Nakabalud Gapu iti Pammatida—Singapore
Walo nga agtutubo a lallaki a Saksi ni Jehova ti nakabalud idiay Singapore gapu ta saan nga ipalubos ti konsiensiada ti agsoldado. Lima kadakuada ti maikaduan a maibalud gapu ta dida kayat a baliwan ti takderda kalpasan a naikaroda ti umuna a sentensiada. Awan ti manamnamada a tulong iti linteg ti Singapore gapu ta ipapaannurot ti gobierno ti inkapilitan a panagsoldado ken saanna a bigbigen ti kalintegan nga agkedked nga agsoldado gapu iti konsiensia.
No agtawenen iti 18 ti maysa nga agtutubo a lalaki, masapul nga agserbi iti militar ti Singapore. No agkedked gapu iti konsiensiana, maibalud iti agingga iti 12 a bulan iti kampo dagiti militar. No naikaronan ti sentensiana, mawayawayaan sa dagus a mabilin nga agisuot iti uniporme ti soldado ken makipaset iti training ti militar. No agkedked manen, bistaen manen ti korte ti militar sa masentensiaan a maibalud iti agingga iti 18 a bulan. Gapuna, dagiti agtutubo a lallaki a Saksi a saan nga ipalubos ti konsiensiada ti agsoldado ket mamindua nga agsaruno a maibalud. Agdagup dayta iti agingga iti 30 a bulan.
Dagiti Bilin ti UN—Saan a Kayat a Suroten ti Singapore
Nabayagen a kidkiddawen ti United Nations kadagiti miembrona a gobierno a “bigbigenda a ti panagkedked nga agsoldado gapu iti konsiensia ket masapul a maibilang a lehitimo a panangannurot iti kalintegan ti wayawaya ti panagpanunot, konsiensia ken relihion a bigbigbigen ti Universal Declaration of Human Rights.” Nupay ti Singapore ket miembron manipud pay idi 1965, kinontrana ti United Nations iti daytoy nga isyu. Iti surat a napetsaan iti Abril 24, 2002 a naiturong iti UN Commission on Human Rights, imbaga ti maysa nga opisial ti gobierno ti Singapore a “no maikontra dagiti patpatien wenno aramid ti maysa [iti kalintegan a mangidepensa iti pagilian], masapul a masurot ti kalintegan ti gobierno a taginayonen ti seguridad ti pagilian.” Situtured nga insurat ti opisial, “Saanmi a bigbigen nga agaplikar iti amin a pagilian ti panagkedked nga agsoldado gapu iti konsiensia.”
Time Line
Hunio 17, 2025
Nakabalud ti walo a Saksi ni Jehova gapu ta saan nga ipalubos ti konsiensiada ti agsoldado.
Abril 24, 2002
Kinompirma ti maysa nga opisial ti gobierno a saan a bigbigen ti Singapore ti kalintegan a panagkedked nga agsoldado gapu iti konsiensia.
Pebrero 1995
Kimmaro ti kinainget ken immadu dagiti naaresto a Saksi ni Jehova nga umili ti Singapore.
Agosto 8, 1994
Imbasura ti Nangato a Korte ti Singapore ti apela dagiti Saksi.
Enero 12, 1972
Winaswas ti gobierno ti Singapore ti pannakairehistro dagiti Saksi ni Jehova.