Gapu iti Bileg ti Dios, Saankami nga Agsanud

Adda met ketdi rason dagiti kakabsat nga agduadua a saanak a makapagbayag nga agpayunir. Saanak idi a naespirituan a tao. Manmanoak idi a rummuar a mangasaba sa ikarkararagko nga agtudo koma no Domingo tapno diak mapilitan a mangasaba. No rummuarak, mangipaimaak laeng kadagiti magasin; saanak man la nga aglukat iti Biblia. Tangtangdanannak ti patpatgek nga ina nga agbasa iti Biblia iti kongregasion. Nasadutak nga agadal, ken awan dagiti naespirituan a kalatko.

Iti dayta a summer, adda district assembly (maaw-awagan itan iti rehional a kombension) idiay Cardiff, Wales. Dita a naan-anay a nagbalbaliw ti biagko. Indamag ti maysa a nagpalawag ti sumagmamano a mamagpanunot a saludsod. Kasla kastoy dagiti saludsodna: “Nagdedikar ken nagbautisarka kadin?” ‘Wen,’ kunak iti pampanunotko. “Inkarim kadi nga agserbika ken Jehova iti amin a puso, kararua, panunot, ken pigsam?” ‘Wen.’ “Adda kadi aniaman a sakitmo wenno responsabilidadmo iti pamilia a manglapped kenka nga agpayunir?” ‘Awan.’ “Adda kadi aniaman a rason a dika makapagpayunir?” ‘Awan.’ “No ti sungbatmo iti maudi a saludsod ket awan, apay ngarud a saanka a payunir?”

Kasla nalawagan ti nasipnget a panunotko. Napanunotko: ‘Saysayangek ti biagko. Saanko a tungtungpalen ti inkarik idi nagdedikarak. Saanak nga agserserbi ken Jehova iti amin a kararuak.’ Nabigbigko a no kayatko a tungpalen ni Jehova dagiti karina kaniak, masapul met a tungpalek dagiti karik kenkuana. Isu nga idi Oktubre 1956, inrugik ti ag-vacation pioneer. Maawagan dayta ita iti auxiliary pioneer.

Iti simmaruno a tawen, nagbalinak a regular pioneer ken immakarak iti maysa a kongregasion a 19 ti agibumbunannagna. Manipud idi simmangpetak sadiay, linawas a naikkanak iti paset nga agpalawag. Iti tulong dagiti naanus a kakabsat, napasayaatko ti linaon dagiti palawagko ken ti pamay-an a panangiparangko kadagita. Dua a tawen kalpasanna, idi 1959, naapointaranak kas special pioneer ken naibaonak idiay Aberdeen, iti adayo nga amianan a paset ti Scotland. Kalpasan ti sumagmamano a bulan, naawisak nga agserbi idiay London Bethel. Pribilehiok ti agtrabaho iti printery iti pito a tawen a kaaddak sadiay.

Magusgustuak ti biag iti Bethel ngem nariknak idi a kayatko ti agserbi iti ruar iti espesial a serbisio. Ubingak pay, nasalun-at, ken situtulok nga agpausar ken Jehova iti sadinoman. Isu nga idi Abril 1965, nagaplayak nga ageskuela iti Gilead School para iti panagserbi kas misionero.

Iti dayta a tawen, nagtulagkami iti roommate-ko a mapankami idiay Berlin, Germany, tapno umatender iti maysa a kombension ken makita ti Berlin Wall a sumagmamano pay laeng a tawen idi a naibangon.

Maysa nga aldaw bayat ti kombension, naaddaankami iti gundaway a makipaset iti ministerio, ket naited a kaduak ni Susanne Bandrock. Nagkasarkami idi 1966, ket dua a tawen kalpasanna, naimbitarankami nga umatender iti maika-47 a klase ti Gilead. Talaga a bendision dayta! Di nagbayag, nalpasen ti lima a bulan a panageskuelami. Ti asaynmentmi ket idiay Zaire, a maaw-awagan itan iti Democratic Republic of the Congo. Nakigtotkami! Bassit ti ammomi maipapan iti daytoy a pagilian. Medio nagduaduakami, ngem inawatmi ti asaynment ket intalekmi ti biagmi ken Jehova.

Kalpasan ti adu nga oras iti nadumaduma nga airport ken eroplano, nakadanonkami iti bassit a pagminasan nga ili ti Kolwezi. Nasdaawkami no apay nga awan dagiti kakabsat a mangsabat kadakami. Naammuanmi idi agangay nga immun-unakami iti dua nga aldaw ngem ti telegrama a mangibagbaga kadagiti kakabsat a sumangpetkami. Maysa nga opisial ti airport ti immasideg kadakami ket adda imbagana kadakami iti French, maysa a lengguahe a saanmi pay idi a maawatan. Timmaliaw kadakami ti babai nga adda iti sangomi sa impatarusna ti imbaga ti opisial, “Arestadokayo.”

Imbilin ti opisial a nangaresto kadakami nga aglugankami iti daan nga sports car a makinlikud ti makinana ken dua laeng ti tugawna. Naglilinnetletkami iti kotse—ti opisial, ti makinkukua iti kotse, sa dakami ken Susanne. Kasla addakami iti maysa nga eksena ti makapakatawa a pelikula bayat a maitaltataltagkami iti lasonglasong a kalsada, ken ti aglukatlukat a hood ti lugan ket kasla iti ngiwat ti ikan a mangkakaan kadagiti bagahemi.

Impandakami iti missionary home. Nupay saanmi nga ammo no sadino dayta, ammo dayta ti opisial. Awan idi ti tao, ken nakakandado dagiti ruangan. Napan amin naki-international convention ken nagbakasion dagiti misionero. Bayat a nakatakderkami iti kapudotan, pampanunotenmi no ania ngata ti sumaruno a mapasamak. Idi kuan, adda simmangpet a kabsat. Idi nakitanakami, permi ti isemna, isu a nabang-arankami. Am-ammona ti opisial, a nangnamnama gayam a mangtedkami iti pasuksok. Nakisarita biit iti opisial, kalpasanna, pimmanawen ti opisial ket simrekkamin iti missionary home.

Saan a Tiempo ti Panagsanud

Nabigbigmi idi agangay a nalikmutkami kadagiti naragsak ken naayat a tattao nga adun ti inibturanda. Ngem makapaladingit ta napno ti pagilian iti kinaranggas gapu iti riribuk ken panagrebelde iti napalabas a sangapulo a tawen. Kalpasanna, idi 1971, napukaw dagiti Saksi ni Jehova ti legal a kalinteganda nga agdaydayaw a dati a tinagiragsakda. Pinampanunotmi no kasanomi a sanguen dayta a situasion.

Ngem saan a tiempo dayta tapno agsanudkami gapu iti buteng. Manmano laeng a kakabsat ti timmulok uray nakaro ti pannakapilitda a mangikompromiso iti Nakristianuan a neutralidadda babaen ti panangala iti political party card ken panangisuot iti party pin. No saanda nga isuot dayta a pin, saanda a mabenepisiaran kadagiti serbisio ti lokal a gobierno ken ranggasan ida dagiti militar ken polis. Napukaw dagiti kakabsat ti trabahoda, ken naikkat dagiti annakda iti eskuelaan. Ginasgasut a kakabsat ti naibalud. Nagrigat daydi a tiempo. Nupay kasta, situtured nga intultuloy dagiti Saksi nga ipakaammo ti naimbag a damag.

Kasapulanmi ti Agibtur

Kadagidiay a tawtawen, adu a tiempo ti inusarmi ken Susanne nga agbiahe kadagiti adayo a lugar para iti panagserbi iti sirkito ken distrito. Ti biag kadagiti babassit a komunidad ket naidumduma ken no maminsan, narigat. Dandani awan pagiddaanmi kadagiti babassit a kalapaw. Diak mabilang no namin-ano a naitim-ogak kadagiti nababa a ridaw. Nagsakdokami iti pagdigusmi kadagiti waig ken karayan. Iti rabii, agusarkami iti kandela iti panagbasami. Uging ti paglutomi. Ngem imbilangmi amin dagitoy kas pudpudno a biag ti misionero. Isu dayta ti nakaibaonanmi—ket nariknami a kaslakami kadagiti soldado nga adda iti sanguanan ti naespirituan a paggugubatan.

Dagiti Saksi a pamilia sadiay ti nangisuro kadakami a mangipateg iti bambanag a mabalin a nalaka a matagilag-an: ti taraon, danum, bado, ken pagtaengan. (1 Timoteo 6:8) Amin a dadduma a banag ket bonus. Malaglagipmi pay agingga ita dayta a simple a kinapudno.

Nupay saankami a naipasango kadagiti pakasuotan a nakaipasanguan ni apostol Pablo, adda dagiti panagbiahemi a nariknami a masubsubok ti pammati ken motibomi. Kasapulanmi ti agbiahe kadagiti kalsada a saan a nasayaat ti kasasaadda wenno kasla desdes laeng. Permi ti pannakayegyegmi kadagiti nabato a kalsada. No dadduma, mailumlom ti luganmi iti nauneg a kadaratan. Bayat ti panagtutudo, mailumlomkami iti nauneg a kapitakan, a kasla glue ti kapigketna. Iti maysa nga agmalmalem a panagbiahemi, 70 a kilometro (43 mi) laeng ti nataraymi ta namin-12 a daras a kasapulan nga iyaonmi ti luganmi.

Ngem nariknami a simmingedkami ken Jehova idi agserserbikami kadagiti narigat a kasasaad iti away. Nasursuromi nga iti tulong ni Jehova, siraragsak a makapagibturkami, uray no saanmi a kabaelan a baliwan ti maysa a narigat a situasion. Nupay saan unay a magustuan ni Susanne ti agpasiar ken mangpadas iti baro a bambanag, di pulos nagreklamo iti amin a pannubok ken rigat a napasaranmi. Malaglagipmi dagidiay a tiempo kas naragsak, makagunggona, ken makaisuro.

Bayat dagiti tawen a kaaddami idiay Zaire, namin-adu a naarestoak. Naminsan a napabasolak nga illegal nga aggatgatang ken aglaklako kano iti diamante. Natural laeng a mariknami ti panagdanag, ngem ibagbagami iti bagimi a no kayat ni Jehova a maitungpalmi ti ministerio a naited kadakami, sigurado a tulongannakami. Ket kasta ti inaramidna!

Panagtultuloy nga Agserbi

Idi 1981, naawiskami nga agserbi iti sanga nga opisina iti Kinshasa. Makatawen idin a legal a binigbig ti gobierno ti trabahotayo. Nakagatang dagiti kakabsat iti lote a pakaipatakderan ti dakdakkel a pasilidad ti sangay. Kalpasanna, idi Marso 1986, di ninamnama a pinirmaan ti presidente ti pagilian ti bilin a mangiparit iti trabaho dagiti Saksi ni Jehova. Naisardeng ti panagibangon, ket di nagbayag, pimmanaw ti kaaduan a misionero manipud iti pagilian.

Nakapagtalinaedkami sadiay iti sumagmamano pay a tiempo. Inkagumaanmi ti agtultuloy a mangasaba, uray ammomi a kanayon a sipsiputandakami dagiti opisial. Uray naannadkami, naarestoak latta bayat a mangyad-adalak iti Biblia. Naipanak iti kasla bartolina a kuarto a napno kadagiti balud. Napudot, nabangsit, nasipnget, ken nakail-ilet dayta. Ti kakaisuna a paggapuan ti lawag ken angin ket ti maysa a bassit nga abut iti ngato ti maysa a diding. Ginammatandak ti dadduma a balud sa impandak iti bigbigenda a boss. “Kantaem ti national anthem-mi!” imbagana. “Diak ammo,” insungbatko. “Kantaem ngarud ti national anthem-yo!” kunada. “Diak ammo uray dayta,” imbagak. Pinagtakder nga impasangonak iti diding iti agarup 45 a minuto. Idi kuan, nakisarita dagiti kakabsat tapno mawayawayaanak.

Makitkitami idi a saanen a sumayaat ti kasasaad iti dayta a pagilian, ket di nagbayag kalpasanna, naibaonkami idiay Zambia. Bayat a lumablabaskami iti border ti Zaire, naglaok a ladingit ken bang-ar ti nariknami. Pinampanunotmi ti 18 a tawen a binusbosmi iti asaynmentmi a kadua dagiti matalek a misionero ken dagiti lumugar a kakabsat. Nupay makapa-stress no dadduma ti biag sadiay, nariknami ti pamendision ni Jehova. Ammomi a tultulongannakami ni Jehova iti amin nga aramidenmi. Nasursuromi ti Swahili ken French, ket ammo met bassit ni Susanne ti agsao iti Lingala. Naballigi ti ministeriomi, ket natulonganmi ti nasurok a 130 nga indibidual nga agpabautisar. Nakaragragsakkami met ta ammomi a timmulongkami iti pannakaibangon ti pundasion para iti masanguanan nga irarang-ay. Ket nakaad-adu ti immawat iti kinapudno idi agangay! Idi 1993, kinanselar ti Korte Suprema ti desisionna idi 1986 a panangiparit iti trabahotayo. Adda itan nasurok a 240,000 nga agibumbunannag iti Pagarian idiay Congo.

Bayat nga addakami idiay Zambia, nakitami ti pannakaibangon ti baro a sangay sa ti pannakapalawa dagiti pasilidad idi agangay. Nasurok a mamitlo itan ti kaadu dagiti aktibo nga agibumbunannag ngem idi simmangpetkami idi 1987.

Isu a komusta itan daydi agtutubo a brother a kasla di makabayag iti makabulan iti amin-tiempo a serbisio? Iti pamendision ni Jehova ken iti suporta ti dungdungnguek nga asawa a ni Susanne, 65 a tawenen ti naragsak nga amin-tiempo a panagserbik. Nananam ken nakitak a ni Jehova ket naimbag!—Salmo 34:8.

Ammomi a saankami nga espesial; inkagumaanmi laeng nga aramiden ti kasayaatanmi a mangtungpal a simamatalek iti karimi idi nagdedikarkami. Agtalekkami nga itultuloy ni Jehova ti tumulong kadakami a saan a pulos “agsanud” no di ket bumileg ti pammatimi ‘tapno mataginayon ti biagmi.’—Hebreo 10:39.

Buyaen ti video a Dayrell and Susanne Sharp: We Promised to Serve Jehovah Whole-Souled.