Nakabalud Gapu iti Pammatida—Russia
Ti pakasaritaan dagiti Saksi ni Jehova ita ket napno iti panangirurumen ken pannakaidadanes. Iti adu a tawtawen, bayat ti maika-20 a siglo, ab-abusuen ken malmaltratuen dagiti autoridad iti Russia dagiti Saksi uray no pagaammo ida dagiti umili a mannakikappia ken natulnog iti linteg. Ti panggep ti gobierno ti Soviet Union ket piliten ida a mangakseptar iti ideolohia ti Soviet. Saanda a napalubosan a maaddaan iti Biblia wenno narelihiosuan a literatura. Kanayon ida a sipsiputan dagiti autoridad, isu a nalimed ti panaggigimongda. No matiliwanda, mabugbogda wenno mamalmaloda ken maibaludda iti napaut. Rinibu ti impan ti gobierno idiay Siberia.
Ngem nagbaliw ti kasasaad idi 1991, idi inikkan ti gobierno ti Russia iti kalintegan ken wayawaya dagiti Saksi ni Jehova nga agdaydayaw ken saan ida a biangan dagiti autoridad. Nupay kasta, saan a nagbayag dayta a natalna a kasasaad.
Idi 2009, kimmaro ti ibubusor ken panangiparit. Inanamongan ti Korte Suprema ti Russia ti desision ti nababbaba a korte a nangibilang iti kongregasion dagiti Saksi ni Jehova kas “extremist.” Kalpasan ti adu a tawen a panangilaban dagiti Saksi iti kalinteganda, idi Abril 2017, nagdesision ti Korte Suprema ti Russia nga alaen ti gobierno ti sanikua dagiti korporasion dagiti Saksi gapu ta napabasolda kas extremist. Dagus a kinompiskar dagiti autoridad ti Russia dagiti sanikuada, inserrada dagiti lugar a pagdaydayawanda, ken indeklarada dagiti narelihiosuan a literaturada kas “extremist.”
Saan laengen a dagiti korporasion dagiti Saksi ti puntiria dagiti autoridad ti Russia, uray payen dagiti indibidual a Saksi ni Jehova. Iramramandan nga iparit ti panagdaydayaw ti tunggal indibidual gapu iti pannakaiparit ti organisasion. Serken dagiti polis dagiti balay dagiti Saksi nga agresulta iti pannakamaltrato ken naranggas a pannakaimbestigar. Agpada a naaresto dagiti babbai ken lallaki nga agduduma ti edadda, saanda a napalubosan a pumanaw iti balayda, wenno naipanda kadagiti pretrial detention, naideklarada a nakabasol, ken nasentensiaanda a maibalud.
Sipud ti pannakaiparit idi Abril 2017, ginasut a Saksi ti nasentensiaan a maipan iti pretrial detention wenno maibalud gapu ta napabasolda kas extremist. Ket manipud idi Hunio 17, 2025, addan 160 a Saksi a nakabalud.
Protesta Kontra iti Kinaranggas Kadagiti Saksi ni Jehova
Agtultuloy ti panangibalud dagiti autoridad ti Russia kadagiti Saksi kas extremist iti laksid ti panagprotesta ti adu a nasion nga isardeng ti Russia ti nakaro a panangidadanesda. Inyebkas dagiti eksperto ken dadduma a korte iti ruar ti Russia ti panangkontrada iti gobierno ti Russia gapu iti agtultuloy a panangidadanesna kadagiti Saksi ni Jehova.
Ti European Court of Human Rights: Idi Hunio 7, 2022, inruar ti European Court of Human Rights ti nakapatpateg a desision kontra iti Russia kas panangkondenar iti pannakaidadanes dagiti Saksi ni Jehova (Taganrog LRO and Others v. Russia, nos. 32401/10 and 19 others). Indeklara ti korte a saan a nainkalintegan nga imparit ti Russia ti trabaho dagiti Saksi ni Jehova idi 2017. Naibilin iti Russia nga “aramidenna ti amin a kasapulan tapno masigurado a maisardeng ti amin a saan pay a nalpas a kaso kriminal kontra kadagiti Saksi ni Jehova . . . ken wayawayaanna . . . dagiti [naibalud] a Saksi ni Jehova.” Kasta met, naibilin nga isublina ti amin a nakompiskar a sanikua wenno agbayad iti nasurok 60 a milion a doliar kas danios ken agbayad iti nasurok 3 a milion a doliar kadagiti aplikante para iti dadduma pay a perhuisio a maawagan nonpecuniary damages.
Surat ti Secretary General of the Council of Europe: Iti surat a napetsaan iti Disiembre 9, 2022 a naiturong iti Russian Minister of Foreign Affairs, kuna ni Marija Pejčinović Burić: “Kadagiti kaso ti Jehovah’s Witnesses of Moscow and Others ken Krupko and Others maipapan iti panagpatingga daytoy a narelihiosuan a grupo ken pannakaiparit dagiti aktibidadda, pannakaisardeng dagiti natalna a narelihiosuan a panagtataripnongda, ken pannakaipaidam ti wayawaya ti dadduma a miembroda, imbilin ti Committee kadagiti autoridad nga ikkatenda ti pannakaiparit dagiti aktibidad dagiti Saksi ni Jehova ken isardengda ti amin a criminal proceedings kontra kadakuada.”
Ti Desision ti Committee of Ministers of the Council of Europe: Iti mitingda idi Septiembre 2023, imbaga ti Committee of Ministers [CoM] “a maseknanda unay ta naan-anay ken inggagara a saan a sinurot ti autoridad ti Russia ti nalawag nga interpretasion ti [European Court of Human Rights] iti linaon ti Article 46 of the Convention ken ti impaulog a desision ti Taganrog LRO and Others, nangruna ti maipapan iti . . . pannakawayawaya dagiti naibalud a Saksi ni Jehova.” Gapu ta saan a sinurot ti Russia ti desision, inkeddeng ti CoM nga “iyuli dagiti kaso iti United Nations Human Rights Committee, Working Group on Arbitrary Detention of the UN Human Rights Council, ken dadduma pay nga organisasion a mangas-asikaso iti problema maipapan iti pannakaidadanes dagiti Saksi ni Jehova iti Russian Federation tapno masigurado a masurot dagiti desision nga impaulog dagiti korte.”
Dagiti Nabiit pay a Nagkaro a Sentensia
Idi Marso 27, 2025, sinentensiaan ti Konakovo City Court of the Tver Region ti uppat a Saksi: Oleg Katamov, Aleksey Kuznetsov, Aleksandr Shchetinin, ken Aleksandr Starikov. Ania ti basolda? Isarsaritada ti maipapan iti Biblia kadagiti kaarrubada ken mangang-angayda kadagiti natalna a narelihiosuan a panagtataripnong. Tunggal maysa kadakuada ket nasentensiaan iti innem a tawen a pannakaibalud. Dagus a naibaludda kalpasan ti pannakabistada.
Idi Abril 3, 2025, sinentensiaan ti Sovetskiy District Court of the City of Chelyabinsk ni Maksim Khamatshin iti innem a tawen a pannakaibalud. Naaresto ni Maksim gapu iti panangidaulona kadagiti narelihiosuan a taripnong. Dagus a naibalud kalpasan ti pannakabistana.
Idi Mayo 30, 2025, sinentensiaan ti Leninskiy District Court of Tambov ni Oleg Sirotkin iti innem a tawen a pannakaibalud. Agtawen isuna iti 60. Ni Nataliya ti asawana ken adda dua nga annakda a babai. Nangrugi ti kasona idi Septiembre 2021 idi sinerrek dagiti polis ti balayna idiay Tambov. Naakusaran ni Oleg a mangor-organisar ken makiramraman kadagiti gimong dagiti Saksi ni Jehova. Ibilang dayta ti gobierno kas panangsuporta kadagiti aktibidad ti maysa nga extremist nga organisasion. Dagus a naibalud kalpasan ti pannakabistana.
Agtultuloy a Panangikagumaan Tapno Maisardeng ti Di Nainkalintegan a Pannakaibalud
Maladingitan unay dagiti Saksi ni Jehova iti intero a lubong iti naranggas a panangtrato ti Russia kadagiti kapammatianda. Minilion a Saksi ti nagsurat kadagiti opisial ti Russia tapno agapelar para kadagiti naibalud a Saksi. Dagiti abogado dagiti naibalud a Saksi ket nagapelar manipud iti nababa agingga iti kangatuan a korte ti Russia ken nangipasada kadagiti aplikasion iti European Court of Human Rights. Nangipasa met dagiti Saksi ni Jehova kadagiti reklamo iti UN Human Rights Committee ken iti UN Working Group on Arbitrary Detention, ken nangitedda kadagiti report kadagiti internasional nga organisasion a mangmonmonitor iti panangabuso iti kalintegan ti tao. Itultuloy dagiti Saksi ni Jehova nga usaren ti amin a pamay-an tapno maipakaammo ti situasion dagiti kapammatianda idiay Russia ken mapasardeng ti nakaro a pannakaidadanes gapu iti relihion.
Time Line
Hunio 17, 2025
Nakabalud ti 160 a Saksi.
Marso 6, 2025
Inruar ti European Court of Human Rights (ECHR) ti desisionda maipapan iti kaso a Loginov and Others v. Russia. Imbagada a sinalungasing ti Russia ti kalintegan ti siam a Saksi a lallaki idi imbaludda ida (pito kadakuada ti naparparigat) kalpasan a sinerrek dagiti polis ti balbalayda iti Surgut idi Pebrero 15, 2019.
Oktubre 24, 2023
Nangiruar ti UN Human Rights Committee (CCPR) iti dua a View (desision) mainaig iti Local Religious Organization iti Elista ken Abinsk. Kadagita a dua a kaso, inkeddeng ti CCPR a linabsing ti Russia ti kalintegan dagiti Saksi sigun iti Article 18.1 (“kalintegan a maaddaan iti wayawaya iti panagpampanunot, konsiensia, ken relihion”) ken 22.1 (“kalintegan a maaddaan iti wayawaya a makilangen”) iti International Covenant on Civil and Political Rights. Paneknekan dagiti desision a dagiti narelihiosuan a literatura dagiti Saksi ket awan ti linaonna a mangiparparegta iti gura wenno kinaranggas.
Hunio 7, 2022
Inruar ti ECHR ti nagpateg a desisionna, Taganrog LRO and Others v. Russia, kas panangkondenar iti Russia gapu iti di nasayaat a panangtratona kadagiti Saksi ni Jehova.
Enero 12, 2022
Ti Ministry of Justice ti Russian Federation ket inramanna ti JW Library app iti Federal List of Extremist Materials (listaan dagiti maibilang nga extremist a material). Dayta ti kaunaan ken kakaisuna nga app a naiparit iti Russia ta naibilang kas extremist a material.
Septiembre 27, 2021
Imbasura ti Saint Petersburg City Court ti apela kontra iti desision idi Marso 31, 2021, a nangideklara nga extremist ti JW Library app ken nangiparit a mausar iti intero a Russian Federation ken Crimea. Dagus a nagepekto ti orihinal a desision ti korte.
Abril 26, 2019
Nakita ti UN Working Group on Arbitrary Detention a saan a nasurot ti kalintegan ni Dmitriy Mikhailov ken kinondenarna ti panangidadanes ti Russia kadagiti Saksi ni Jehova.
Abril 20, 2017
Impaiserra ti Supreme Court ti Russian Federation ti opisina dagiti Saksi ni Jehova ken ti 395 a Local Religious Organization.