Panangipaay iti Tulong iti Laksid ti Gubat ken Damdamag ti Gubat

Kadagitoy maudi nga al-aldaw, ekspektarentayo a ‘makadamagtayo kadagiti gubat iti nadumaduma a lugar.’ (Mateo 24:6) Ngem no agproblema dagiti kakabsattayo gapu kadagitoy a pasamak, makaawatda iti kasapulanda a tulong. Nangipaay ti 2022 Update Manipud iti Bagi a Manarawidwid #3 iti makapabileg nga impormasion maipapan iti agdama a relief work iti Eastern Europe para kadagiti naapektaran iti gubat idiay Ukraine. Kasano a maipapaay dagiti kakabsat ti tulong uray no adda dagiti aglalaban iti asidegda? Ania ti epekto dagiti maipapaay a tulong kadagiti kakabsat idiay Ukraine?

Ania ti Kasapulan? Kasano a Maideliber?

Idi Pebrero 24, 2022, ti aldaw a nangrugi ti gubat idiay Ukraine, inaprobaran ti Coordinators’ Committee ti badyet tapno matulongan dagiti kakabsat idiay Ukraine. Dagus a gimmatang ti sangay ti Ukraine kadagiti kasapulan a bambanag ken inwarasda dagita babaen ti 27 a Disaster Relief Committee.

Malaksid iti tulong ti sangay ti Ukraine, dagus nga inammo ti Sangalubongan a Hedkuarter dagiti Saksi ni Jehova dagiti praktikal a tulong a mabalinda nga ipaay. Kiniddaw ti Coordinators’ ken Publishing committee ti Bagi a Manarawidwid iti Global Purchasing Department a makitinnulongda kadagiti pannakabagi dagiti sangay ti Ukraine ken Poland tapno maipaay ti tulong a kasapulan ken makaaramidda iti maitutop a plano. Tapno maaramid dagitoy, inaldaw a nagmiting dagiti kakabsat iti Purchasing, Shipping, ken Legal department iti kada sangay, maysa a miembro ti Komite ti Sangay ti Ukraine, ken dagiti miembro ti Global Purchasing Department.

“Umuna, masapul nga ammuenmi no ania ti kasapulan,” imbaga ni Jay Swinney a boluntario iti Global Purchasing Department. “Kayatmi ti mangted iti makan, personal hygiene kit (personal a gamit a pagdalus ken para iti salun-at), a nakasanayanen dagiti kakabsat. Ngem saan laeng a ti panangammo no ania ti kasapulan ti problemami. Masapul nga ammomi met no kasano a maideliber dagita a suplay idiay Ukraine iti katalgedan ken kapartakan a pamay-an bayat ti gubat.”

Idi Marso 9, 2022, naammuanmin dagiti suplay a kasapulan. Maiwaras dagiti karton a naglaon iti makan kas iti bagas, bukbukel, ken de lata a karne ken ikan, kasta met kadagiti bambanag para iti personal hygiene kas iti sabon ken tissue paper. Iti dayta a tiempo, natantia a ti uppat a lawas a suplay para iti maysa a tao ket mapan a $65 (U.S.). Gapu ta rinibu a kakabsat ti posible nga agkasapulan kadagitoy a bambanag, inaprobaran ti Coordinators’ Committee ti dakkel a badyet tapno maipaay dagitoy a kasapulan. Ngem kasano a maitulod dagiti kakabsat dagitoy nga ayuda a saan nga agpeligro ti biagda?

Idi Marso 13, dua a brother manipud Poland ti nangpadas a mangitulod iti suplay manipud sangay iti Poland agingga iti maysa a warehouse iti asideg ti Lviv, Ukraine. Al-aldaw sakbay a pumanawda, adda dagiti kakabsat manipud iti sangay ti Poland ken Ukraine a timmulong kadagitoy dua a boluntario nga agsagana para iti biaheda. Kinompleto ti sangay dagiti legal a dokumento a kasapulan tapno makalasat ti dua a brother iti border a mangipaay iti tulong, siniguradoda a ti lugan dagitoy a brother ket adda nalawag a markana a mangitulodda iti tulong. Nakitinnulong met ti sangay kadagiti kakabsat idiay Ukraine tapno maammuanda ti kapartakan a ruta kalpasan a makalasat ti dua a brother iti border. Gapu iti nasayaat a panagsagana ken pamendision ni Jehova, iti uneg ti 24 nga oras, naideliberda dagiti relief supply kadagiti Disaster Relief Committee idiay Lviv, ken sitatalged a nakasubli dagiti kakabsattayo idiay Poland.

Uray no naballigi ti umuna a panagbiaheda, nakaideliber laeng dagiti kakabsat iti kurang a maysa a metriko a tonelada (1 U.S. a tonelada) a suplay. Kasapulan pay ti agarup 200 a metriko a tonelada (220 U.S. a tonelada) a suplay! Kasano a dagus a maitulod ken maiwaras ti kasta kaadu a suplay?

“Sisasagananto Dagiti Tattaom nga Agboluntario”

Kalpasan a nairuar dagiti report iti jw.org maipapan kadagiti kakabsat a naapektaran iti gubat idiay Ukraine, adu a tattao iti intero a lubong ti mayat a tumulong. Adu a tattao kadagiti adayo a pagilian ti nagdonar iti kuarta para iti sangalubongan a trabaho dagiti Saksi ni Jehova, ta ammoda a mausar a naimbag ti pondo nga intedda. Impaay met ti dadduma nga adda iti asideg ti Ukraine ti tiempo, pigsa, ken personal a sanikuada a tumulong. Kitaentayo ti sumagmamano a pagarigan.

Idiay Poland, nagempake dagiti boluntario iti rinibu a suplay ken nagaramid met dagiti ubbing kadagiti card. “Namin-adun a nabasak ti Salmo 110:3, a mangibagbaga a ‘sisasagananto dagiti agdaydayaw ken Jehova nga agboluntario,’” kuna ni Bartosz Kościelniak, nga agtrabtrabaho iti Purchasing Department iti sangay ti Poland. “Ngem napaneknekak a mismo nga agpayso dayta idi nakitak ti amin a suporta dagiti kakabsat, ginasut a boluntario ti dagus nga immay ken nakasagana nga agtrabaho. Talaga nga agpayso ti ibagbaga daytoy a teksto.”

Imbaga ti maysa a Saksi ni Jehova a makinkukua iti maysa nga internasional a shipping company ken nangipabulod kadagiti truck ken nagdonar iti mausar a gasolina: “Para kaniak, gundawayko dayta tapno maipakitak ti ayatko kadagiti kakabsat ken ni Apo Jehova. Maragsakanak unay a tumulong.” Natantia a nasurok a 7,700 a litro (2,034 gal) ti naidonar a gasolina, ken inusar dagiti kakabsat ti tiempo ken pigsada nga agbiahe iti dandani 48,000 a kilometro (30,000 mi) tapno maideliber ti amin a suplay!

Gapu iti kinatulok ken ayat dagiti kakabsattayo, idi Marso 28—15 laeng nga aldaw kalpasan ti umuna a panangpadas nga agideliber iti ayuda—100 a metriko toneladan (110 U.S. a tonelada) a makan, personal hygiene kit, ken agas ti naideliber idiay Ukraine! Gapu ta adu ti suplay nga indonar dagiti kakabsat ken dagiti supplier, nakainuttayo iti dakkel a pondo a mausar koma a paggatang kadagiti relief supply. Nakaipatuloden dagiti Saksi ni Jehova iti nasurok a 190 a metriko tonelada (209 U.S. a tonelada) a relief supply idiay Ukraine. Kasano a nakatulong dagitoy a suplay kadagiti kakabsattayo?

“Impatulodyo met ti Ayatyo Kadakami!”

No maituloden dagiti suplay idiay Lviv, iwaras dagita dagiti Disaster Relief Committee kadagiti agkasapulan iti intero a Ukraine. Maideliber dagiti nayempake nga ayuda iti nadumaduma a siudad, dadduma kadagita ti nasurok a 1,300 a kilometro (800 mi) ti kaadayona manipud Lviv. Uray no ar-aramiden dagiti kakabsat ti amin a kabaelanda tapno maitulod a dagus dagita, saan a kas karina dayta.a

Imbaga ni Markus Reinhardt, a miembro ti Komite ti Sangay iti Ukraine: “Bayat daytoy a krisis, napaneknekan a mismo ti adu a kakabsat ti ayat ni Jehova ken dagiti pagimbagan ti panangsurot a naimbag kadagiti instruksion ti organisasionna—sakbay pay dagiti didigra. Kas pagarigan, naparegta ti amin nga adda koma umdas a suplayda a makan ken danum iti balbalayda para iti sumagmamano a lawas. Maipapan iti daytoy nga instruksion, imbaga ni Anton a maysa a panglakayen idiay Kyiv: ‘Insagananatayo ti organisasion ni Jehova kadagiti narigat a situasion, ket agyamyamantayo iti dayta. Literal a nasalbar ti biagmi gapu ta adda suplaymi a makan ken danum, kasta met nga adda radio-mi.’ Agyamantayo unay ta sinurot dagiti kakabsat daytoy nga instruksion isu a naaddaan ti sangay iti gundaway a mangorganisar iti kasapulan a saranay.”

Ania ti narikna dagiti kakabsat idi naawatda ti tulong? Kastoy ti imbaga da Mykola ken Zinaida, nga aggigian idiay Kharkiv: “Talaga a natukay ti pusomi gapu iti ayat nga impakitayo. Pagyamanan unay kadagiti makan ken agas. Talaga a makitkitami ti ima ni Jehova gapu iti daytoy nga inaramidyo.” Imbaga ni Valentyna nga aggigian met laeng iti dayta a lugar: “Manipud idi nangrugi ti gubat, nakaat-atiddog dagiti pila no kayatmo ti gumatang iti kasapulam. Ngem ammo ken nakita ni Jehova daytoy a problema. Nangapointar kadagiti kakabsat a mangiwaras kadagiti tulong iti mismo a balbalaymi, ket naawatmi dagiti eksakto a kasapulanmi! Kadagiti kastoy a narigat a kasasaad, no kasla awanen ti namnama, marikna ti maysa ti panangipateg ni Jehova ken ti organisasionna iti espesial a pamay-an. . . . Nagsayaat ti riknam no maawatmo ti naintiempuan ken kasapulam unay a tulong ken suporta.”

Imbaga da Yevhen ken Iryna, a nagkamang manipud Mariupol: “Agyamyamankami unay iti panangipateg ken suportayo iti pamiliami. Naawatmi dagita iti eksakto a tiempo. Ammoyo idi damo, pampanunotenmi a ti nagyan laeng dagitoy a kahon ket suplay, ngem idi linuktanmi dagita, nakitami nga impatulodyo met ti ayatyo kadakami!”

Sigurado a makitkitayo nga us-usaren ni Jehova ti espirituna a mangipaay iti instruksion kadagiti adipenna tapno maideliberda dagiti ayuda uray no adda “dagiti gubat iti nadumaduma a lugar.” Dakkel met ti naaramidan dagiti naayat a donasionyo para iti sangalubongan a trabaho, nga adu kadagita ti maar-aramid babaen ti donate.jw.org. Maapresiar unay ti kinaparaburyo!

Panangipaay iti Relief Supply iti Napartak ken Naannad a Pamay-an Agingga a Posible

1. 

   Pebrero 24, 2022: Inaprobaran ti Coordinators’ Committee ti badyet para iti panangsaranay iti Ukraine isu a nairugi ti sangay ti mangipaay iti tulong

2. 

   Pebrero 24–Marso 8, 2022: Gimmatang ti sangay ti Ukraine iti dadduma a suplay sa inwarasda dagita babaen kadagiti Disaster Relief Committee. Nagsagana met ti sanga nga opisina nga umawat ken mangiwaras kadagiti ayuda manipud Poland

3. 

   Marso 9, 2022: Inaprobaran ti Coordinators’ Committee ti pannakaideliber dagiti relief supply idiay Ukraine

4. 

   Marso 10–12, 2022: Naaramid dagiti plano para iti panangpadas a mangideliber iti makan ken dadduma pay a suplay idiay Lviv, Ukraine manipud Poland

5. 

   Marso 13, 2022: Umuna a panagideliber iti makan ken dadduma pay a suplay idiay Lviv, Ukraine manipud Poland

6. 

   Marso 14–16, 2022: Iti maysa nga Assembly Hall iti asideg ti Poznan, Poland, naorganisar dagiti boluntario iti Local Design/Construction a mangyempake kadagiti makan ken personal hygiene kit

7. 

   Marso 17, 2022: Uppat nga aldaw kalpasan ti naballigi nga umuna a panagitulod iti suplay, nangibiahe dagiti kakabsat iti 13 a metriko tonelada (14 U.S. a tonelada) a relief supply iti border ti Ukraine

8. 

   Marso 21–27, 2022: Kas met laeng iti damo, nayempake dagiti nabatbati a relief supply idiay Poland sa naitulod idiay Ukraine ken iti uneg ti 24 nga oras naiwaras dagita kadagiti lugar nga agkasapulan

9. 

   Marso 28, 2022: Iti uneg ti 20 nga aldaw kalpasan a naaprobaran ti damo a panagitulod, 100 a metriko tonelada (110 U.S. a tonelada) a makan, personal hygiene kit, ken agas ti naideliberen idiay Ukraine

Nakaipatuloden dagiti Saksi ni Jehova iti nasurok a 190 a metriko tonelada (209 U.S. a tonelada) a relief supply idiay Ukraine.