni Marta kadagiti panglakayen iti kongregasionda ti maipapan iti dayta a panagadal iti Biblia. Napan ti maysa a panglakayen iti lugar nga ayan dagiti mayad-adalan. Inawisna ida nga umatender iti palawag publiko ti manangaywan iti sirkitoa iti sabali a lugar a maysa nga oras a tarayen ti lugan ken dua nga oras a pagnaen. Pinatganda ti awis ket 17 kadakuada ti immatender.

Sumagmamano a lawas kalpasanna, uppat nga aldaw a nagyan ti manangaywan iti sirkito ken ti dadduma a Saksi iti lugar dagiti mayad-adalan iti Biblia. Kada bigat, agbuyada kadagiti video a naibatay iti Biblia iti lengguahe a Kekchi iti jw.org, ken adalenda ti broshur a Siasino Ita Dagiti Mangar-aramid iti Pagayatan ni Jehova? Kada malem, agbuyada kadagiti video iti JW Broadcasting. Inyurnos met ti manangaywan iti sirkito nga adda maysa a mangyadal iti tunggal maysa kadakuada.

Bayat ti uppat nga aldaw, nangasaba met dagiti Saksi kadagiti asideg a barrio dagiti Kekchi ken inawisda dagiti lumugar para iti espesial a miting. Iti dayta a miting, inawis dagiti kakabsat nga agpayadal iti Biblia ti 47 nga immatender. Inawat ti 11 a pamilia dayta nga awis.

Sumagmamano a bulan kalpasanna, inyurnos dagiti panglakayen a kada ngudo ti lawas, adda maaramid a gimong iti immuna a barrio. Ita, agarup 40 ti regularen a makigimgimong. Idi linaglagip sadiay dagiti kakabsat ti ipapatay ni Jesus, naragsakanda ta 91 ti immatender.

Idi linagip ni Marta no kasano a nangrugi ti kapadasanna ken ti nagsayaat a resulta dayta, kinunana: “Agyamanak unay ken Jehova. No dadduma, mariknak a nagbassit ti maar-aramidak. Ngem instrumentonatayo ti Dios. Ammona ti linaon ti puso dagita a tattao, ket inyasidegna ida kenkuana. Ay-ayaten ida ni Jehova.”