Mensahe Manipud iti Sao ti Dios—Namnama Para Kadagiti Refugee!

Tinawen a minilion a tattao ti mapilpilitan a mangpanaw kadagiti pagtaenganda. Mapadpadasam kadi daytoy a narigat a situasion? No wen, saanka nga agmaymaysa ta adda ti tumulong kenka. Ipampanamnama ti Dios nga addanto nasaysayaat a biag. Maammuam dayta iti Nasantuan a Kasuratan.

“Dagiti refugee ken dagiti tattao a napilitan a mangpanaw kadagiti lugardaa ket saan laeng nga agkasapulan iti praktikal a tulong. Kasapulanda met ti . . . namnama iti masanguanan,” kuna ni Christos Stylianides, a komisioner ti European Union.b Dagiti tattao nga addaan namnama ket positibo ti panangmatmatda iti masanguanan. Ngem malaksid iti namnama, kasapulan met dagiti refugee ti maliwliwa tapno mailiwliwagda ti nasaem a kapadasanda.

“Nakasaksakit ti riknak idi masapul a panawak ti pagilianmi ken ti pamiliak. Permi idi ti buteng, liday, ken danagko.”—Emmanuel, Haiti.

Nariknam met kadi ti narikna ni Emmanuel? No napilitanka a pimmanaw iti lugaryo, kasapulam ti liwliwa ken namnama. Kasano a maipaay kenka dayta ti Sao ti Dios, ti Biblia?

Liwliwa manipud iti Sao ti Dios

Kuna ti Biblia: “Ni Jehovac . . . ay-ayatenna dagiti ganggannaet a residente.”—Deuteronomio 10:17, 18.

Kuna ti Biblia: “Asideg ni Jehova iti amin nga umaw-awag kenkuana.”—Salmo 145:18.

Kuna ti Biblia: “Imposible nga agaramid ti pudno a Dios iti dakes . . . Saan a killuen ti Mannakabalin-amin ti hustisia.”—Job 34:10, 12.

Kayat a sawen daytoy a saan a ti Dios ti makagapu nga agsagsagabaka. Ti narigat a situasionmo ket saan a pannusa wenno pannubok ti Dios.

Namnama manipud iti Sao ti Dios

Ilawlawag ti Biblia no anianto ti aramiden ti Dios para kadatayo iti masanguanan. Ammuem no kasano a nakatulong daytoy a namnama kadagiti napilitan a mangpanaw kadagiti lugarda.

Kuna ti Biblia: “[Punasento ti Dios] ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot.”—Apocalipsis 21:4.

Kayat a sawen daytoy nga agpatingganto ti panagsagabatayo. Ikarkari ti Dios nga ikkatennanto ti amin a problema a mangparparigat kadatayo ita.

“Asidegen nga ikkaten ti Dios ti kinadakes ken kinaawan hustisia a mapaspasamak ita. Makatulong kaniak daytoy a namnama tapno kanayon a sipapanunotak iti aldaw inton awanen ti amin a kita ti panagsagaba.”—Karla, El Salvador.

Kuna ti Biblia: “Saanton a malagip dagiti immun-una a banag, ken saanton nga agtalinaed dagita iti puso.”—Isaias 65:17.

Kayat a sawen dayta a malipatantayton ti amin a nasaem a kapadasantayo. Ipaspasigurado ti Dios a saanmonton a malagip dagiti saan a nasayaat a napadasam a mangburburibor kenka.

“Ikarkari ti Biblia a saantayton a malagip ti saem ken rigat a napadasantayo. Daytoy a namnama ti tumultulong kaniak a mangibtur iti narigat a situasionko ta ammok nga asidegen nga agpatingga daytoy.”—Natalia, Ukraine.

Kuna ti Biblia: “Mangipasdekto ti Dios ti langit iti maysa a pagarian . . . Rumeken ken pagpatinggaennanto amin dagitoy a pagarian.”—Daniel 2:44.

Kayat a sawen daytoy nga addanto perpekto a pagarian idiay langit a mangituray iti daga. Asidegen a sukatan ti gobierno wenno Pagarian ti Dios idiay langit ti amin a gobierno ti tao. Daytoy a gobierno ti mangyeg iti pudpudno a talna ken talged. Addanton ti hustisia ken awanton ti agrigrigat.—Mikias 4:3, 4.

“Ammok a temporario laeng dagiti problema a kas iti panangidadanes, diskriminasion, panagsuspetsa, ken panangidumduma iti puli. Asidegen nga ikkaten amin dagita ti Pagarian ni Jehova. Dayta ti mangpabpabileg kaniak.”—Mustafa, Middle East.

Sirib Manipud iti Sao ti Dios

Makatulong ti praktikal a sirib manipud iti Biblia tapno in-inut a maawatmo ti napasamak kenka. Matulongannaka pay a mangakseptar iti nagbaliwen a kasasaadmo, a pakairamanan ti pannakapukaw dagiti material a sanikuam. Kitaem no kasano a nakatulong dagitoy a prinsipio kadagiti refugee:

Kuna ti Biblia: “Uray no kasano kabaknang ti maysa a tao, ti biagna ket saan nga agdepende kadagiti adda kenkuana.”—Lucas 12:15.

No kasano a makatulong kenka dagitoy a nainsiriban a sasao: Mabalin a nakigtotka iti napasamak ken maladingitanka unay ta adda dagiti masapul a panawam. Ngem no laglagipem a napatpateg ti biagmo, mabalin a makissayan ti ladingitmo.

“Napatpateg ti biag ngem iti material a sanikua. Adda dagiti situasion a saannaka a matulongan dagiti sanikuam wenno kuartam.”—Natalia, Ukraine.

Kuna ti Biblia: “Dimo ibaga: ‘Apay a nasaysayaat dagiti immuna nga aldaw ngem ita?’”—Eclesiastes 7:10.

No kasano a makatulong kenka dagitoy a nainsiriban a sasao: Mabalin a nakarigrigat ti agdama a situasionmo. Ngem no ikagumaam a saan nga ikompara dayta iti dati a situasionmo, saan unay a nasakit ti riknam.

“Naragragsakak itan ta naakseptarkon ti baro a situasionko.”—Eli, Rwanda.

Kuna ti Biblia: “Kontentotayo koman no adda taraon ken badotayo.”—1 Timoteo 6:8.

No kasano a makatulong kenka dagitoy a nainsiriban a sasao: Ikagumaam ti makontento kadagiti kasapulam iti biag. No kontentoka, mabalin a saanka unay a ma-stress isu a saanka unay a madanagan.

“Tultulongannak ti Biblia a saan nga agpokus kadagiti bambanag a napukawmi ken baketko. Maragsakankami ta sibibiag ken natalgedkami.”—Ivan, Ukraine.

Kuna ti Biblia: “Aramidenyo ngarud kadagiti tattao ti amin a kayatyo nga aramidenda kadakayo.”—Mateo 7:12.

No kasano a makatulong kenka dagitoy a nainsiriban a sasao: Mabalin a nalaklakam a makatunosan ti sabsabali no ikagumaam ti agbalin a naanus ken naasi. No aramidem dayta, nalaklakadaka nga akseptaren dagiti tattao ken saanka nga agbalin a biktima ti diskriminasion.

“Magustuan dagiti tattao no maipakitaanda iti respeto, kinaimbag, ken ayat. Makatulong daytoy tapno nasayaat ti relasionmo kadagiti umili iti immakaram a lugar.”—Angelo, Sri Lanka.

Kuna ti Biblia: “Ipakaammoyo koma iti Dios ti amin a kiddawyo . . . ket ti talna ti Dios . . . salaknibannanto ti puso ken isipyo.”—Filipos 4:6, 7.

No kasano a makatulong kenka dagitoy a nainsiriban a sasao: Ikararagmo iti Dios ti amin a marikriknam, kasapulam, pagbutbutngam, ken pagdandanagam. Makatulong dayta tapno saanka unay nga agdanag ken maka-adjust-ka iti baro a situasionmo.

“Agkarkararagak iti Dios no adda problemak, ket sungsungbatannak. Dagiti nasursurok iti Biblia ti mangmangted kaniak iti pudpudno a talna ti panunot.”—Yol, South Sudan.

“Gapu iti nagsayaat a balakad ti Biblia, naaddaanak iti talna ti panunot. Nakatulong daytoy tapno maibturak ti narigat a situasionko.”—Valentina, Ukraine.

“Talaga a napabilegak idi naammuak nga adda ikarkari ni Jehova a Dios a nasaysayaat a biag.”—Emmanuel, Haiti

Kayatmo kadi a maammuan ti ad-adu pay maipapan iti liwliwa ken namnama nga ikarkari ti Dios? Apay a mapagtalkam dagita? Kiddawem a bisitaendaka dagiti Saksi ni Jehova. Maragsakanda a tumulong kenka ken awan ti bayadam.