Nakabalud Gapu iti Pammatida—South Korea
Idi Oktubre 26, 2020, inikkanen ti gobierno ti South Korea iti alternatibo a serbisio dagiti saan a mangayat nga agsoldado gapu iti konsiensiada. Ngem nakadkadlaw a nairanta dayta a mangparigat ken saan a patas gapu iti kapaut ken kinadagsenna. Dayta a tallo a tawen nga alternatibo a serbisio ket doble ti kapautna no ikompara iti panagserbi iti militar. Maikontra dayta kadagiti internasional a pagannurotan. Gapu kadagitoy a rason, dadduma a lallaki a Saksi iti South Korea ti saan a nangawat iti daytoy nga alternatibo a serbisio. Dadduma ti nagreklamo iti korte. Idi Mayo 30, 2024, maibatay iti 5-4 a desision (5 ti pabor ken 4 ti saan a pabor), imbasura ti South Korea’s Constitutional Court ti amin a reklamo a konektado iti alternatibo a serbisio. Ngem kastoy ti komento dagiti saan a pabor iti desision ti korte maipapan iti kadagsen daytoy nga alternatibo a serbisio: “Daytoy nga alternatibo a serbisio ket sabali la a kita ti pannusa a maikontra iti kalintegan dagiti saan a mangayat nga agsoldado gapu iti konsiensiada.”
Ni Woo-jin Byeon, nga agtawen iti 29 ken naasawaan, ti kaunaan a taga-South Korea a naibalud gapu ta saanna nga inawat ti alternatibo a serbisio. Dina kayat ti agsoldado gapu iti konsiensiana, ngem nariknana met a nadagsen unay ti alternatibo a serbisio nga uray la maikontran kadagiti kalinteganna nga adda iti konstitusion. Isu a kalpasan ti panangpampanunotna a naimbag, nagdesision a saanna nga awaten ti alternatibo a serbisio. Uray no imbagana a nakasagana a mangawat iti alternatibo a serbisio a saan a nairanta a mangparigat no addanto dayta, sinentensiaan latta ti korte a maibalud isuna iti maysa ket kagudua a tawen idi Hulio 24, 2024.
Iti agdama, adda 14 a lallaki a Saksi ti saan a nangawat iti alternatibo a serbisio, a pakairamanan ni Mr. Byeon. Sangapulo ket maysa kadakuada ti madama a mabisbista. Posible a maibaluddanto met depende iti resulta ti pannakabistada. Ngem kaaduanna ti nagdesision a mangawat iti alternatibo a serbisio uray no nadagsen unay dagita.
Time Line
Hulio 24, 2024
Nasentensiaan ni Woo-jin Byeon a maibalud iti maysa ket kagudua a tawen gapu ta saanna nga inawat ti alternatibo a serbisio.
Nobiembre 10, 2022
Kalpasan a napakaammuan a masapul nga agreport para iti panagserbina iti militar, nagsurat ni Woo-jin Byeon iti Military Manpower Administration nga isu ket saan nga agserbi iti militar ken saanna nga awaten ti alternatibo a serbisio gapu iti konsiensiana.
Oktubre 26, 2020
Ti gobierno ti South Korea ket nangted iti alternatibo a serbisio kadagidiay saan a mangayat nga agsoldado gapu iti konsiensiada.
Nobiembre 1, 2018
Maibatay iti 9-4 a desision (9 ti pabor ken 4 ti saan a pabor), impaulog ti Korte Suprema ti South Korea a saan a krimen ti saan a panagsoldado gapu iti konsiensia.
Hunio 28, 2018
Imbaga ti Constitutional Court ti South Korea nga adda seksion ti Military Service Act a saan a maitunos iti konstitusion, ta awan ti alternatibo a serbisio a maipaaramid kadagidiay saan a mangayat nga agsoldado gapu iti konsiensiada.
Oktubre 18, 2016
Impaulog ti Gwangju Appellate Court ti desisionna iti apelar ti tallo a saan a nagsoldado gapu iti konsiensiada. Iti kaunaan a gundaway, nagdesision ti korte a saanda a nakabasol iti krimen.
Agosto 30, 2011
Pinatalgedan manen ti Constitutional Court a maitunos iti linteg ti panangdusa kadagidiay saanda a kayat ti agsoldado gapu iti konsiensiada.
Agosto 26, 2004
Pinatalgedan ti Constitutional Court a maitunos iti konstitusion ti panangdusa kadagidiay saanda a kayat ti agsoldado gapu iti konsiensiada.
1975
Imbilin ti gobierno ti inkapilitan a panagsoldado ti amin a lallaki.
1973
Pinarigat ti gobierno dagiti naibalud a Saksi ket nagtultuloy dayta agingga iti katengngaan ti 1990’s.
1953
Imbalud ti gobierno ti kaunaan a Saksi a saan a nagsoldado gapu iti konsiensiana.