Nakabalud Gapu iti Pammatida—Ukraine
Iti uneg ti agarup 30 a tawen, nabenepisiaran dagiti Saksi ni Jehova iti Ukraine iti linteg a mangipalubos iti alternatibo a panagserbi para kadagiti saan a mayat nga agsoldado gapu iti konsiensiada. Gapu iti dayta, nawayada a makiraman kadagiti agduduma nga aktibidad a makatulong iti adu a tattao ken matagtaginayonda a nadalus ti konsiensiada.
Ngem idi nangrugi ti gubat iti Ukraine idi Pebrero 24, 2022, saan a naprotektaran ti kalintegan dagiti sibilian a mangaramid iti alternatibo a panagserbi. Kas resultana, nakasuan ti adu a saan a mayat nga agsoldado gapu iti konsiensiada. Saan a binigbig ti Ukraine dayta a nabayagen a kalintegan dagiti umilina ken ti kalinteganda a mangsurot iti konsiensiada. Saan a maitunos dayta kadagiti prinsipio ti human rights ken iti Konstitusion ti Ukraine. Kastoy ti adda iti dayta a Konstitusion: “No saan a kayat ti maysa ti agsoldado gapu ta maikontra dayta iti narelihiosuan a patpatienna, masapul a mapalubosan a mangaramid iti alternatibo a serbisio (awan ti koneksionna iti militar).”
Manipud idi Hunio 17, 2025, lima a lallaki a Saksi ti nakabalud gapu ta saanda a kayat ti agsoldado. Ikarkarodan ti sentensiada a pannakaibalud iti 36 a bulan. Adda pay tallo a lallaki a Saksi a nakabalud bayat nga ur-urayenda ti sentensiada.”
Pannakaseknan Dagiti Internasional nga Organisasion
Gapu kadagitoy a pasamak, nagkomento ti tallo a UN Special Rapporteurs maipapan iti kaawan ti alternatibo a serbisio para kadagiti sibilian iti Ukraine. Iti pannakisaritada iti gobierno ti Ukraine, idi Nobiembre 8, 2023, imbagada: “Maseknankami iti pannakaidarum dagiti saan a mayat nga agsoldado gapu iti konsiensiada, agraman dagiti mangitantandudo iti kalintegan dagiti saan a mayat nga agsoldado gapu iti konsiensia.”
Time Line
Hunio 17, 2025
Walo a Saksi ti nakabalud.
Pebrero 24, 2022
Nangrugi ti martial law, ken nagsaganan dagiti militar a makigubat.
Hunio 23, 2015
Pinatalgedan ti Nangato a Korte ti Ukraine ti kalintegan ni Vitaliy Shalaiko nga agkedked nga agsoldado gapu iti konsiensiana bayat ti panagsagana ti militar a makigubat.
Disiembre 1991
Naipatungpal ti linteg maipapan iti Alternatibo a Serbisio (awan ti koneksionna iti militar).
Pebrero 28, 1991
Opisial a nairehistro dagiti Saksi ni Jehova iti Ukraine.